ສອງນາຍົກ ລາວ-ກຳປູເຈຍເຫັນດີ ເປັນເອກະພາບກັນ ແລະ ຢືນຢັນວ່າ ໄລຍະທີ່ກຳລັງສືບຕໍ່ແກ້ໄຂບໍລິເວນທີ່ຍັງຄົງຄ້າງບໍ່ທັນໄດ້ປັກຫຼັກໝາຍ ຊາຍແດນຢູ່ແກ້ງຕໍມໍຄອຍ-ຫ້ວຍຕະເງົາ ນີ້ແມ່ນ ບໍ່ໃຫ້ມີກຳລັງທະຫານ ແລະ ປະຊາຊົນອາໄສ ຫຼື ດໍາເນີນກິດຈະກໍາໃດໆຢູ່ບໍລິເວນດັ່ງກ່າວ ແລະ ໃຫ້ມີການກວດກາຮ່ວມກັນ ທັງທາງບົກ, ທາງນໍ້າ ແລະ ທາງອາກາດ.
ທ່ານ ທອງລຸນ ສີສຸລິດ ນາຍົກລັດ ຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ຣາຊະອານາຈັກ ກຳປູເຈຍ ຢ່າງເປັນທາງການ ໃນລະຫວ່າງ ວັນທີ 12-13 ກັນຍາ 2019 ເພື່ອຮັດແໜ້ນສາຍພົວພັນມິດຕະພາບ, ຄວາມສາມັກຄີອັນເປັນ ມູນເຊື້ອທີ່ມີມາແຕ່ດົນນານ ແລະ ເສີມຂະຫຍາຍການຮ່ວມມື ລະຫວ່າງ ລາວ ແລະ ກຳປູເຈຍ.
ພາຍຫຼັງທີ່ມີພິທີຕ້ອນຮັບຢ່າງເປັນທາງການ ແລະ ຢ່າງອົບອຸ່ນ ຂອງ ສົມເດັດ ເຕໂຈ ຮຸນ ແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ, ຈາກນັ້ນທັງສອງຝ່າຍໄດ້ມີການພົບປະ ເພື່ອຮ່ວມກັນທົບ ທວນຄືນການຈັດຕັ້ງປະຕິບັດ ບັນດາເອກະສານຮ່ວມມືສອງຝ່າຍ ກໍ່ຄືການຕົກລົງ ຂອງການນຳຂັ້ນສູງສອງປະເທດ ໃນທຸກໆດ້ານ ຕະຫຼອດໄລຍະຜ່ານມາ ແລະ ວາງແຜນການຮ່ວມມືໃນຕໍ່ໜ້າ.
ການພົບກັນປະນັ້ນ, ສອງຝ່າຍໄດ້ເປັນເອກະພາບກັນ ແລະ ຢືນຢັນວ່າ ບໍລິເວນແກ້ງຕໍມໍຄອຍ-ຫ້ວຍຕະເງົ້າ ເປັນບໍລິເວນຄົງຄ້າງທີ່ຍັງບໍ່ທັນ ໄດ້ຮັບການແກ້ໄຂ, ດັ່ງນັ້ນຈຶ່ງໄດ້ເຫັນດີເປັນເອກະພາບກັນວ່າໄລຍະທີ່ ກຳລັງສືບຕໍ່ແກ້ໄຂນີ້ແມ່ນ: 1. ບໍ່ໃຫ້ມີກຳລັງທະຫານຢູ່ໃນບໍລິເວນນີ້ 2. ບໍ່ໃຫ້ມີປະຊາຊົນອາໄສຢູ່ ຫຼື ດໍາເນີນກິດຈະກໍາໃດໆຢູ່ບໍລິເວນດັ່ງກ່າວ ແລະ 3. ໃຫ້ມີການກວດກາຮ່ວມກັນທັງທາງບົກ, ທາງນໍ້າ ແລະ ທາງ ອາກາດ. ການກວດກາຮ່ວມກັນສອງຝ່າຍແມ່ນສາມາດກວດກາໂດຍການໃຊ້ກຳລັງຄົນ ຫຼື ການໃຊ້ເຮືອບິນບໍ່ມີຄົນຂັບ (Drone).
ສອງຝ່າຍເຫັນດີໃຫ້ຮັກສາສະຖານະພາບເດີມບໍລິເວນຊາຍແດນ ທີ່ຍັງຄົງຄ້າງ ໂດຍປາສະຈາກສິ່ງປຸກສ້າງຕ່າງໆທີ່ພາໃຫ້ມີການປ່ຽນ ແປງສະພາບບໍລິເວນດັ່ງກ່າວຈົນກວ່າສອງຝ່າຍຈະສຳເລັດການສຳ ຫຼວດ ແລະ ປັກຫຼັກໝາຍຊາຍແດນໃຫ້ສຳເລັດ; ສອງຝ່າຍເຫັນດີ ຕົກລົງກັນຮ່າງສົນທິສັນຍາ ວ່າດ້ວຍການກຳນົດເສັ້ນຊາຍແດນ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ກັບ ຣາຊະອານາຈັກ ກຳປູເຈຍ ໃນບໍລິເວນທີ່ທັງສອງຝ່າຍໄດ້ສໍາຫຼວດ ແລະ ໄດ້ຕົກລົງເອກະພາບກັນ ແລ້ວໃນ 86% ຂອງແລວເຂດຊາຍແດນ ລະຫວ່າງ ສອງປະເທດ ເພື່ອດໍາເນີນການປັກຫຼັກໝາຍຊາຍ ແດນໃຫ້ສຳເລັດໂດຍໄວ.
ພາຍຫຼັງສຳເລັດສົນທິສັນຍາແລ້ວ ສອງຝ່າຍເປັນເອກະພາບກັນດຳເນີນ ການປັກຫຼັກໝາຍໃຫ້ຖີ່ຂຶ້ນ ແລະ ຍົກລະດັບຫຼັກໝາຍຊາຍແດນທີ່ມີຢູ່ ແລ້ວນັ້ນໃຫ້ໄດ້ມາດຕະຖານ ແລະ ມີຄວາມແຂງແກ່ນຕື່ມ. ສໍາລັບບໍລິເວນຊາຍແດນທີ່ຄົງຄ້າງມິດຕະພາບ ທັງສອງຝ່າຍເຫັນ ດີຈະສືບ ຕໍ່ປຶກສາຫາລື ເພື່ອຊອກຊ່ອງທາງ ແກ້ໄຂຮ່ວມກັນຕໍ່ໄປໃຫ້ສໍາເລັດໂດຍ ສົມບູນ.
ນອກນີ້, ໃນການພົບປະສອງຝ່າຍ ໄດ້ຮ່ວມກັນທົບທວນຄືນການຈັດຕັ້ງປະຕິບັດ ບັນດາເອກະສານຮ່ວມ ມືສອງຝ່າຍໃນທຸກດ້ານ, ຕະຫຼອດ ຮອດການພົວພັນຮ່ວມມືໃນລະດັບ ທ້ອງຖິ່ນ, ແຂວງແຮກສ່ຽວ ກໍ່ຄື ການຮ່ວມມືໃນຂອບພາກພື້ນ ແລະ ອານຸພາກພື້ນ.
ສອງຝ່າຍໄດ້ແລກປ່ຽນຄໍາຄິດຄໍາເຫັນແບບກົງໄປກົງມາ, ຈິງໃຈ ແລະ ເປັນ ເອກະພາບກັນສູງ ໂດຍສອງນາຍົກ ລັດຖະມົນຕີ ໄດ້ຊີ້ນຳບັນດາຂະແໜງ ການທີ່ກ່ຽວຂ້ອງ ຈົ່ງເອົາໃຈໃສ່ ຮ່ວມກັນຈັດຕັ້ງປະຕິບັດບັນດາຂໍ້ຕົກລົງ ທີ່ສອງຝ່າຍໄດ້ມີຮ່ວມກັນ ກໍ່ຄື ການຕົກລົງຂັ້ນສູງຂອງການນຳສອງ ປະເທດ ໃຫ້ປາກົດຜົນເປັນຈິງ, ແກ້ໄຂບັນຫາການກຳນົດຊາຍແດນທີ່ຍັງຄົງຄ້າງໃຫ້ສຳເລັດຢ່າງສົມບູນໂດຍ ໄວ ແລະ ສືບຕໍ່ຮັກສາກົນໄກການ ພົບປະ ແລະ ປະສານງານກັນໃນ ແຕ່ລະລະດັບ ເພື່ອຊຸກຍູ້ໃຫ້ການ ຮ່ວມມືໃນແຕ່ລະດ້ານໄດ້ຮັບການຈັດຕັ້ງປະຕິບັດຢ່າງມີປະສິດຕິພາບ.
ໃນໂອກາດຢ້ຽມຢາມຄັ້ງນີ້, ສອງນາ ຍົກລັດຖະມົນຕີໄດ້ຮ່ວມກັນລົງນາມ ແລະ ເປັນສັກຂີພິຍານໃນການລົງ ນາມເອກະສານຮ່ວມມືສອງຝ່າຍ ຈຳນວນ 06 ສະບັບ ຄື: ຖະແຫຼງການຮ່ວມ ລະຫວ່າງ ນາຍົກລັດຖະມົນຕີ ແຫ່ງ ສປປ ລາວ ກັບ ນາຍົກລັດຖະມົນຕີ ແຫ່ງ ຣາຊະອານາຈັກກໍາປູເຈຍ; ສັນຍາວ່າດ້ວຍການຮ່ວມມືຂະແໜງ ພະລັງງານໄຟຟ້າ (ປັບປຸງປ່ຽນແທນ ສະບັບທີ່ໄດ້ລົງນາມໃນປີ 1999); ສັນຍາຊື້ຂາຍສະໜອງໄຟຟ້າ 500 MW ແບບລະບົບສູ່ລະບົບ ລະຫວ່າງ ລັດວິສາຫະກິດໄຟຟ້າລາວ ແລະ ລັດວິສາຫະກິດໄຟຟ້າກຳປູເຈຍ; ສັນຍາຊື້ຂາຍໄຟຟ້າໂຄງການໄຟຟ້າ ຖ່ານຫີນກະລຶມ ເພື່ອຂາຍໄຟຟ້າໃຫ້ ກັບລັດວິສາຫະກິດໄຟຟ້າກຳປູເຈຍ; ສັນຍາຊື້ຂາຍໄຟຟ້າໂຄງການໄຟຟ້າ ຖ່ານຫີນລະມານເພື່ອຂາຍໄຟ ຟ້າໃຫ້ກັບລັດວິສາຫະກິດໄຟຟ້າກຳ ປູເຈຍ ແລະ ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານແຮງງານ.
ພາຍຫຼັງສຳເລັດການພົບປະທາງການ ແລະ ພິທີລົງນາມ ສອງນາຍົກລັດຖະ ມົນຕີໄດ້ຖະແຫຼງຂ່າວຮ່ວມ ຊຶ່ງທັງ ສອງຝ່າຍໄດ້ຢືນຢັນຄືນເຖິງຄວາມມຸ່ງໝັ້ນ ໃນການສືບຕໍ່ເສີມຂະຫຍາຍ ສາຍພົວພັນມິດຕະພາບ, ຄວາມສາມັກຄີຊ່ວຍເຫລືອຊຶ່ງກັນ ແລະ ກັນຖານບ້ານໃກ້ເຮືອນຄຽງ ບ້ານພີ່ເມືອງນ້ອງ ບ້ານແກ່ວ ເມືອງດອງ ທີ່ເປັນມູນເຊື້ອ ອັນດີງາມມາແຕ່ດົນນານ ລະຫວ່າງສອງປະເທດ ກໍຄືສອງລັດຖະບານ ໃຫ້ນັບມື້ ແໜ້ນແຟ້ນຍິ່ງໆຂຶ້ນ ບົນພື້ນຖານເຄົາລົບອະທິປະໄຕ, ຄວາມສະເໝີພາບ, ຕ່າງຝ່າຍຕ່າງ ມີຜົນປະໂຫຍດຮ່ວມກັນ.
ພິເສດໃນໂອກາດການຢ້ຽມຢາມຄັ້ງນີ້ ສອງຝ່າຍຍັງໄດ້ຕົກລົງຍົກລະດັບການພົວພັນສອງຝ່າຍ ລະຫວ່າງ ສປປ ລາວ ແລະ ຣາຊະອານາຈັກ ກໍາປູເຈຍ ຂຶ້ນເປັນຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ; ສອງຝ່າຍເຫັນດີໃຫ້ບັນດາກະຊວງ ແລະ ຂະແໜງການກ່ຽວຂ້ອງ ສືບຕໍ່ຈັດຕັ້ງປະຕິບັດຕາມເນື້ອໃນສັນຍາ, ຂໍ້ຕົກລົງຕ່າງໆ ທີ່ສອງຝ່າຍໄດ້ເຊັນກັນ ກໍ່ຄືການຕົກລົງຂອງການນຳຂັ້ນສູງ ສອງປະເທດ ໃຫ້ນັບມື້ແຕກດອກ ອອກຜົນຫຼາຍຂຶ້ນ ໂດຍຜ່ານກົນໄກ ການຮ່ວມມືສອງຝ່າຍຄື: ຄະນະກໍາມະການຮ່ວມມືວ່າດ້ວຍ ການຮ່ວມມືສອງຝ່າຍ ລາວ-ກໍາປູເຈຍ (JC), ກໍ່ຄືກົນໄກຮ່ວມມືອື່ນໆ.
ຂ່າວ: ວຽງຈັນທາຍ
ພາບ: ກົມຂ່າວ ກະຊວງການຕ່າງປະເທດ
