ລັດຖະບານ ສປປ ລາວ ແລະ ອົງການສະຫະປະຊາຊາດກອງທຶນສຳລັບປະຊາກອນ (UNFPA) ໄດ້ລົງນາມ ແຜນວຽກ (CPAP) ສໍາລັບແຜນດຳເນີນງານຮອບວຽນໃໝ່ (2022-2026) ສຸມໃສ່ 4 ຂົງເຂດບູລິມະສິດ ເພື່ອເນັ້ນໃສ່ປະກອບສ່ວນເຂົ້າໃນການບັນລຸເປົ້າໝາຍການເຂົ້າເຖິງສຸຂະພາບທາງເພດ ແລະ ສຸຂະພາບຈະເລີນພັນ ແລະ ສິດທິດ້ານຈະເລີນພັນ ເຊັ່ນ: ສຸຂະພາບທາງເພດ, ສຸຂະພາບຈະເລີນພັນ ແລະ ສິດທິ, ໄວໜຸ່ມ ແລະ ເຍົາວະຊົນ, ຄວາມສະເໝີພາບລະຫວ່າງຍິງ-ຊາຍ ແລະ ການສ້າງຄວາມອາດສາມາດໃຫ້ແມ່ຍິງ, ຂໍ້ມູນ ແລະ ການປ່ຽນແປງດ້ານປະຊາກອນ.
ພິທີລົງນາມແຜນງານດັ່ງກ່າວ ໄດ້ຈັດຂຶ້ນໃນວັນທີ 16 ກຸມພາ 2022 ທີ່ນະຄອນຫຼວງວຽງຈັນ ລະຫວ່າງ ທ່ານ ປອ ສະຖາບັນດິດ ອິນຊີຊຽງໃໝ່, ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ທ່ານນາງ ມາຣຽມ ເອ ຄານ, ຜູ້ຕາງໜ້າອົງການ UNFPA, ຊື່ງການລົງນາມແຜນງານນີ້ ແມ່ນມາຈາກຜົນສໍາເລັດໃນການເປີດແຜນດໍາເນີນງານຮອບວຽນທີ 7 ລະຫວ່າງ ລັດຖະບານ ລາວ ແລະ ອົງການ UNFPA ໃນເດືອນທີ່ຜ່ານມາ.
ແຜນດຳເນີນງານຮອບວຽນທີ 7 ແມ່ນອີງໃສ່ບົດຮຽນທີ່ໄດ້ຖອດຖອນຈາກແຜນດໍາເນີນງານຮອບວຽນທີ່ຜ່ານມາ ແລະ ນໍາໃຊ້ຂໍ້ມູນຈາກການສຶກສາປະຊາກອນ ສປປ ລາວ ປີ 2030 ແລະ ສອດຄ່ອງກັບ ແຜນພັດທະນາເສດຖະກິດ-ສັງຄົມແຫ່ງຊາດ 5ປີ ຄັ້ງທີ IX, ປະຕິບັດຕາມຄວາມໝາຍໝັ້ນຂອງລັດຖະບານຕໍ່ກອງປະຊຸມສາກົນກ່ຽວກັບການພັດທະນາປະຊາກອນ ຄັ້ງທີ 25 (ICPD25) ແລະ ກອບການຮ່ວມມືດ້ານການພັດທະນາແບບຍືນຍົງຂອງສະຫະປະຊາຊາດ (UNSDCF).
