ກະຊວງກະສິກໍາ ແລະ ປ່າໄມ້ ຮ່ວມກັບອົງການອາຫານ ແລະ ການກະເສດ ກຽມຈັດງານສະເຫຼີມສະຫຼອງວັນອາຫານໂລກ ຄົບຮອບ 41 ປີ ພາຍໃຕ້ຄໍາຂວັນ “ການກະທຳຂອງພວກເຮົາຄືອະນາຄົດຂອງພວກເຮົາ: ການຜະລິດທີ່ດີກ່ວາ, ໂພຊະນາການທີ່ດີກ່ວາ, ສະພາບແວດລ້ອມທີ່ດີກ່ວາ ແລະ ຊີວິດທີ່ດີກ່ວາເກົ່າ” ແລະ ສະເຫຼີມສະຫຼອງວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກ ຄົບຮອບ 29 ປີ ພາຍໃຕ້ຄໍາຂວັນ “ສ້າງອະນາຄົດຮ່ວມກັນ: ຢຸດຕິຄວາມທຸກຍາກທີ່ຊຳເຮື້ອ ດ້ວຍການເຄົາລົບທຸກຄົນ ແລະ ຜືນແຜ່ນດິນຂອງພວກເຮົາ”, ຊຶ່ງພິທີສະເຫຼີມສະຫຼອງໃນຄັ້ງນີ້ ຈະໄດ້ຈັດຂຶ້ນໃນວັນທີ 25 ຕຸລາ 2021ນີ້ ທີ່ກະຊວງກະສິກໍາ ແລະ ປ່າໄມ້ ໂດຍການນໍາໃຊ້ລະບົບອອນລາຍ, ໂດຍຈະມີຜູ້ເຂົ້າຮ່ວມຈາກບັນດາກະຊວງ, ອົງການທຽບເທົ່າແຕ່ສູນກາງຮອດທ້ອງຖິ່ນ, ທູດ ແລະ ຕາງໜ້າອົງການຈັດຕັ້ງສາກົນ ຢູ່ ສປປ ລາວ.
ທ່ານ ເພັດ ພົມພິພັກ ລັດຖະມົນຕີ ກະຊວງກະສິກຳ ແລະ ປ່າໄມ້ ໄດ້ຖະແຫຼງຕໍ່ສື່ມວນຊົນ ເມື່ອວັນທີ 13 ຕຸລາ 2021ຜ່ານມານີ້ ທີ່ນະຄອນຫຼວງວຽງຈັນ ວ່າ: ການສະເຫຼີມສະຫຼອງ 2 ວັນດັ່ງກ່າວ ແມ່ນມີຄວາມໝາຍຄວາມສຳຄັນທີ່ສຸດ ໂດຍແນໃສ່ປູກຈິດສຳນຶກ ແລະ ສ້າງຄວາມຮັບຮູ້ ໃຫ້ປະຊາຊາດໃນທົ່ວໂລກ ໄດ້ເຂົ້າໃຈເຖິງບັນຫາສິ່ງທ້າທາຍຕ່າງໆ ຈາກການປ່ຽນແປງຂອງດິນຟ້າອາກາດ ແລະ ຍັງເປັນການແຈ້ງເຕືອນ ປຸກລະດົມກໍາລັງແຮງທົ່ວສັງຄົມລາວ ແລະ ປະຊາຄົມໂລກ ເພື່ອເຝົ້າລະວັງ, ປ້ອງກັນຜົນເສຍຫາຍ ທີ່ອາດເກີດຂຶ້ນ ແລະ ຮ່ວມກັນແກ້ໄຂຜົນຮ້າຍຂອງໄພພິບັດ ໃຫ້ກັບສູ່ສະພາບປົກກະຕິໂດຍໄວ.
ປະຈຸບັນນີ້, ບັນຫາຄວາມທຸກຍາກ ແມ່ນເກີດຂຶ້ນຈາກຫຼາຍປັດໄຈ ທີ່ພາໃຫ້ປະຊາກອນ ພົບກັບຄວາມຫຍຸ້ງຍາກ ຊຶ່ງໃນນັ້ນກໍ່ປະກອບດ້ວຍສະພາບການປ່ຽນແປງທາງດ້ານດິນຟ້າອາກາດຂອງໂລກ ພາໃຫ້ເກີດໄພພິບັດທາງທໍາມະຊາດ, ການລະບາດຂອງພະຍາດ, ຄວາມວຸ້ນວາຍທາງສັງຄົມ, ເສິກສົງຄາມ, ການລະບາດຂອງເຊື້ອພະຍາດໂຄວິດ-19 ທີ່ກໍາລັງຄຸກຄາມ.
ຂໍ້ມູນຂ່າວ: ເສດຖະກິດ-ການຄ້າ
