Vientiane Times Lao
ລັດຖະບານສືບຕໍ່ປະຕິບັດບັນດາມາດຕະການຜ່ອນຜັນຕ້ານໂຄວິດ-19 ອີກ 1 ເດືອນ

ລັດຖະບານສືບຕໍ່ປະຕິບັດບັນດາມາດຕະການຜ່ອນຜັນຕ້ານໂຄວິດ-19 ອີກ 1 ເດືອນ

ຫ້ອງວ່າການສຳນັກງານນາຍົກລັດຖະມົນຕີໄດ້ອອກແຈ້ງການມື້ນີ້ວັນທີ 30 ມິຖຸນາ 2020 ວ່າ: ລັດຖະບານເຫັນດີສືບຕໍ່ປະຕິບັດບັນດາມາດຕະການຜ່ອນຜັນກ່ຽວກັບມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ອີກ 1 ເດືອນ ນັບແຕ່ວັນທີ 1-31 ກໍລະກົດ 2020.

ໂດຍລວມແລ້ວ, ຕາມການແຈ້ງການສືບຕໍ່ປະຕິບັດບັນດາມາດຕະການຜ່ອນຜັນຕ້ານພະຍາດໂຄວິດ-19 ແມ່ນໄດ້ເນັ້ນໃຫ້ໝົດທຸກຄົນເພີ່ມທະວີການປ້ອງກັນພະຍາດດັ່ງກ່າວ ໂດຍໃສ່ຜ້າອັດປາກ-ດັງ, ລ້າງມືດ້ວຍເຈວລ້າງມື, ຮັກສາໄລຍະຫ່າງກັນ 1 ແມັດຂຶ້ນໄປ, ວັດແທກອຸນຫະພູມ, ອະນາໄມສະຖານທີ່ ຕາມຄໍາແນະນໍາຂອງຄະນະສະເພາະກິດ.

ແຈ້ງການຍັງໄດ້ລະບຸໄວ້ຕື່ມວ່າ: ເຫັນດີໃຫ້ຈັດການແຂ່ງຂັນກິລາທຸກປະເພດໄດ້, ອະນຸຍາດໃຫ້ເປີດກາຊີໂນທີ່ໄດ້ຮັບອະນຸຍາດຖຶກຕ້ອງຕາມລະບຽບ, ອະນຸຍາດໃຫ້ຈັດກິດຈະກໍາຊຸມນຸມຕ່າງໆ, ງານສັງສັນ, ງານປະເພນີ, ງານແຕ່ງດອງຕາມຮິດຄອງປະເພນີ ແຕ່ຕ້ອງໃຫ້ປະຕິບັດມາດຕະການຕ້ານພະຍາດດັ່ງກ່າວ ຕາມການແຈ້ງການທີ່ກ່າວມາຂ້າງເທິງ.

ນອກນັ້ນໃຫ້ສືບຕໍ່ປິດບັນດາກິດຈະການຮ້ານບັນເທິງ, ຮ້ານຄາຣາໂອເກະ,​ ຮ້ານເກມ, ສືບຕໍ່ປິດດ່ານປະເພນີ, ດ່ານທ້ອງຖິ່່ນສໍາລັບເຂົ້າ-ອອກຂອງບຸກຄົນທົ່ວໄປ ແລະ ການຂົນສົ່ງສິນຄ້າຍົກເວັ້ນບາງດ່ານປະເພນີ ຫຼື ດ່ານທ້ອງຖິ່ນທີ່ໄດ້ຮັບອະນຸຍາດຈາກລັດຖະບານ, ໃຫ້ລົດຂົນສົ່ງສິນຄ້າເຂົ້າ-ອອກໄດ້. ສ່ວນດ່ານສາກົນສືບຕໍ່ປິດສໍາລັບບຸກຄົນທົ່ວໄປ, ຍົກເວັ້ນພົນລະເມືອງລາວ ແລະ ຄົນຕ່າງປະເທດທີ່ຈໍາເປັນຮີບດ່ວນໃນການເດີນທາງເຂົ້າ-ອອກປະເທດລາວ ທີ່ໄດ້ຮັບອະນຸຍາດຈາກຄະນະສະເພາະກິດ. ສໍາລັບລົດຂົນສົ່ງສິນຄ້າສາມາດເຂົ້າ-ອອກ ໄດ້ປົກກະຕິ. ສືບຕໍ່ໂຈະອອກວິຊາທ່ອງທ່ຽວ ແລະ ຢຽ້ມຢາມສໍາລັບບຸກຄົນທີ່ເດີນທາງມາຈາກ ຫຼື ຜ່ານປະເທດທີ່ຍັງມີການລະບາດຂອງພະຍາດໂຄວິດ-19. ສໍາລັບນັກການທູດ, ພະນັກງານອົງການຈັດຕັ້ງສາກົນ, ຊ່ຽວຊານ, ນັກລົງທຶນ, ນັກທຸລະກິດ, ວິຊາການ ແລະ ແຮງງານຕ່າງປະເທດທີ່ມີຄວາມຈໍາເປັນ ແລະ ຮີບດ່ວນສາມາດເຂົ້າມາປະຕິບັດວຽກງານຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆໄດ້ ແຕ່ຕ້ອງຜ່ານການພິຈາລະນາເຫັນດີຈາກຄະນະສະເພາະກິດ ແລະ ມາດຕະການອື່ນໆ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ