ສະຫະພັນກິລາດອກປີກໄກ່ແຫ່ງຊາດລາວ ຈະສົ່ງນັກກິລາທີມຊາດດອກປີກໄກ່ ຈຳນວນ 26 ຄົນ ປະກອບມີ ຮຸ່ນທົ່ວໄປ 13 ຄົນ (ຍິງ 2 ຄົນ) ແລະ ຮຸ່ນເຍົາວະຊົນຊາຍ 13 ຄົນ ເຂົ້າຮ່ວມແຂ່ງຂັນ 4 ລາຍການໃຫຍ່ ທີ່ຕ່າງປະເຫດ ເປັນຕົ້ນ: ງານມະຫະກຳກິລາຊີເກມຄັ້ງທີ 31 ທີ່ສສ ຫວຽດນາມ ຈະຈັດຂຶ້ນໃນເດືອນພຶດສະພາ 2022, ງານມະຫະກຳກິລາມະຫາວິທະຍາໄລອາຊຽນທີ່ປະເທດໄທ ຈະຈັດຂຶ້ນໃນເດືອນກໍລະກົດ 2022, ງານມະຫະກຳກິລາເອຊຽນເກມ ທີ່ ສປ ຈີນ ຈະຈັດຂຶ້ນໃນເດືອນກັນຍາ 2022 ແລະ ງານແຂ່ງຂັນກິລາດອກປີກໄກ່ ຮຸ່ນເຍົາວະຊົນອາຊີ ທີ່ ສປ ຈີນ ຈະຈັດຂຶ້ນໃນເດືອນທັນວາ 2022.
ສໍາລັບ ມາດຖານໃນການຄັດເລືອກນັກກິລາຈໍານວນດັ່ງກ່າວ ແມ່ນເນັ້ນໃສ່ການທົດສອບສະມັດຖະພາບຮ່າງກາຍນັກກິລາຕາມມາດຕະຖານ ເຊັ່ນ: ການທົດສອບຄວາມໄວ ສະປີດ 5 ແມັດ, ຄວາມໄວ ສະປີດ 10 ແມັດ, ຄວາມຄ່ອງຕົວ, ພະລະກຳລັງຂອງກ້າມເນື້ອ, ສະມັດຖະພາບແບບ Anaerobic ແລະ ສະມັດຖະພາບ Aerobic ພ້ອມທັງທົດສອບເທັກນິກການແຂ່ງຂັນ ປະເພດດ່ຽວ ແລະ ປະເພດທີມຄູ່, ຊຶ່ງການຄັດເລືອກນັກກິລາດັ່ງກ່າວນີ້ ແມ່ນໄດ້ຈັດຂຶ້ນ ເມື່ອບໍ່ດົນມານີ້ ທີ່ສະໜາມກິລາເຈົ້າອານຸວົງ ແລະ ສະໂມສອນກິລາໃນຮົ່ມ ເສດຖາ (ບ້ານບຶງຂະຫຍອງ)
ໂດຍການເຂົ້າຮ່ວມຂອງທ່ານ ວຽງສະຫວັນ ແສງຈັນ ຮອງປະທານສະຫະພັນດອກປີກໄກ່ແຫ່ງຊາດລາວ ແລະ ທ່ານ ປອ. ໄຊບັນດິດ ຣາຊະພົນ ເລຂາທິການ ສະຫະພັນດອກປີກໄກ່ແຫ່ງຊາດລາວ ພ້ອມດ້ວຍພາກສ່ວນທີ່ກ່ຽວຂ້ອງ.
ຂ່າວ ໂດຍ ສົງການ ພັນແພງດີ
