ທ່ານ ພັນຄຳ ວິພາວັນ ນາຍົກລັດ ຖະມົນຕີແຫ່ງ ສປປ ລາວໄດ້ກ່າວຕໍ່ສະມາຊິກສະພາແຫ່ງຊາດທີ່ກອງປະຊຸມ ສະໄໝ ສາມັນ ເທື່ອທີ 2 ຂອງສະພາແຫ່ງຊາດຊຸດທີ IX ເມື່ອມໍ່ໆມານີ້ກ່ຽວກັບການແກ້ໄຂໄພວ່າງງານວ່າ: ການແກ້ໄຂບັນຫາໄພວ່າງງານຈາກແຮງງານພາຍໃນ ແລະ ແຮງງານລາວທີ່ກັບຄືນປະເທດ, ລັດຖະບານໄດ້ຖືເອົາເປັນບັນຫາທີ່ສໍາຄັນ ເພາະບັນຫາດັ່ງກ່າວນັ້ນມັນຕິດພັນກັບການດໍາລົງຊີວິດ ແລະ ການເປັນຢູ່ຂອງປະຊາຊົນ ລວມທັງຄວາມສະຫງົບໃນສັງຄົມ ໂດຍໄດ້ມີການຊີ້ນຳໃຫ້ຂະແໜງການກ່ຽວຂ້ອງ ທັງສູນກາງ ແລະ ທ້ອງຖິ່ນໃຫ້ເອົາໃຈໃສ່ ໃນການກວດກາ ແລະ ເກັບກຳຈຳນວນແຮງງານທີ່ຢູ່ໃນແຂວງຂອງຕົນ ລວມທັງແຮງງານລາວ ທີ່ກັບຄືນມາແຕ່ປະເທດເພື່ອນບ້ານ ເພື່ອສ້າງແຜນຮອງຮັບໃຫ້ທັນເວລາ, ປະສານກັບພາກສ່ວນກ່ຽວຂ້ອງເກັບກໍາຂໍ້ມູນຕຳແໜ່ງງານວ່າງ ຈາກຫົວໜ່ວຍແຮງງານ ແລະ ໂຄງການລົງທຶນຕ່າງໆ ທີ່ຍັງມີຄວາມຕ້ອງການນຳໃຊ້ແຮງງານລາວ ເພື່ອສະໜອງຂໍ້ມູນໃຫ້ທຸກທ້ອງ ຖິ່ນຊ່ວຍໂຄສະນາຕື່ມ ທັງປະສານສົມທົບກັບປະ ເທດເພື່ອນບ້ານ ໃນການຮັບເອົາແຮງງານລາວຮອບໃໝ່ ໃຫ້ເຂົ້າສູ່ລະບົບລະບຽບແບບແຜນຕາມກົດໝາຍ.
ທ່ານ ພັນຄຳ ວິພາວັນ ໄດ້ກ່າວຕື່ມອີກວ່າ: ນອກນັ້ນລັດຖະບານມີແຜນຈະໄດ້ຈັດຝຶກອົບຮົມສີມືແຮງງານໃຫ້ຜູ້ບໍ່ມີອາຊີບ ແລະ ຜູ້ວ່າງງານ ໃຫ້ມີອາຊີບຕິດຕົວ ຫຼື ຮູ້ເຮັດອາຊີບໃດໜຶ່ງແບບອິດສະຫຼະ, ສົ່ງເສີມການຈັດຫາວຽກເຮັດງານທໍາໃຫ້ແຮງງານລາວ ຕາມຄວາມຕ້ອງການຂອງຕະຫຼາດແຮງງານຢູ່ໃນຕົວເມືອງ, ຊົນນະບົດ ແລະ ຕ່າງປະເທດ ໂດຍສະເພາະໃນບັນດາໂຄງການລົງທຶນຕ່າງປະເທດ ແລະ ຢູ່ບັນດາເຂດເສດຖະກິດພິເສດ. ສຳລັບການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະ ຊາຊົນ ເປັນວຽກງານໜຶ່ງທີ່ລັດຖະບານກໍໄດ້ໃຫ້ຄວາມສໍາຄັນເຊັ່ນກັນ ເຊິ່ງການຈັດສັນງົບປະມານພັດທະນາຊົນນະບົດ ແລະ ຫຼຸດຜ່ອນຄວາມທຸກຍາກ ໄດ້ຈັດສັນຢູ່ກະຊວງກະສິກຳ-ປ່າໄມ້ ຕາມທິດສາມສ້າງ.
