Visit BigblueAgency
ລມຕ ກະຊວງກະສິກຳ ແລະ ປ່າໄມ້ ​ແນະນຳ​ໃຫ້​ຫ້າມ​ນຳ​ເຂົ້າ​ຜະ​ລິດ​ຕະ​ພັນ​ກະ​ສິ​ກຳຫຼາຍລາຍການ ເພື່ອຊຸກຍູ້ການຜະລິດພາຍໃນ

ລມຕ ກະຊວງກະສິກຳ ແລະ ປ່າໄມ້ ​ແນະນຳ​ໃຫ້​ຫ້າມ​ນຳ​ເຂົ້າ​ຜະ​ລິດ​ຕະ​ພັນ​ກະ​ສິ​ກຳຫຼາຍລາຍການ ເພື່ອຊຸກຍູ້ການຜະລິດພາຍໃນ

ລັດຖະມົນຕີ ກະຊວງກະສິກຳ ແລະ ປ່າໄມ້ແນະນຳໃຫ້ ລັດຖະບານ ແລະ ພາກສ່ວນທີ່ກ່ຽວຂ້ອງ ສັ່ງຫ້າມການນໍາເຂົ້າ ຜະ​ລິດ​ຕະ​ພັນ​ກະ​ສິ​ກຳຫຼາຍລາຍການ ລວມທັງຜັກບາງຊະນິດ ແລະ ຜະລິດຕະພັນກະເສດອື່ນໆ, ເພື່ອຊ່ວຍຊຸກຍູ້ການປູກພືດຊະນິດດັ່ງກ່າວໃນປະເທດ ພ້ອມດຽວກັນກັບການແກ້ໄຂບັນຫາໄພເງິນເຟີ້.

ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ແນະນຳໃນກອງປະຊຸມຜູ້ປະກອບການທຸລະກິດໃນຂະແໜງການກະສິກໍາ ແລະ ປ່າໄມ້ ຄັ້ງທີ 1 ປີ 2023 ທີ່ຈັດຂຶ້ນເມື່ອບໍ່ດົນມານີ້ ທີ່ຫໍປະຊຸມແຫ່ງຊາດ, ໂດຍ ບັນຊີ ຜັກທີ່ທ່ານແນະນຳໃຫ້ໂຈະການນຳເຂົ້າປະກອບມີ: ຜັກກາດຂາວ , ກະລໍ່າປີ, ຜັກບົ່ວ, ຜັກທຽມ, ໝາກເລັ່ນ, ໝາກເຜັດໃຫຍ່, ມັນຕົ້ນ, ກະຫຼົດ ແລະ ບີດຣູດ.

ນອກຈາກນີ້ ບັນດາ ຊີ້ນໝູ, ຊີ້ນງົວ ແລະ ບາງປະເພດ ກໍຈະຖືກໂຈະການນຳເຂົ້າເຊັ່ນກັນ ຍົກເວັ້ນບັນດາຊີ້ນງົວ ແລະ ຊີ້ນແກະ ເກຣດພຣີມຽມ ທີ່ບັນດາໂຮງແຮມຊັ້ນນຳຕ້ອງການ.

ທ່ານ ເພັດ ພົມພິທັກ ຍັງກ່າວອີກວ່າ: ຊາວກະສິກອນໃນລາວສາມາດຜະລິດເຂົ້າ, ພືດຜັກ ແລະ ຜົນຜະລິດກະສິກຳອື່ນໆໄດ້ປະມານ 6,53 ລ້ານໂຕນຕໍ່ປີ. ຕົວເລກດັ່ງກ່າວລວມມີເຂົ້າ 3,72 ລ້ານໂຕນ, ພືດຜັກ ແລະ ພືດເສດຖະກິດ 2,31 ລ້ານໂຕນ, ຊີ້ນ, ປາ ແລະ ໄຂ່ 507,644 ໂຕນ. ປະລິມານດັ່ງກ່າວເຮັດໃຫ້ການບໍລິໂພກສະເລ່ຍຕໍ່ຫົວຄົນຕໍ່ປີໄດ້ພຽງແຕ່ 68.2 ກິໂລກຣາມ.

ແນວໃດກໍ່ຕາມ, ຊາວກະສິກອນສ່ວນຫຼາຍຍັງນຳໃຊ້ວິທີພື້ນເມືອງໃນການປູກພືດ ແລະ ລ້ຽງສັດ ແລະ ຂຶ້ນກັບສະພາບດິນຟ້າອາກາດຕາມລະດູການ ໝາຍຄວາມວ່າການສະໜອງຜະລິດຕະພັນແມ່ນມີຄວາມຜິດປົກກະຕິ ແລະ ບໍ່ແນ່ນອນ. ຊາວກະສິກອນຍັງປະສົບກັບຄວາມຫຍຸ້ງຍາກກັບລາຄາສິນຄ້າກະສິກໍາທີ່ນໍາເຂົ້າ, ໂດຍສະເພາະຝຸ່ນ ແລະ ອາຫານສັດ. ດ້ວຍລາຄາທີ່ສູງເຮັດໃຫ້ພໍ່ຄ້າບາງຄົນໄດ້ຫັນປ່ຽນການນໍາເຂົ້າສິນຄ້າເຫຼົ່ານີ້ມາຢ່າງຜິດກົດໝາຍ. ນອກຈາກນີ້ ຄ່າຂົນສົ່ງທີ່ສູງກໍເປັນອີກ ບັນຫາໜຶ່ງ ຂອງຊາວກະສິກອນ ແລະ ການເພີ່ມ ຂຶ້ນຂອງລາຄາ ນ້ຳມັນເຊື້ອໄຟກໍຍັງເຮັດໃຫ້ຕົ້ນທຶນປູກພືດຜັກ ແລະ ຜົນຜະລິດອື່ນໆ ເພີ່ມຂຶ້ນ.

Related Articles

Leave a Reply