Vientiane Times Lao
ລມຕ ສຶກສາ ແລະ ກິລາປຸກລະດົມ ນໍ້າໃຈນັກກິລາໃຫ້ໄດ້ຫຼຽນໄຊກັບປະເທດ

ລມຕ ສຶກສາ ແລະ ກິລາປຸກລະດົມ ນໍ້າໃຈນັກກິລາໃຫ້ໄດ້ຫຼຽນໄຊກັບປະເທດ

ລັດຖະມົນຕີກະຊວງສຶກສາ ແລະ ກິລາ ແນະນຳນັກກິລາລາວ ທີ່ເຂົ້າຮ່ວມ ການແຂ່ງຂັນກິລາຊີເກມ ຄັ້ງທີ່ 30 ທີ່ປະເທດຟີລິບປິນ ວ່າ ຂໍໃຫ້ມຸ່ງໝັ້ນສູ້ສຸດຄວາມສາມາດໂດຍເຮັດໃຫ້ທຸງຊາດລາວຊູຂຶ້ນສູງກວ່າໝູ່ ແລະ ເປັ່ງສຽງເພງ ຊາດເຮົາຢູ່ໃນເວທີນີ້ ເພື່ອກຽດສັກສີ ແລະ ເປັນ ໜ້າເປັນຕາໃຫ້ກັບປະຊາຊົນຄົນລາວທັງຊາດ.

ທ່ານ ນາງ ເເສງເດືອນ ຫລ້າຈັນທະບູນ ລັດຖະ ມົນຕີ ແລະ ປະທານຄະນະກຳມະການໂອລີມປີກ ແຫ່ງຊາດລາວ, ທ່ານ ສົມພູ ພົງສາ ຜູ້ຊ່ວຍ ລັດຖະມົນຕີ ແລະ ຕ່າງໜ້າຈາກສະພາ ການຄ້າ ໄດ້ເດີນທາງມາຢ້ຽບຢາມໝູ່ບ້ານ ນັກກິລາ ທີ່ເມືອງ ຄຣາກ ໃນວັນທີ 29 ພະຈິກ 2019.

ທ່ານນາງ ເເສງເດືອນ ໄດ້ກ່າວວ່າ ທີ່ຜ່ານມາທາງ ສະຫະພັນກໍ່ໄດ້ລາຍງານວ່າພວກຫຼານໄດ້ເອົາໃຈໃສ່ຝຶກຊ້ອມດີ ແລະ ມາຮ່ວມງານນີ້ກໍ່ເອົາໃຈ ໃສ່ໃນການແຂ່ງຂັນດີ. “ການແຂ່ງຂັນກິລາບໍ່ ແມ່ນແຕ່ເອົາຫຼຽນ ຫາກຍັງເປັນກຽດ ແລະ ສັກສີຂອງຊາດເຮົາ ສະນັ້ນຂໍໃຫ້ລູກຫຼານຄິດ ເບິ່ງໂຕນີ້, ຂໍໃຫ້ພະຍາຍາມດຸໝັ່ນຝຶກຊ້ອມ ໃຫ້ມີຄວາມສາມັກຄີຮັກແພງກັນ, ເຕົ້າໂຮມ ຈິດໃຈກັນ, ຜູ້ໃດເຮັດແນວໃດກໍ່ຂໍໃຫ້ຕຳນິຕິ ຊົມເຊິ່ງກັນແລະກັນແບບອ້າຍນ້ອງຄີງໆເພື່ອ ຄວາມສໍາເລັດຕາມຄວາມມຸ່ງຫວັງ. ຖ້າຫາກມີຄວາມສາມັກຄີກັນແລ້ວກຳລັງແຮງນັ້ນຈະມາເອງ, ສຳຄັນແມ່ນຮັກສາສຸຂະພາບທັງກາຍ ແລະ ຈິດໃຈ.”

ທ່ານ ຍັງໄດ້ເລົ່າຜົນຂອງກອງປະຊຸມສະພາສະ ໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ໃນ ວັນທີ 25 ພະຈິກ 2019 ທີ່ຜ່ານມາ ໃຫ້ນັກກິລາ ແລະ ທີມງານໄດ້ຮັບຊາບ ໂດຍສະ ເພາະກົດໝາຍວ່າດ້ວຍກິລາກາຍຍະກຳ ແລະ ເຫັນວ່າທາງ ສະມາຊິກສະພາກໍ່ໃຫ້ຄວາມເປັນ ຫ່ວງເປັນໃຍຕໍ່ການພັດທະນາກິລາລາວ ແລະ ນະໂຍບາຍຕໍ່ນັກກິລາ, ພວກເຮົາຈະມີຫຼາຍ ອັນໃໝ່ໆໃນນະໂຍບາຍຂອງນັກກິລາບໍ່ວ່າຈະ ແມ່ນເລື່ອງການຮ່ຳຮຽນ ແລະ ເງືອນໄຂອື່ນໆ ເພື່ອຈະເຮັດໃຫ້ກິລາກາຍຍະກຳຂອງພວກເຮົາ ໄດ້ຮັບການພັດທະນາດີຂຶ້ນ ແລະ ຂໍໃຫ້ນັກກິລາ ທຸກຄົນມີຄວາມອຸ່ນໃຈ.

ສຳລັບການແຂ່ງຂັນຊີເກມຄັ້ງທີ 30 ທີ່ປະເທດ ຟີລິບປິນ ມີນັກກິລາຈາກລາວເຂົ້າແຂ່ງຂັນ 300 ກວ່າຄົນ ໃນ 24 ຊະນິດ ຂອງ 56 ປະເພດກິລາ. ພິທີເປີດຢ່າງເປັນທາງການແມ່ນໄດ້ມີຂຶ້ນ ໃນຕອນແລງຂອງມື້ວານນີ້ ວັນທີ 30 ພະຈິກ. ປະເທດຟີລິບປິນ ເຄີຍເປັນເຈົ້າພາບຈັດການ ແຂ່ງຂັນຊີເກມມາແລ້ວ 3 ຄັ້ງຄື ໃນປີ 1981, 1991, 2005 ແລະ ຄັ້ງນີ້ 2019 ເຊິ່ງຈະມີ ນັກກິລາເຂົ້າຮ່ວມທັງໝົດ 9,840 ຄົນ ຈາກບັນ ດາປະເທດອາຊີຕາເວັນອອກສ່ຽງໃຕ້.

ຂ່າວ: ສຸກນີລັນດອນ

ພາບ: ສຕລ+ລາວສູ້ສູ້

Related Articles

Leave a Reply