Vientiane Times Lao
ລາວສາມາດຢັບຢັ້ງບໍ່ໃຫ້ເກີດເຫດການຫົດຖອຍຮ້າຍແຮງຕໍ່ການຂະຫຍາຍຕົວ ຂອງເສດຖະກິດ-ສັງຄົມເຖິງແມ່ນວ່າຈະໄດ້ຮັບຜົນກະທົບຫຼາຍດ້ານ

ລາວສາມາດຢັບຢັ້ງບໍ່ໃຫ້ເກີດເຫດການຫົດຖອຍຮ້າຍແຮງຕໍ່ການຂະຫຍາຍຕົວ ຂອງເສດຖະກິດ-ສັງຄົມເຖິງແມ່ນວ່າຈະໄດ້ຮັບຜົນກະທົບຫຼາຍດ້ານ

ສປປ ລາວ ເຖິງແມ່ນວ່າຈະໄດ້ພົບຄວາມຫຍຸ້ງຍາກທາງດ້ານການເງິນ-ເງິນຕາ, ບັນຫາໜີ້ສິນ ແລະ ຜົນກະທົບຈາກການແຜ່ລະບາດຂອງພະຍາດໂຄວິດ-19 ແຕ່ຍັງສາມາດຢັບຢັ້ງບໍ່ໃຫ້ເກີດເຫດການຫົດຖອຍຮ້າຍແຮງຕໍ່ການຂະຫຍາຍຕົວຂອງເສດຖະກິດ-ສັງຄົມ ໂດຍໄດ້ເຮັດໃຫ້ຄຸນນະພາບຊີວິດຂອງປະຊາຊົນບັນດາເຜົ່າໄດ້ຮັບການປັບປຸງ ແລະ ພັດທະນາໃຫ້ດີຂຶ້ນເປັນກ້າວໆ.
ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ໄດ້ກ່າວໄຂກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນປະຕິວັດລາວ ໃນຕອນເຊົ້າວັນທີ 13 ມັງກອນ 2021 ນີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍມີເນື້ອໃນບາງຕອນທີ່ສໍາຄັນວ່າ: ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ທີ່ໄຂຂຶ້ນໃນມື້ນີ້ ແມ່ນປະຕິບັດຕາມລະບຽບພັກປະຊາຊົນປະຕິວັດລາວສະໄໝທີ X ຊຶ່ງ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ນີ້ແມ່ນເຫດການການເມືອງທີ່ສໍາຄັນ ແລະ ທັງເປັນຂີດໝາຍທາງປະຫວັດສາດໃນການເຕີບໃຫຍ່ຂະຫຍາຍຕົວດ້ານປະລິມານ ແລະ ຄຸນນະພາບຂອງພັກໃນໄລຍະໃໝ່ ຢູ່ໃນສະພາບແວດລ້ອມພາຍໃນປະເທດ ແລະ ໃນໂລກທີ່ມີຄວາມຜັນແປຢ່າງສະຫຼັບສັບຊ້ອນ ຊຶ່ງມີທັງກາລະໂອກາດ, ສິ່ງອໍານວຍ ແລະ ສິ່ງທ້າທາຍຕ່າງໆທີ່ຕ້ອງໄດ້ສືບຕໍ່ຜ່ານຜ່າໃນຕໍ່ໜ້າ. ມາຮອດປັດຈຸບັນນີ້, ລະບອບປະຊາທິປະໄຕ ປະຊາຊົນ ຢູ່ບ້ານເຮົາໄດ້ຢ່ວງຂ້າມປີທີ 45 ແລ້ວ ແລະ ການປະຕິບັດພາລະກິດປ່ຽນແປງໃໝ່ກໍ່ໄດ້ດໍາເນີນມາເປັນ 35 ປີແລ້ວ. ເມື່ອຫວນຄືນເບິ່ງການນໍາພາ-ຊີ້ນໍາຂອງສູນກາງໃນການຈັດຕັ້ງປະຕິບັດມະຕິ X ຂອງພັກຕະຫຼອດ 5 ປີທີ່ຜ່ານມາໃນທ່າມກາງສະພາບແວດລ້ອມສາກົນ ແລະ ພາກພື້ນມີຄວາມຜັນແປໄປຢ່າງໄວວາ ສັບສົນ ຄາດການຍາກ ແລະ ການແຜ່ລະບາດຢ່າງໜັກໜ່ວງຂອງພະຍາດໂຄວິດ-19 ເຊິ່ງເຕັມໄປດ້ວຍກາລະໂອກາດ ແລະ ສິ່ງທ້າທາຍນັ້ນເຫັນວ່າຂະບວນການພັດທະນາສ້າງສາປະເທດຊາດໄດ້ມີບາດກ້າວຂະຫຍາຍຕົວຕໍ່ເນື່ອງ ແລະ ມີຜົນສໍາເລັດຢ່າງຍິ່ງໃຫຍ່ຫຼາຍດ້ານ ຮັບປະກັນໃຫ້ປະເທດຊາດສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ຄວາມເປັນເອກະລາດ, ອໍານາດອະທິປະໄຕ ແລະ ໝາກຜົນຂອງການປະຕິວັດໄດ້ຮັບການປົກປ້ອງຢ່າງເຂັ້ມແຂງເຖິງວ່າໄດ້ຮັບຄວາມຫຍຸ້ງຍາກທາງດ້ານການເງິນ-ເງິນຕາ, ບັນຫາໜີ້ສິນ ແລະ ຜົນກະທົບຈາກການແຜ່ລະບາດຂອງພະຍາດໂຄວິດ-19 ແຕ່ພວກເຮົາຍັງສາມາດຢັບຢັ້ງບໍ່ໃຫ້ເກີດເຫດການຫົດຖອຍຮ້າຍແຮງຕໍ່ການຂະຫຍາຍຕົວຂອງ ເສດຖະກິດ-ສັງຄົມ, ຄຸນນະພາບຊີວິດຂອງປະຊາຊົນບັນດາເຜົ່າໄດ້ຮັບການປັບປຸງ ແລະ ພັດທະນາໃຫ້ດີຂຶ້ນເປັນກ້າວໆ.
ສະຫາຍ ບຸນຍັງ ວໍລະຈິດ ໄດ້ກ່າວຕື່ມວ່າ: ໜ້າທີ່ສໍາຄັນອັນໜຶ່ງອີກ ກອງປະຊຸມໃຫຍ່ແມ່ນຈະໄດ້ສໍາຫຼວດຕີລາຄາການນໍາພາຂອງຄະນະບໍລິຫານງານສູນກາງພັກສະໄໝທີ X  ແລະ ດໍາເນີນການເລືອກຕັ້ງຄະນະບໍລິຫານງານສູນກາງພັກສະໄໝທີ XI ທີ່ສະແດງອອກເຖິງຄວາມສາມັກຄີ ເປັນຈິດໜຶ່ງໃຈດຽວກັນຂອງພັກ, ຮັບປະກັນລັກສະນະສືບທອດ ແລະ ເຮັດໃຫ້ຖັນແຖວການນໍາຂັ້ນສູງຂອງພັກເຮົານັບມື້ນັບໝຸ່ມແໜ້ນປ່ຽມລົ້ນໄປດ້ວຍສະຕິປັນຍາ ໂດຍຄັດເລືອກເອົາບັນດາສະຫາຍທີ່ມີມາດຕະຖານ ແລະ ເງື່ອນໄຂຄົບຖ້ວນເພື່ອຫາບແບກພາລະໜ້າທີ່ອັນໜັກໜ່ວງທີ່ພັກ ແລະ ປະເທດຊາດໄດ້ມອບໝາຍໃຫ້. ທິດທາງ ແລະ ໜ້າທີ່ທີ່ໄດ້ກ່າວມານັ້ນລ້ວນແຕ່ເປັນບັນຫາໃຫຍ່ ແລະ ສໍາຄັນທີ່ພົວພັນເຖິງຊາຕາກໍາຂອງປະເທດຊາດ ແລະ ຂອງປະຊາຊົນ.  

ຂ່າວ: ວຽງຈັນທາຍ

ພາບ: ຂປລ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ