ຄະນະບໍລິຫານງານ ເຂດປົກຄອງພິເສດ ຮົງກົງ ສປ ຈີນ ນຳໂດຍ ທ່ານ ຈອນລີ ຫົວໜ້າຄະນະບໍລິຫານງານ ເຂດດັ່ງກ່າວ ພ້ອມດ້ວຍຄະນະ ລວມທັງໝົດ 10 ທ່ານ, ຄະນະນັກທຸລະກິດ ຈຳນວນ 20 ທ່ານ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ເມື່ອມໍ່ໆມານີ້ ເພື່ອພົບປະແລກປ່ຽນ ແລະ ຮ່ວມລົງນາມ MOU 12 ສະບັບ ໃນການສົ່ງເສີມການຮ່ວມມືທາງດ້ານການຄ້າ, ການລົງທຶນລະຫວ່າງ ລາວ-ຮົງກົງ.
ຄະນະປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ), ນຳໂດຍ ທ່ານ ດາວວອນ ພະຈັນທະວົງ ຮອງປະທານ ສຄອຊ, ທ່ານ ປອ ໄຊບັນດິດ ຣາຊະພົນ ຮອງປະທານ ສຄອຊ, ທ່ານ ສັງຄົມ ຈັນສຸກ ຮອງປະທານ ສຄອຊ, ທ່ານ ບຸນເລີດ ຫຼວງປະເສີດ ຮອງປະທານ ສຄອຊ, ທ່ານ ປອ ນາງ ວາລີ ເວດສະພົງ ຮອງປະທານ ສຄອຊ ພ້ອມດ້ວຍຄະນະບໍລິຫານງານ ສຄອຊ ຮ່ວມກັບ ຄະນະບໍລິຫານງານ ເຂດປົກຄອງພິເສດ ຮົງກົງ ໄດ້ຈັດກອງປະຊຸມພົບປະແລກປ່ຽນ ແລະ ຮັບປະທານອາຫານເຊົ້າ ທີ່ ໂຮງແຮມ ແລນມາກ ເມື່ອວັນທີ 29 ກໍລະກົດ 2024 ທີ່ຜ່ານມາເພື່ອຊອກຫາກາລະໂອກາດໃນການຮ່ວມມືທາງດ້ານທຸລະກິດ ແລະ ຊຸກຍູ້ສົ່ງເສີມການຮ່ວມມືທາງດ້ານການຄ້າ, ການລົງທຶນລະຫວ່າງທັງສອງຝ່າຍ.
ພາຍຫຼັງສໍາເລັດກອງປະຊຸມ, ຄະນະ ສຄອຊ ນຳໂດຍ ທ່ານ ບຸນເລີດ ຫຼວງປະເສີດ ຮອງປະທານ ສຄອຊ ໄດ້ນຳພາຄະນະສະພາພັດທະນາການຄ້າ ຮົງກົງໄປຢ້ຽມຢາມ ກະຊວງອຸດສາຫະກຳ ແລະ ການຄ້າ ໂດຍໃຫ້ການຕ້ອນຮັບຂອງ ທ່ານ ມາໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າເພື່ອແລກປ່ຽນຄຳຄິດເຫັນໃນການຊຸກຍູ້ການຮ່ວມມືທາງດ້ານ ການຄ້າໃຫ້ສາມາດຮ່ວມມື ແລະ ສົ່ງເສີມພັດທະນາ ພື້ນຖານໂຄງລ່າງໃນຂະແໜງການຕ່າງໆ ໃຫ້ໄດ້ຮັບຜົນປະໂຫຍດສູງສຸດ.
ໃນໂອກາດການເດີນທາງມາຢ້ຽມຢາມໃນຄັ້ງນີ້, ຝ່າຍ ຮົງກົງ ໄດ້ຮ່ວມລົງນາມ MOU ຈຳນວນທັງໝົດ 12 ສະບັບ, ເຊີ່ງໃນນັ້ນ ທາງ ສຄອຊ ມີຈໍານວນ 4 ສະບັບກ່ຽວກັບສະພາການຄ້າ ແລະ ອຸດສາຫະກໍາ ແຫ່ງຊາດລາວ ກັບ ສະພາຂົນສົ່ງສິນຄ້າ ຮົງກົງ; ສະພາການຄ້າ ແລະ ອຸດສາຫະກໍາ ແຫ່ງຊາດລາວ ກັບ Invest Hong Kong of the Government of the Hong Kong Special Administrative Region of the People’s Republic of China; ສະພາການຄ້າ ແລະ ອຸດສາຫະກຳ ແຫ່ງຊາດລາວ ກັບ ສະພາພັດທະນາການຄ້າ ຮົງກົງ; ສະພາການຄ້າ ແລະ ອຸດສາຫະກໍາ ນະຄອນຫຼວງວຽງຈັນ ກັບ ສະຫະພັນອຸດສາຫະກໍາ ຮົງກົງ.
ຈຸດປະສົງເພື່ອສົ່ງເສີມໃນການຊຸກຍູ້ແລກປ່ຽນ ແລະ ແນໃສ່ສົງເສີມການຮ່ວມມືໃນພາກທຸລະກິດ ລາວ-ຮົງກົງໂດຍການໃຫ້ກຽດເປັນສັກຂີພະຍານຂອງ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ ແລະ ທ່ານ ຈອນລີ ຫົວໜ້າຄະນະບໍລິຫານງານ ເຂດປົກຄອງພິເສດ ຮົງກົງ, ສປ ຈີນ.
ຫຼັງຈາກນັ້ນ, ຄະນະ ສຄອຊ ນຳໂດຍ ທ່ານ ດາວວອນ ພະຈັນທະວົງ ຮອງປະທານ ສຄອຊ ໄດ້ນຳພາຄະນະສະພາການຄ້າ ຮົງກົງ ເດີນທາງໄປຢ້ຽມຢາມ ກະຊວງແຜນການ ແລະ ການລົງທຶນໂດຍໃຫ້ການຕ້ອນຮັບຂອງທ່ານ ປອ ເພັດ ພົມພິພັກ ລັດຖະມົນຕີ ກະຊວງແຜນການ ແລະ ການລົງທຶນເພື່ອພົບປະແລກປ່ຽນ, ຂໍຄຳຄິດເຫັນກ່ຽວກັບບັນດານະໂຍບາຍຕ່າງໆ ເພື່ອຊອກຫາກາລະໂອກາດໃນການຮ່ວມມືທາງດ້ານ ການລົງທຶນ, ເພື່ອໃຫ້ມີການເຊື່ອມໂຍງພາກພື້ນ ແລະ ສາກົນ ໂດຍສະເພາະ ສະພາບຄວາມເປັນຈິງ ຂອງແຕ່ລະຝ່າຍ ແລະ ເຮັດແນວໃດເພື່ອໃຫ້ ສປປ ລາວ ແລະ ເຂດປົກຄອງພິເສດ ຮົງກົງ, ສປ ຈີນ ໄດ້ຮັບຜົນປະໂຫຍດຢ່າງສູງສຸດ.
