ມົກສະເບາະຢູ່ບ້ານນາເຕີຍ ເມືອງ ແລະ ແຂວງຫຼວງນໍ້າທາຈະກາຍເປັນແຫຼ່ງທ່ອງທ່ຽວໃນອະນາຄົດ ຊຶ່ງບໍລິສັດຄຳສຸກ ການຄ້າຂາເຂົ້າ-ຂາອອກ ແລະ ບໍລິການຈໍາກັດຜູ້ດຽວ ສົນໃຈລົງທຶນພັດທະນາເປັນແຫຼງທ່ອງທ່ຽວທຳມະຊາດ ແລະ ປະຫວັດສາດ.
ອົງການປົກຄອງແຂວງຫຼວງນໍ້າທາ ໄດ້ເຊັນບົດບັນທຶກຄວາມເຂົ້າໃຈ ໃນການສຶກສາຄວາມເປັນໄປໄດ້ ໂຄງການພັດທະນາແຫຼ່ງທ່ອງທ່ຽວ ມົກສະເບາະ ເມື່ອມໍ່ໆມານີ້ທີ່ພະແນກແຜນການ ແລະ ການລົງທຶນແຂວງ.
ທ່ານ ນາງ ສົມສີ ແກ້ວປະເສີດ ຫົວໜ້າຂະແໜງສົ່ງເສີມການລົງທຶນ, ພະແນກແຜນການ ແລະ ການລົງທຶນແຂວງ ໄດ້ກ່າວວ່າ: ບົດບັນທຶກຄວາມເຂົ້າໃຈ ວ່າດ້ວຍການສຶກສາຄວາມເປັນ ໄປໄດ້ຂອງໂຄງການພັດທະນາແຫຼ່ງທ່ອງທ່ຽວທຳມະຊາດ ແລະ ປະຫວັດສາດນີ້ມີເນື້ອທີ່ 149 ເຮັກຕາ ຊຶ່ງໄລຍະເວລາສຶກສາແມ່ນ 18 ເດືອນ. ເຂດດັ່ງກ່າວມີຮ່ອງຮອຍດ້ານປະຫວັດສາດ ແລະ ມີຄວາມອຸດົມສົມບູນທາງທຳມະຊາດ ເພື່ອແນ່ໃສ່ພັດທະນາໃຫ້ກາຍເປັນສະຖານທີ່ທ່ອງທ່ຽວໃນອະນາຄົດ.
ຂ່າວ: ອຸ້ມ ສົມນໍວັນ
