ຄອບຄົວ ລູກຫຼານພໍ່ຕູ້ພວງ, ອ້າຍນ້ອງ ປກສ, ປກຊ ແລະ ທີມງານແຫຼ່ງທ່ອງທ່ຽວນໍ້າປຽນຍໍລະປາ ຢຸດການຄົ້ນຫາພໍ່ຕູ້ພວງຊົ່ວຄາວ ມື້ນີ້ວັນທິດວັນທີ 11 ຕຸລາ 2020, ຫຼັງຈາກໄດ້ຄົ້ນຫາມາແລ້ວ 8 ວັນ ນັບແຕ່ມື້ຫຼົງປ່າແຕ່ວັນທີ 3 ຕຸລາທີ່ຜ່ານມາແຕ່ຍັງບໍ່ພົບ ຊຶ່ງທາງຄອບຄົວຂອງພໍ່ຕູ້ພວງຕັ້ງຄວາມຫວັງໄວ້ພຽງຈາກປະຕິຫານ.
ພໍ່ຕູ້ ພວງ ອາຍຸ 95 ປີ ໄດ້ພັດຫຼົງເຂົ້າປ່າໃນເວລາທີ່ໄປທ່ຽວກັບລູກຫຼານ ທີ່ແຫຼ່ງທ່ອງທ່ຽວນໍ້າປຽນຍໍລະປາ ຢູ່ບ້ານຊຽງແລທ່າ ເມືອງປາກງື່ມ ນະຄອນຫຼວງວຽງຈັນ ໃນວັນທີ 3 ຕຸລາ ທີ່ຜ່ານມາ, ພົບເຫັນພໍ່ຕູ້ພວງຄັ້ງສຸດທ້າຍໃນເວລາ 13 ໂມງ 12 ນາທີ ທີ່ບໍລິເວນສະລອຍນໍ້າ ຂອງແຫຼ່ງທ່ອງທ່ຽວດັ່ງກ່າວ.
ຕາມການບອກເລົ່າຂອງລູກພໍ່ຕູ້ພວງໃຫ້ຮູ້ວ່າ: ໄດ້ປະພໍ່ຕູ້ພວງກັບຫຼານອາຍຸປະມານ 8 ປີ ໄວ້ຢູ່ເບື້ອງລຸ່ມຂອງແຫຼ່ງທ່ອງທ່ຽວນໍ້າປຽນຍໍລະປາ ຍ້ອນລາວບໍ່ສາມາດຍ່າງຂຶ້ນໄປເທິງໄດ້, ສ່ວນລາວ ແລະ ທີມງານໄດ້ຢ່າງໄປເລາະເບີ່ງແຫຼ່ງທ່ອງທ່ຽວຕ່າງໆຢູ່ທາງເທິງ ແຕ່ເມື່ອລົງມາກໍ່ບໍ່ເຫັນພໍ່ຕູ້ ເຫັນແຕ່ຫຼານນ້ອຍ ເມື່ອຖາມຫຼານກໍ່ຕອບວ່າ ພໍ່ຕູ້ ໄດ້ຍ່າງເຂົ້າປ່າ ແຕ່ບໍ່ເຫັນອອກມາ.
ຂ່າວ: ວຽງຈັນທາຍ
