Vientiane Times Lao
ມູນນິທິແຈ໋ກມາ ແລະ ມູນນິທິອາລີບາບາ ບໍລິຈາກເຄື່ອງມືການແພດໃຫ້ອີກ 10 ປະເທດໃນອາຊີ

ມູນນິທິແຈ໋ກມາ ແລະ ມູນນິທິອາລີບາບາ ບໍລິຈາກເຄື່ອງມືການແພດໃຫ້ອີກ 10 ປະເທດໃນອາຊີ

ມູນນິທິແຈ໋ກມາ ແລະ ມູນນິທິອາລີບາບາ ໄດ້ປະກາດແຜນການບໍລິຈາກເຄື່ອງມືການແພດທີ່ຕ້ອງການກັນຫຼາຍໃຫ້ອີກ 10 ປະເທດໃນອາຊີ ເມື່ອບໍ່ດົນມານີ້ ເພື່ອຊ່ວຍຕໍ່ສູ້ກັບເຊື້ອຈຸລະໂລກສາຍພັນໃໝ່ 2019 (COVID-19).

ລັດຖະບານຂອງປະເທດ ອາຟະການິດສະຖານ, ບັງກລາເທດ, ກຳປູເຈຍ, ລາວ, ມານດີວ, ມົງໂກລີ, ມຽນມາ, ເນປານ, ປາກິດສະຖານ ແລະ ສີລັງກາ ຈະໄດ້ຮັບເຄື່ອງບໍລິຈາກ ຈາກທັງສອງມູນນິທິເຊິ່ງລວມທັງໝົດແລ້ວປະກອບມີຜ້າອັດປາກຈຳນວນ 1.8 ລ້ານອັນ, ຊຸດອຸປະກອນກວດເຊື້ອພະຍາດ COVID-19 ຈຳນວນ 210,000 ຊຸດ ແລະ ອຸປະກອນອື່ນໆ ຈຳນວນ 36,000 ອັນໄດ້ແກ່ເຄື່ອງນຸ່ງປ້ອງກັນການຕິດເຊື້ອລວມໄປເຖິງອຸປະກອນ ແລະ ເຄື່ອງມືການແພດທີ່ຈຳເປັນເຊິ່ງລວມມີເຄື່ອງຊ່ວຍຫາຍໃຈແລະເຄື່ອງວັດແທກອຸນຫະພູມ.

ທ່ານ  ແຈ໋ກມາ ໄດ້ປະກາດຄໍາໝັ້ນສັນຍາຫຼ້າສຸດຂອງມູນນິທິຜ່ານທະວິດເຕີສ່ວນຕົວວ່າ: “ອາຊີ ສູ້ໆ! ພວກເຮົາຈະບໍລິຈາກເຄື່ອງມືສຸກເສີນໃຫ້ອີກ 10 ປະເທດໃນອາຊີ. ການຈັດສົ່ງໃຫ້ຮອດໄວໆບໍ່ແມ່ນເລື່ອງງ່າຍແຕ່ເຮົາຈະເຮັດໃຫ້ມັນໄດ້!”

ການຈັດສົ່ງເຄື່ອງບໍລິຈາກຈະດຳເນີນການໂດຍນຳໃຊ້ສັກກະຍະພາບທີ່ເຂັ້ມແຂງຂອງແພຼດຟອມອີເລັກໂຕຼນິກເພື່ອການຄ້າໂລກ (Electronic World Trade Platform: eWTP) ເພື່ອເອົາຊະນະສິ່ງທ້າທາຍດ້ານການຂົນສົ່ງ ແລະ ໂລຈິດສະຕິກຂອງຫຼາຍໆປະເທດທີ່ມີທີ່ຕັ້ງພູມສັນຖານຫ່າງໄກ.

ທ່ານ ຈຸນເຖົາຊົງ, ເລຂາທິການໃຫຍ່ຂອງ eWTP ໄດ້ກ່າວວ່າ: “ການແຜ່ລະບາດຂອງເຊື້ອພະຍາດໄດ້ກໍ່ໃຫ້ເກີດມີສິ່ງທ້າທາຍດ້ານໂລຈິດສະຕິກທົ່ວໂລກ. ໂດຍການຊ່ວຍເຫຼືອຂອງ eWTP, ພວກເຮົາຈະພະຍາຍາມຈົນສຸດຄວາມສາມາດເພື່ອຮັບປະກັນການຂົນສົ່ງແລະການຈັດສົ່ງທີ່ວ່ອງໄວເພື່ອເຄື່ອນຍ້າຍເຄື່ອງມືຕ່າງໆໄປສູ່ຊຸມຊົນຫ່າງໄກສອກຫຼີກທີ່ມີຕ້ອງການຫຼາຍທີ່ສຸດ”.

ໃນຊ່ວງຕົ້ນອາທິດນີ້, ມູນນິທິທັງສອງໄດ້ປະກາດການບໍລິຈາກເຄື່ອງມືການແພດໃຫ້ແກ່ ປະເທດມາເລເຊຍ, ອິນໂດເນເຊຍ, ໄທ ແລະ ຟິລິບປິນ ເຊິ່ງໄດ້ນຳໃຊ້ eWTP ທີ່ມີສັກກະຍະພາບດ້ານໂລຈິດສະຕິກດີເລີດເພື່ອການຂົນສົ່ງ ແລະ ການຈັດສົ່ງທີ່ວ່ອງໄວ ແລະ ໜ້າເຊື່ອຖືໄດ້ເຊັ່ນດຽວກັນ.ໂຄງການ eWTP ແມ່ນມີຈຸດປະສົງເພື່ອສ້າງຄວາມເຂັ້ມແຂງໃຫ້ແກ່ທຸລະກິດຂະໜາດນ້ອຍ ແລະ ກາງ ທົ່ວໂລກໃຫ້ສາມາດດຳເນີນທຸລະກິດໄດ້ຢ່າງເຕັມສັກກະຍະພາບ ໂດຍການຫຼຸດຜ່ອນອຸປະສັກດ້ານການຄ້າ ແລະ ການເຮັດໃຫ້ບໍລິສັດເຫຼົ່ານີ້ສາມາດເຂົ້າເຖິງຕະຫຼາດການຄ້າໂລກໄດ້ງ່າຍຂຶ້ນ.

ຂ່າວ: ວຽງຈັນທາຍ (ແຫຼ່ງຂ່າວຈາກ ມູນນິທິແຈ໋ກມາ ແລະ ມູນນິທິອາລີບາບາ)

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ