Vientiane Times Lao
ລາວ ຕີລາຄາສູງຕໍ່ ຄະນະກຳມະການອາຊຽນ ເພື່ອການປົກປ້ອງສິດທິແມ່ຍິງ ແລະ ເດັກນ້ອຍ

ລາວ ຕີລາຄາສູງຕໍ່ ຄະນະກຳມະການອາຊຽນ ເພື່ອການປົກປ້ອງສິດທິແມ່ຍິງ ແລະ ເດັກນ້ອຍ

ການນຳກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍ ເຈົ້າຫນ້າທີອາວຸໂສປະຊາຄົມວັດທະນະທຳ-ສັງຄົມອາຊຽນ ສປປ ລາວ ໄດ້ ຕີລາຄາສູງຕໍ່ການສ້າງຕັ້ງຄະນະກຳມະການອາຊຽນ ເພື່ອສົ່ງເສີມ ແລະ ປົກປ້ອງສິດທິແມ່ຍິງ ແລະ ເດັກນ້ອຍ, ຊຶ່ງລັດຖະບານ ສປປ ລາວ ໄດ້ຈັດຕັ້ງປະຕິບັດຫຼາຍກິດຈະກຳເພື່ອປູກ ຈິດສຳນຶກໃຫ້ແກ່ປະຊາຊົນໃນການປົກປ້ອງ ສິດທິເດັກ, ຕ້ານການຄ້າມະນຸດ ແລະ ກົດຂີ່ຂູດຮີດ.

ຄະນະຜູ້ແທນລາວນຳໂດຍ ທ່ານ ສະຫວັນຄອນ ຣາຊມຸນຕີ, ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍ ເຈົ້າຫນ້າທີອາວຸໂສປະຊາຄົມວັດທະນະທຳ-ສັງຄົມອາຊຽນ ສປປ ລາວ ແລະ ວິຊາການທີ່ກ່ຽວຂ້ອງໄດ້ເຂົ້າຮ່ວມກອງປະຊຸມລັດຖະມົນຕີສະພາປະຊາຄົມວັດທະນະທຳ-ສັງຄົມອາຊຽນ ຄັ້ງທີ 22 ແລະ ບັນດາກອງປະຊຸມປີ່ນອ້ອມ ໃນວັນທີ 02 ພະຈິກ 2019 ທີ່ ບາງກອກ, ປະເທດໄທ.

ກອງປະຊຸມໃນຄັ້ງນີ້ ແມ່ນການເປັນປະທານອາຊຽນ ປີ 2019 ຂອງປະເທດໄທ ພາຍໃຕ້ຫົວຂໍ້: ຮ່ວມມື ຮ່ວມໃຈ ກ້າວໜ້າເພື່ອຄວາມຍືນຍົງ (Advancing Partnership for Sustainability), ໂດຍມີບັນດາທ່ານລັດຖະມົນຕີ, ຮອງລັດຖະມົນຕີ, ເຈົ້າຫນ້າທີອາວຸໂສ ແລະ ບັນດາຜູ້ແທນຈາກກະຊວງຮັບຜິດຊອບປະຊາຄົມວັດທະນະທຳ-ສັງຄົມອາຊຽນຈາກບັນດາປະເທດສະມາຊິກອາຊຽນ ແລະ ທ່ານຮອງເລຂາທິການໃຫຍ່ອາຊຽນ ເຂົ້າຮ່ວມກອງປະຊຸມດັ່ງກ່າວ ຊຶ່ງຈັດຂຶ້ນໃນໄລຍະດຽວກັນກັບ ກອງປະຊຸມສຸດຍອດຜູ້ນຳອາຊຽນ ຄັ້ງທີ 35.

ທ່ານ ສະຫວັນຄອນ ໄດ້ກ່າວວ່າ : ສປປ ລາວ ເຫັນດີ ແລະ ສະແດງຄວາມຊົມເຊີຍຕໍ່ປະເທດໄທໃນການເປັນປະທານອາຊຽນ ປີ 2019 ພາຍໃຕ້ຫົວຂໍ້: ຮ່ວມມື ຮ່ວມໃຈ ກ້າວໜ້າເພື່ອຄວາມຍືນຍົງ. ຊຶ່ງໃນນັ້ນ, ມີບັນດາເອກະສານທີ່ສໍາຄັນ ທີ່ຈະສະເໜີໃຫ້ຜູ້ນໍາອາຊຽນພິຈາລະນາຮັບຮອງ ແລະ ຮັບຊາບ ທີ່ ກອງປະຊຸມສຸດຍອດອາຊຽນ ຄັ້ງທີ 35.

ທ່ານຍັງໄດ້ກ່າວຕື່ມອີກວ່າ : ສປປ ລາວ ຍາມໃດກໍ່ເອົາໃຈໃສ່ປະຕິບັດຕາມຍຸດທະສາດ ແລະ ທິດທາງຂອງອາຊຽນ. ໂດຍສະເພາະ, ພັນທະ ແລະ ໜ້າທີ່ ໃນການເຮັດວຽກກັບບັນດາປະເທດສະມາຊິກອາຊຽນຮ່ວມກັນຢ່າງໃກ້ຊິດ, ປະເທດຄູ່ຮ່ວມເຈລະຈາ ແລະ ຄູ່ຮ່ວມພັດທະນາອາຊຽນ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດວັດທະນະທໍາ-ສັງຄົມອາຊຽນ 2025.

ໜຶ່ງໃນນັ້ນ, ສປປ ລາວ ຕີລາຄາສູງ ຕໍ່ການສ້າງຕັ້ງຄະນະກຳມະການອາຊຽນ ເພື່ອສົ່ງເສີມ ແລະ ປົກປ້ອງສິດທິແມ່ຍິງ ແລະ ເດັກນ້ອຍ ຊຶ່ງລັດຖະບານ ສປປ ລາວ ໄດ້ຈັດຕັ້ງປະຕິບັດກິດຈະກຳເພື່ອປູກຈິດສຳນຶກໃຫ້ແກ່ປະຊາຊົນກ່ຽວກັບການປົກປ້ອງ ສິດທິເດັກ, ຕ້ານການຄ້າມະນຸດ ແລະ ກົດຂີ່ຂູດຮີດ ເປັນຕົ້ນ : ການຈັດຕັ້ງກອງປະຊຸມປຶກສາຫາລືການຈັດຕັ້ງຜັນຂະຫຍາຍຂໍ້ສະເໜີແນະຂອງ ສະຫະປະຊາຊາດ ຕໍ່ບົດລາຍງານແຫ່ງຊາດປະຈຳໄລຍະທີ 3-6 ກ່ຽວກັບການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ ແລະ ບົດລາຍງານແຫ່ງຊາດ ປະຈຳໄລຍະທີ 8-9 ກ່ຽວກັບການຈັດຕັ້ງປະຕິບັດ ສົນທິສັນຍາຊີດໍ (CEDAW) ກັບບັນດາຄູ່ຮ່ວມພັດທະນາ. ກອງປະຊຸມ ຮ່ວມກັບພາກທຸລະກິດເອກະຊົນ ໃນໂອກາດວັນຄົບຮອບ 30 ປີ ແຫ່ງການຮັບຮອງເອົາສົນທິສັນຍາວ່າດ້ວຍ ສິດທິເດັກ. ຈັດຕັ້ງພິທີລົງນາມເອກະສານຄວາມໝາຍ ໝັ້ນຂອງບັນດາຮອງເຈົ້າແຂວງຕໍ່ການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກເພື່ອນຳໃຊ້ກາລະໂອກາດພັດທະນາທ່າແຮງຂອງ ເດັກລາວບັນດາເຜົ່າແຕ່ນີ້  ຮອດປີ 2030 ແລະ ການບັນລຸເປົ້າໝາຍພັດທະນາແບບຍືນຍົງ.  

ກອງປະຊຸມໄດ້ດຳເນີນພາຍໃຕ້ການເປັນປະທານຂອງ ທ່ານ ຈຸຕິ ໄກຣເຣີກ, ລັດຖະມົນຕີກະຊວງພັດທະນາສັງຄົມ ແລະ ຄວາມໝັ້ນຄົງຂອງມະນຸດ ແຫ່ງ ປະເທດໄທ. ກອງປະຊຸມໄດ້ປຶກສາຫາລືບັນຫາຕ່າງໆຢ່າງກວ້າງຂວາງ ແລະ ສ້າງສັນ ໃນນັ້ນໄດ້ພິຈາ ລະນາຮັບຮອງບັນດາເອກະສານສຳຄັນ ທີ່ຂະແໜງການກ່ຽວຂ້ອງໄດ້ຄົ້ນຄວ້າພິຈາ ລະນາຄົ້ນຄວ້າລະອຽດ ເພື່ອສະເຫນີໃຫ້ຜູ້ນຳອາຊຽນຮັບຮອງ ແລະ ຮັບຊາບ ທີ່ ກອງປະຊຸມສຸດຍອດຜູ້ນຳອາຊຽນ ຄັ້ງທີ 35 ໃນຕອນບ່າຍຂອງວັນດຽວກັນ ແລະ ໄດ້ຮັບຮອງເອົາ 5 ຖະແຫຼງການຮ່ວມອາຊຽນ ຄື: ຖະແຫຼງການຮ່ວມອາຊຽນ ທີ່ຈະສະເໜີ ຕໍ່ກອງປະຊຸມລັດພາຄີ ຕໍ່ສົນທິສັນຍາ ສະຫະປະຊາຊາດ ດ້ານການປ່ຽນແປງດິນຟ້າອາກາດຄັ້ງທີ 25 (Asean Joint Statement on Climate Change to the 25th Conference of the Parties (COP-25) to the United Nations Framework Convention on Climate Change (UNFCCC)); ຖະແຫຼງການອາຊຽນ ວ່າດ້ວຍການປົກປ້ອງເດັກຈາກທຸກຮູບແບບ ໃນການລ່ວງລະເມີດ ແລະ ຂູດຮີດທາງເພດ ໂດຍຜ່ານສື່ອອນລາຍ (Declaration on the Protection of Children against All Forms of Online Exploitation and Abuse in Asean); ຖະແຫຼງການອາຊຽນວ່າດ້ວຍ ສິດທິເດັກໃນການເຄື່ອນຍ້າຍຖິ່ນຖານ Asean Declaration on the Rights of Children in the Context of Migration; ຖະແຫຼງການບາງກອກ ວ່າດ້ວຍການໃຫ້ຜູ້ຮ່ວມພັດທະນາຊຸກຍູ້ການສຶກສາແບບຍືນຍົງໃນອາຊຽນ ຕາມວາລະ 2030 (Bangkok Declaration on Advancing Partnership in Education for 2030 Agenda for Sustainable Development in Asean); ຖະແຫຼງການຮ່ວມວ່າດ້ວຍການຢືນຢັນ ຄວາມໝາຍໝັ້ນໃນການກ້າວໄປສູ່ສິດທິເດັກໃນອາຊຽນ (Joint Statement on Reaffirmation of Commitment to Advancing the Rights of the Child in Asean) ແລະ ຖະແຫຼງການຜູ້ນຳອາຊຽນວ່າດ້ວຍຄວາມໝັ້ນຄົງ ແລະ ເຂັ້ມແຂງດ້ວຍຕົນເອງທາງດ້ານວັກແຊັງ (Asean Leaders’ Declaration on Asean Vaccine Security and Self-Reliance).

ກອງປະຊຸມຍັງໄດ້ ຮັບຊາບ ບົດແນະນຳ ແລະ ລະບຽບການພາກພື້ນ ໃນການຕອບສະໜອງ ຕໍ່ຄວາມຕ້ອງການຂອງເຍື່ອການຄ້າມະນຸດ ໂດຍສະເພາະ ແມ່ຍິງ ແລະ ເດັກນ້ອຍ (Regional Guidelines and Procedures to Address the Needs of Victims of Trafficking in Person, Especially Women and Children); ຖະແຫຼງການອາຊຽນ ວ່າດ້ວຍການສົ່ງເສີມການປົກຄອງທີ່ດີ ແລະ ການຍົກລະດັບພະນັກງານລັດຖະກອນ ໃນຍຸກເສດຖະກິດດິຈິຕອນ Asean Statement on Promotion of Good Governance and Acceleration of an Agile Civil Service in a Digital Economy ແລະ ແຜນປະຕິບັດງານພາກພື້ນ ເພື່ອສ້າງຄວາມເຂັ້ມແຂງ ທາງດ້ານການສຶກສາໃຫ້ແກ່ເດັກນ້ອຍ ແລະ ໄວໜຸ່ມນອກໂຮງຮຽນ (Regional Action Plan for the Implementation of the Asean Declaration on Strengthening Education for Out-of-School Children and Youth (OOSCY).

ຂ່າວ: ວຽງຈັນທາຍ

ພາບ: ກົມຂ່າວ

Related Articles

Leave a Reply