Visit BigblueAgency
ລາວ ຍາດໄດ້ 11 ຫຼຽນ ໃນງານກິລາມະຫາວິທະຍາໄລອາຊຽນ ຄັ້ງທີ XXI ທີ່ປະເທດອິນໂດເນເຊຍ

ລາວ ຍາດໄດ້ 11 ຫຼຽນ ໃນງານກິລາມະຫາວິທະຍາໄລອາຊຽນ ຄັ້ງທີ XXI ທີ່ປະເທດອິນໂດເນເຊຍ

ງານມະຫາກຳກິລາມະຫາວິທະຍາໄລອາຊຽນ ຄັ້ງທີ XXI ປີ 2024 ທີ່ປະເທດອິນໂດເນເຊຍ ໄດ້ປິດລົງເປັນທີ່ຮຽບຮ້ອຍແລ້ວ ໃນວັນທີ 6 ກໍລະກົດ 2024 ພາຍຫຼັງ ໄດ້ນໍາເນີນມາແຕ່ວັນທີ 25 ມິຖຸນາ 2024 ເປັນຕົ້ນມາ, ຊຶ່ງງານກິລາຄັ້ງນີ້ ຄະນະນັກກິລາລາວ ສາມາດຍາດມາໄດ້ 3 ຫຼຽນຄໍາ, 2 ຫຼຽນເງິນ ແລະ 6 ຫຼຽນທອງ ລວມ 11 ຫຼຽນ ຈັດຢູ່ອັນດັບທີ 7 ຈາກທັງໝົດ 11 ປະເທດທີ່ເຂົ້າຮ່ວມແຂ່ງຂັນ.

ສ່ວນ ເຈົ້າພາບ ອິນ​ໂດ​ເນ​ເຊຍ ຄອງເຈົ້າຫຼຽນຄຳຢ່າງຍິ່ງໃຫຍ່ ສາມາດຍາດໄດ້ 126 ຫຼຽນຄໍາ, 99 ຫຼຽນເງິນ ແລະ 71 ຫຼຽນທອງ ແລະ ອັນດັບ 2 ຕົກເປັນຂອງປະເທດໄທ ຍາດໄດ້ 53 ຫຼຽນຄຳ, 49 ຫຼຽນເງິນ ແລະ 29 ຫຼຽນທອງ. 

ງານມະຫາກໍາກິລາມະຫາວິທະຍາໄລອາຊຽນ ຄັ້ງທີ XXI ນີ້ ແມ່ນມີການແຂ່ງຂັນທັງໝົດ 21 ປະເພດກິລາ ປະກອບມີ ຍິງທະນູ, ແລ່ນ-ລານ, ດອກປີກໄກ່, ບານບ້ວງ, ບານບ້ວງ 3×3, ບານສົ່ງຫາດຊາຍ, ບຣິດ (ເກມໄພ້), ໝາກເສິກ, ຟຸດຊໍ, ບານມື, ຢູໂດ, ຄາຣາເຕ, ເປຕັງ, ປັນຈັກຊີລັດ, ກະຕໍ້, ປີນພູ, ລອຍນໍ້າ, ເທຄວັນໂດ, ເທັນນິດ, ບານສົ່ງ ແລະ ກິລາວູຊູ.

ສ່ວນ ສປປ ລາວ ສົ່ງນັກກີລາເຂົ້າຮ່ວມ ຈໍານວນ 41 ຄົນ ໃນ 4 ປະເພດກີລາ ຄື: ກິລາແລ່ນ-ລານ, ເປຕັງ, ປັນຈັກສີລັດ ແລະ ບານບ້ວງ 3X3 ແລະ ສາມາດຍາດໄດ້ 11 ຫຼຽນ ປະກອບມີ 3 ຫຼຽນຄໍາ ຈາກກິລາເປຕັງ ລາຍການຊຸດຕິງຊາຍ, ຄູ່ຊາຍ ແລະ ຄູ່ປະສົມ (ຊາຍ 1 ຍິງ 1). 2 ຫຼຽນເງິນ ຈາກກິລາເປຕັງ ລາຍການທີມຊຸດຍິງ ແລະ ຄູ່ຍິງ ແລະ 6 ຫຼຽນທອງຈາກກິລາເປຕັງ ລາຍການດ່ຽວຍິງ, ດ່ຽວຊາຍ, ທີມປະສົມ (ຊາຍ 1 ຍິງ 2 ແລະ ຊາຍ 2 ຍິງ 1), ກິລາແລ່ນ-ລານ ລາຍການເຕັ້ນຍາວ ແລະ ປັນຈັກຊີລັດ ລາຍການຕໍ່ສູ້ຊາຍ 65 ກິໂລ.

ສໍາລັບ ງານມະຫະກຳກິລາຊີເກມ ຄັ້ງທີ XXII ໃນປີ 2026 ແມ່ນຮັບກຽດເປັນເຈົ້າພາບຂອງປະເທດມາເລເຊຍ.

ແຫຼ່ງຂ່າວ: ສຶກສາ, ວິທະຍາສາດ ແລະ ກິລາ ອອນລາຍ

Related Articles

Leave a Reply