Vientiane Times Lao
ລາວຍັງມີຄວາມທ້າທາຍ ແລະ ຫຼໍ່ແຫຼມ ຫຼາຍດ້ານທີ່ອາດຈະເກີດການລະບາດຂອງພະຍາດໂຄວິດ-19 ເປັນວົງກວ້າງ

ລາວຍັງມີຄວາມທ້າທາຍ ແລະ ຫຼໍ່ແຫຼມ ຫຼາຍດ້ານທີ່ອາດຈະເກີດການລະບາດຂອງພະຍາດໂຄວິດ-19 ເປັນວົງກວ້າງ

ລັດຖະບານສືບຕໍ່ເຝົ້າລະວັງ, ຕິດຕາມ, ປະເມີນສະຖານະການທຸກໆໄລຍະ ໃນ​ການ​ປ້ອງ​ກັນ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ລວມ​ທັງ​ຊອກ​ຫາ​ວັກ​ຊິນ​ໃຫ້​ໄດ້​ຫຼາຍ​ທີ່​ສຸດມາ​ສັກ​ໃຫ້​ປະ​ຊາ​ຊົນ​ໃນ​ຂອບ​ເຂດ​ທົ່ວ​ປະ​ເທດ ເພື່ອ​ສ້າງ​ພູມ​ຕ້ານ​ທານ​ໃນ​ການ​ປ້ອງ​ກັນ​ພະ​ຍາດ​ດັ່ງ​ກ່າວ ທັງ​ນີ້​ກໍ່​ເພື່ອ​ເປັນ​ການ​ຮັກ​ສາ​ຊີ​ວິດ​ຂອງ​ປະ​ຊາ​ຊົນ​ບັນ​ດາ​ເຜົ່າ, ເຮັດ​ໃຫ້​ຈຳ​ນວນ​ຜູ້​ຕິດ​ເຊື້ອ​ຫຼຸດ​ລົງ ແລະ ໃຫ້​ພະ​ຍາດ​ດັ່ງ​ກ່າວ​ຫາຍ​ສາບ​ສູນ​ຈາກ​ປະ​ເທດ​ລາວ, ແຕ່​ສ​ປ​ປ ລາວ​ຍັງ​ມີ​ຄວາມທ້າທາຍ ແລະ ​ຫຼໍ່​ແຫຼມ​ຫຼາຍ​ດ້ານທີ່​ອາດ​ຈະ​ເກີດ​ການ​ລະ​ບາດ​ຂອງ​ພະ​ຍາດ​ໂຄວິດ-19​ ເປັນ​ວົງ​ກວ້າງຍ້ອນ​ວ່າ​ປະ​ເທດ​ອ້ອມ​ຂ້າງ​ຍັງ​ມີ​ການ​ແຜ່​ລະ​ບາດ​ຂອງ​ພະ​ຍາດ​ດັ່ງ​ກ່າວ, ບາງ​ກຸ່ມ​ຄົນ​ໃນ​ສັງ​ຄົມ​ຍັງ​ລະ​ເມີດ​ຕໍ່​​ລະ​ບຽບການທີ່​ທາງ​ຄະ​ນະ​ສະ​ເພາະ​ກິດ​ວາງ​ອອກ ແລະ ອື່ນໆ.

 ທ່ານພັນ​ຄຳ ວິ​ພາ​ວັນ ນາຍົກລັດຖະມົນຕີ ​ໄດ້ຖະແຫຼງກ່ຽວກັບການສືບຕໍ່ປະຕິບັດມາດຕະການສະກັດກັ້ນ ແລະ ຕ້ານການລະບາດຂອງພະຍາດ ໂຄວິດ-19 ຢູ່ ສປປ ລາວ ເມື່ອ ວັນທີ 20 ກໍລະກົດ 2021 ທີ່​ຜ່ານ​ມາ ຊຶ່ງ​ເນື້ອ​ໃນ​ທີ່​ສຳ​ຄັນ​ ແມ່ນ​ທ່ານໄດ້​ຮຽກ​ຮ້ອງໃຫ້ປະຊາຊົນລາວທຸກຖ້ວນໜ້າ, ເຈົ້າໜ້າທີ່ທີ່ກ່ຽວ ຂ້ອງທຸກພາກສ່ວນ ຮັບຮູ້ເຂົ້າໃຈວ່າພະຍາດໂຄວິດ-19 ເປັນ​ພະ​ຍາດ​ທີ່​ຮ້າຍ​ແຮງ ແລະ  ໄດ້ລະບາດຮຸນແຮງໃນຂອບເຂດ ທົ່ວໂລກ ສ້າງຄວາມເສຍຫາຍຢ່າງໃຫຍ່ຫຼວງໃຫ້ແກ່ຊີວິດ ແລະ ເສດຖະກິດ-ຊີວິດການເປັນຢູ່ຂອງປະຊາຊົນ ຢ່າງມະຫາສານ ດັ່ງ​ນັ້ນ​ຈຶ່ງຮຽກ​ຮ້ອງໃຫ້​ປະ​ຊາ​ຊົນ​ລາວ ເອົາ​ໃຈ​ໃສ່​ກ່ຽວ​ກັບ​ການ​ຕ້ານ​ພະ​ຍາດ​ດັ່ງ​ກ່າວ​ນີ້, ໃຫ້ເຫັນອົກເຫັນໃຈເຊິ່ງກັນ ແລະ ກັນ ຂໍໃຫ້ທຸກຄົນຈົ່ງໃຊ້ ເຫດຜົນ ໃຊ້ຄວາມອົດທົນ ບໍ່ໃຊ້ອາລົມຕໍ່ກັນ-ປະຊາຊົນກໍຕ້ອງເຫັນໃຈແພດໝໍ ແລະ ເຈົ້າໜ້າທີ່, ເຈົ້າໜ້າທີ່ ກໍຕ້ອງເຂົ້າໃຈ ແລະ ເຫັນໃຈປະຊາຊົນຜູ້ເຈັບປ່ວຍ, ສາມັກຄີຊ່ວຍເຫຼືອກັນ ຮ່ວມແຮງກັນ ພ້ອມກັນຜ່ານຜ່າໄປດ້ວຍກັນ, ວັກຊິນທີ່ນຳໃຊ້ຢູ່ປະເທດເຮົາ ມີຫຼາຍຊະນິດ ເຊັ່ນ: ຊິໂນຟາມ, ສະປຸກນິກ, ແອັສຕຣາ ເຊເນກາ, ຟາຍເຊີ ແລະ ຈອນສັນແອນຈອນສັນ ຢືນຢັນວ່າ ທຸກຊະນິດລ້ວນແຕ່ດີມີ ຄຸນນະພາບ, ລັດຖະບານມີນະໂຍບາຍສັກໃຫ້ປະຊາຊົນ ຢ່າງສະເໝີພາບ ຕາມຫຼັກວິຊາການແພດ ເຊິ່ງໄດ້ມີເປົ້າໝາຍຕາມອາຍຸກະສຽນ, ຕາມສະພາບສຸຂະພາບຂອງແຕ່ລະຄົນ ແນໃສ່ຮັບປະກັນ ຄວາມປອດໄພຂອງປະຊາຊົນ, ຮຽກຮ້ອງມາຍັງພະນັກງານ, ປະຊາຊົນລາວບັນດາເຜົ່າທຸກຊັ້ນຄົນ ຕະຫຼອດຮອດຊາວຕ່າງປະເທດ ທີ່ພວມປະຕິບັດໜ້າທີ່ ຢູ່ ສປປ ລາວ ສືບຕໍ່ເພີ່ມທະວີຄວາມເປັນເຈົ້າ ການໃນການປະຕິບັດ ບັນດານະໂຍບາຍ ແລະ ມາດຕະການ ທີ່ລັດຖະບານ ກໍຄື ຄະ ນະສະເພາະກິດແຕ່ລະຂັ້ນວາງອອກ ໃນແຕ່ລະໄລຍະໃຫ້ເຂັ້ມງວດ ແລະ ໃຫ້ຖືວ່າວຽກງານດັ່ງກ່າວ ແມ່ນໜ້າທີ່ ແລະ ຄວາມຮັບຜິດຊອບຂອງໝົດທຸກຄົນ, ຮຽກຮ້ອງໃຫ້ທຸກຄົນໃນສັງຄົມ ຈົ່ງຮັບເອົາຂໍ້ມູນຂ່າວສານຢ່າງມີສະຕິ, ໃຫ້ເອົາໃຈໃສ່ຕິດຕາມຂ່າວສານ ຈາກທາງການ, ບໍ່ໃຫ້ຫຼົງເຊື່ອນຳຂ່າວລື, ຂ່າວບິດເບືອນ ທີ່ຈະສ້າງຄວາມແຕກຕື່ນວຸ້ນວາຍສັບສົນໃນສັງຄົມ ແລະ ເປັນຊ່ອງວ່າງ ສ້າງຄວາມແຕກແຍກຄວາມສາມັກຄີພາຍໃນ. ສິ່ງ​ສຳ​ຄັນ​ຖ້າ​ທຸກ​ຊັ້ນ​ຄົນ​ໃນ​ສັງ​ຄົມ​ມີ​ສະ​ຕິ​ຕື່ນ​ຕົວ​ໃນ​ການ​ປ້ອງ​ກັນ​ພະ​ຍາດ​ດັ່ງ​ກ່າວ ໂດຍ​ປະ​ຕິ​ບັດ​ມາດ​ຕະ​ການ​ທີ່​ທາງ​ຄະ​ນະ​ສະ​ເພາະ​ກິດ​ວາງ​ອອກ​ຢ່າງ​ເຂັ້ມ​ງວດ​ກໍ່​ຈະ​ສາ​ມາດ​ປ້ອງ​ກັນ​ພະ​ຍາດ​ດັ່ງ​ກ່າວ​ນີ້​ໄດ້.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ