Vientiane Times Lao
ລາວຕັ້ງ​ເປົ້າໄວ້ 2 ຫຼຽນ​ຄຳ ໃນ​ຊີ​ເກມທີ່​ປ​ະ​ເທດ​ຟິ​ລິບ​ປິນ

ລາວຕັ້ງ​ເປົ້າໄວ້ 2 ຫຼຽນ​ຄຳ ໃນ​ຊີ​ເກມທີ່​ປ​ະ​ເທດ​ຟິ​ລິບ​ປິນ

ສ​ປ​ປ ລາວ ພ້ອມ​ສົ່ງ​ຄະ​ນະ​ນຳ​, ກຳ​ມະ​ການ​ຕັດ​ສິນ, ຄູ​ຝຶກ ແລະ ທັບ​ນັກ​ກິ​ລາ ຈຳ​ນວນ 370 ຄົນ ພ້ອມ​ຕັ້ງ​ເປົ້າ​ໝາຍ​ຈະຄວ້າ​ 2 ຫຼຽນ​ຄຳ ຈາກກິລາ ສະນຸກເກີ ແລະ ເປຕັງ ໃນ​ງານ​ມະ​ຫາ​ກຳ​ກິ​ລາ​ຊີ​ເກມ ຄັ້ງ​ທີ XXX ທີ່​ປະ​ເທດ​ຟິ​ລິບ​ປິນ ລະ​ຫວ່າງວັນ​ທີ 30 ພະ​ຈິກ ຫາ 11 ທັນ​ວາ 2019.
ກະຊວງສຶກສາທິການ ແລະ ກິລາ ໄດ້ກຳນົດ​ເອົາ 25 ປະ​ເພດ​ກິ​ລາ​ເຂົ້າ​ຮ່ວມ​ແຂ່ງ​ຂັນ​, ໃນນັ້ນ ມີ 18 ປະ​ເພດ​ກິ​ລາ ຈຳ​ນວນ 230 ຄົນ ຈະໄດ້​ນຳ​ໃຊ້​ງົບ​ປະ​ມານ​ຂອງລັດ​ຖະ​ບານ ແລະ ອີກ 7 ປະເພດກິລາ ມີຈຳນວນ 140 ຄົນນັ້ນ ແມ່ນ ບັນ​ດາ​ສະ​ຫະ​ພັນ​ກິ​ລາ​ແຫ່ງ​ຊາດ ຮັບ​ຜິດ​ຊອບ​ກຸ້ມ​ຕົນ​ເອງ.
ພິ​ທີ​ຖະ​ແຫຼງ​ຂ່າວ​ການ​ກະ​ກຽມ​ຄວາມ​ພ້ອມ​ຂອງ​ທັບ​ນັກ​ກິ​ລາ​ລາວ ເຂົ້າ​ຮ່ວມ​ງານ​ມະ​ຫາ​ກຳ​ກິ​ລາ​ຊີ​ເກມ ຄັ້ງ​ທີ XXX ແລະ ກະ​ກຽມ​ເຂົ້າ​ຮ່ວມ​ການ​ແຂ່ງ​ຂັນ​ງານ​ມະ​ຫາ​ກຳ​ກິ​ລາ​ອາ​ຊຽນ​ພາ​ລາ​ເກມ ຄັ້ງ​ທີ X ທີ່​ປະ​ເທດ​ຟິ​ລິບ​ປິນ ໄດ້​ມີ​ຂຶ້ນ ໃນວັນສຸກ ​ທີ 15 ພະ​ຈິກ ທີ່ຜ່ານ​ມາ ທີ່​ຫ້ອງ​ການ​ຄະ​ນະ​ກຳ​ມະ​ການ​ໂອ​ແລມ​ປິກ​ແຫ່ງ​ຊາດ​ລາວ (ຄອ​ລ) ໃຫ້​ກຽດ​ເຂົ້າ​ຮ່ວມ​ເປັນ​ປະ​ທານ​ຂອງ​ທ່ານ ບົວ​ລານ ສິ​ລິ​ປັນ​ຍາ ຮອງ​ລັດ​ຖະ​ມົນ​ຕີ ກະ​ຊວງ​ສຶກ​ສາ​ທິ​ການ ແລະ ກິ​ລາ ທັງ​ເປັນ​ຮອງ​ປະ​ທານ ຄອ​ລ, ມີທ່ານ ສົມພູ ​ພົງ​ສາ ​ຮອງ​ປະ​ທານ ແລະ ເລ​ຂາ​ທິ​ການ ຄອ​ລ, ທ່ານ ແສງ​ພອນ ພົນ​ອາ​ມາດ ຫົວ​ໜ້າ​ກົມ​ກິ​ລາ​ລະ​ດັບ​ສູງ ແລະ ທ່ານ ສີ​ທາດ ​ຈັນ​ທະ​ບູ​ລີ ​ຫົວ​ໜ້າກົມກິ​ລາ​ມວນ​ຊົນ ພ້ອມ​ດ້ວຍ​​ບັນ​ດາຜູ້​ໃຫ້​ການ​ ສະ​ໜັບ​ສະ​ໜູນ, ບັນ​ດາ​ຄະ​ນະ​ນຳ, ຄູ​ຝຶກ ແລະ ນັກ​ກິ​ລາ​ລາວ ຕະ​ຫຼອດ​ສື່ມວນ​ຊົນ​ເຂົ້າ​ຮ່ວມ​ຢ່າງ​ຫຼວງ​ຫຼາຍ.
ທ່ານ ແສງ​ພອນ ໄດ້ລາຍ​ງານ​ໃຫ້​ຊາບ​ວ່າ: ປີນີ້ ໄດ້​ເປັນ​ເອກ​ກະ​ພາບ​ກັນ​ແລ້ວ ກຳ​ນົດ​ຈະ​ສົ່ງ​​ຄະ​ນະ​ນຳ​, ກຳ​ມະ​ການ​ຕັດ​ສິນ, ຄູ​ຝຶກ ແລະ ທັບ​ນັກ​ກິ​ລາ ຈາກ 25 ປະ​ເພດ​ກິ​ລາ ​ທັງ​ໝົດ 370 ຄົນເຂົ້າ​ຮ່ວມ​ແຂ່ງ​ຂັນ​ງານ​ກິ​ລາ​ຊີ​ເກມ ທີ່​ຟິ​ລິບ​ປິນ, ໃນ​ນັ້ນ ​ສະ​ເພາະໝວດ​ກິ​ລາ​ທີ່​ເຄີຍ​ມີ​ມູນ​ເຊື້ອ​ໄດ້​ຫຼຽ​ນ​ຄຳ ມາ​ແລ້ວ ແມ່ນ​​ນຳ​ໃຊ້​ງົບປະ​ມານ​ຂອງລັດ​ຖະ​ບານ ​ຈຳ​ນວນ 18 ປະ​ເພດ​ກິ​ລາ ຈາກ​ທັງ​ໝົດ 230 ຄົນ ປະ​ກອບ​ມີ​ ເປ​ຕັງ, ບິນ​ລຽດ-ສະ​ນຸກ​ເກີ, ວູ​ຊູ, ກະ​ຕໍ້, ປັນ​ຈັກ​ສີ​ລັດ, ລົດ​ຖີບ, ຍິງ​ທະ​ນູ, ຢູ​ໂດ, ມວຍສາ​ກົນ, ມວຍ​ລາວ, ມວຍ​ປ້ຳ, ລອຍ​ນ້ຳ, ແລ່ນ-ລານ, ເທ​ຄວັນ​ໂດ, ກາ​ຣາ​ເຕ​ໂດ, ຍົກ​ນ້ຳ​ໜັກ, ຄິກ​ບ໋ອກ​ຊີງ ແລະ ພິ​ເສດ​ແມ່ນ​ກິ​ລາ​ຜ່ານ​ສິ່ງ​ກີດ​ຂວາງ ເປັນ​ກິ​ລາ​ຮູບ​ແບບ​ການ​ທະ​ຫານ ເຊິ່ງ​ເຈົ້າ​ພາບ​ຮຽກ​ຮ້ອງ​ຂໍ​ຄວາມ​ຮ່ວມ​ມື​ໃຫ້​ເຂົ້າ​ຮ່ວມ​ໂດຍ​ເພີ່ມ​ຄວາມ​ຮັບ​ຜິດ ​ຊອບ​ຄ່າ​ເດີນ​ທາງ​ໄປ-​ກັບ ແລະ ທີ່​ພັກ​ອາ​ຫານ ສ່ວນ​ບັນ​ດາ​ສະ​ຫະ​ພັນ​ກິ​ລາ​ແຫ່ງ​ຊາດ ຮັບ​ຜິດ​ຊອບ​ກຸ້ມ​ຕົນ​ເອງທາງ​ດ້ານ​ງົບ​ປະ​ມານ ມີ 7 ປະ​ເພດ​ກິ​ລາ ຈາກ​ທັງ​ໝົດຈຳ​ນວນ 140 ຄົນ ມີ​ຄື ກ໋ອບ, ຣັກ​ບີ, ອີ​ສະ​ປອດ, ບານ​ເຕະ​ຊາຍ, ເທັນ​ນິດ, ຊ໋ອບ​ເທັນ​ນິດ ແລະ ໝາກ​ເສີກ ສະ​ຫະ​ພັນ​ກິ​ລາ​ແຫ່ງ​ຊາດ ຮັບ​ຜິ​ດ​ຊອບ​ຄ່າ​ໃຊ້​ຈ່າຍ​ໄລ​ຍະ​ກະ​ກຽມ ແລະ ໄລ​ຍະ​ເຂົ້າ​ຮ່ວມ​ແຂ່ງ​ຂັນ ລັດ​ຖະ​ບານ​ຊ່ວຍ​ຮັບ​ຜິດ​ຊອບ​ເງິນ​ແຮ່​ຖົງ​ບຸກ​ຄົນ ຊຸດວອມ ແລະ ຊຸດ​ສວນ​ສະ​ໜາມ ພ້ອມ​ທັງ​ຕັ້ງ​ເປົ້າ​ໝາຍ​ຈະ​ສູ້​ຊົນ​ໃຫ້​ໄດ້ 2 ຫຼຽນ​ຄຳດັ່ງກ່າວ.
​ໂອ​ກາດ​ດຽວ​ກັນ, ທ່ານ ສີ​ທາດ ກໍ່ໄດ້​ລາຍ​ງານ​ໃຫ້​ຊາບ​ວ່າ: ​ການ​ເຂົ້າ​ຮ່ວມ​ງານ​ມະ​ຫາ​ກຳ​ກິ​ລາ ອາ​ຊຽນ​ພາລາ​ເກມ ຄັ້ງ​ທີ X ທີ່​ປະ​ເທດ​ຟິ​ລິບ​ປິນ ເປັນ​ເຈົ້າ​ພາບ ໃນ​ຕົ້ນ​ປີ 2020 ຈະ​ສົ່ງຄະ​ນະນຳຄູ​ຝຶກ ແລະ ນັກ​ກິ​ລາຈຳ​ນວນ 6 ປະ​ເພດ​ກິ​ລາ ປະ​ກອບ​ມີ ແລ່ນ-ລານ, ຍົກ​ນ້ຳ​ໜັກ, ລອຍ​ນ້ຳ, ໂກນ​ບານ, ບານ​ບ້ວງ​ລໍ້​ເລື່ອນ ແລະ ກິ​ລາ​ລົດ​ຖີບ, ໃນ​ນັ້ນ ຕັ້ງ​ເປົ້າ​ຈະ​ສູ້​ຊົນ​ໃຫ້​ໄດ້ 4 ຫູຽນ​ຄຳ ຈາກ 4 ປະ​ເພດ​ກິ​ລາ ນອກ​ຈາກ​ກິ​ລາ​ບານ​ບ້ວງ​ລໍ້​ເລື່ອນ ແລະ ກິ​ລາ​ລົດ​ຖີບ.
ຫຼັງ​ຈາກພິທີຖະແຫຼງຂ່າວ ກໍ່​ໄດ້​ມີ​ພິ​ທີ​ມອບ-ຮັບ​ການ​ອຸ​ປະ​ຖຳ​​ນັກ​ກິ​ລາ​ລາວ ສຳ​ລັບ ບໍ​ລິ​ສັດ ເບຍ​ລາວ ຈຳ​ກັດ ອຸ​ປະ​ຖຳ 121 ລ້ານ​ກີບ, ບໍ​ລິ​ສັດ FBT ຈຳ​ໜ່າຍ​ເຄື່ອງ​ກິ​ລາ​ຄົບ​ວົງ​ຈອນ ສະ​ໜັບ​ສະ​ໜູນ 106 ລ້ານ​ກີບ, ບໍ​ລິ​ສັ​ດ ບໍ​ລິ​ການ​ຝຶກ​ຊ້ອມ​ກິ​ລາ​ຍິງ​ປືນ ຈຳ​ກັດ​ ຈຳ​ນວນ 5 ພັນ​ໂດ​ລາ​ສະ​ຫະ​ລັດ ແລະ ລັດ​ວິ​ສາ​ຫະ​ກິດ​ລາວ​ໂທ​ລະ​ຄົມ ຈຳ​ນວນ 10 ລ້ານ​ກີບ. ນອກ​ຈາກນີ້, ທັບ​ນັກ​ກິ​ລາ​ລາວ ທັງ​ສອງ​ງານ​ດັ່ງ​ກ່າວ ທາງ​ລັດ​ຖະ​ບານ​ແມ່ນ​ໄດ້​ກຳ​ນົດ​ໃຫ້​ນຳ​ໃຊ້​ງົບ​ປະ​ມານ​ຮັບ​ໃຊ້​ທັງ​ໝົດ 15 ຕື້​ກີບ.
ຂ່າວ: ສົງ​ການ
ພາບ: ຈອນນີ້

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ