Vientiane Times Lao
ລາວບໍ່ພໍໃຈຕໍ່ພຶດຕິກຳຂອງປະທານເປຕັງນານາຊາດ

ລາວບໍ່ພໍໃຈຕໍ່ພຶດຕິກຳຂອງປະທານເປຕັງນານາຊາດ

ກົມກິລາສາຍສູງ ກະຊວງສຶກສາ ແລະ ກິລາ ໄດ້ຊີ້ນຳສະຫະພັນເປຕັງແຫ່ງ ຊາດລາວ ໃນຕອນເຊົ້າວັນທີ 26 ພະຈິກ 2019 ໃຫ້ຂຽນຈົດໝາຍໄປຍັງ ສະຖານທູດຝຣັ່ງປະຈຳລາວ ພາຍຫຼັງທີ່ປະທານສະຫະພັນເປຕັງ ນານາຊາດ Claude Azema ສັນຊາດຝຣັ່ງ ໄດ້ວາງຂັນຂອງທີມຊາດລາວລົງພື້ນໃນເວລາ ມອບລາງວັນ ຢູ່ໃນງານມອບຮັບລາງວັນຈາກການແຂ່ງຂັນກິລາເປຕັງຊີງແຊ້ມ ໂລກຄັ້ງທີ 17 ທີ່ປະເທດ ກຳປູເຈຍ ໃນວັນທີ 24 ທີ່ຜ່ານມາ.

ຈາກເຫດການດັ່ງກ່າວ ໄດ້ສ້າງຄວາມບໍ່ພໍໃຈຫຼາຍ ໃຫ້ກັບບັນດາແຟນໆ ແລະ ກອງເຊຍຊາວລາວ ພາຍຫຼັງທີ່ໄດ້ເຫັນພຶດຕິກໍາດັ່ງກ່າວຢູ່ວີດີໂອຄລິບທີ່ເຜີຍແຜ່ ຜ່ານສື່ສັງຄົມອອນລາຍ.

ປະຈຸບັນສື່ທາງການຈາກຫຼາຍພາກສ່ວນກຳລັງຕິດຕໍ່ໄປຍັງສະຫະພັນດັ່ງກ່າວ ເພື່ອຢາກຮູ້ຄວາມເປັນຈິງ ແລະ ທີ່ໄປທີ່ມາຂອງເຫດການດັ່ງກ່າວ.

ຄະນະນັກກິລາເປຕັງທີມຊາດລາວໄດ້ເຂົ້າຮ່ວມການແຂ່ງຂັນກິລາເປຕັງຊີງແຊ້ມ ໂລກ ຄັ້ງທີ 17 ທີ່ປະເທດ ກຳປູເຈຍ ໃນວັນທີ 17-24 ພະຈິກ 2019 ແລະ ສ້າງຜົນງານໄດ້ເກີນຄາດໝາຍຄື ໄດ້ຮັບລາງວັນຮອງແຊ້ມໂລກ (ອັນດັບ 2) ປະເພດ ຊຸດຕີຍິງ, ຮອງແຊ້ມໂລກ (ອັນດັບ 2) ປະເພດ ທີມຊຸດເຍົາວະຊົນ ແລະ ຮອງແຊ້ມ ໂລກ (ອັນດັບ 2) ປະເພດທີມຊຸດຍິງ.

ຂ່າວ: ສຸກນີລັນດອນ

ພາບ: ສະຖານທູດລາວປະຈຳພະນົມເປັນ

Related Articles

Leave a Reply