ທ່ານ ສອນໄຊ ສີພັນດອນ ນາຍົກລັດຖະມົນຕີ ເເຫ່ງ ສປປ ລາວ ໄດ້ກ່າວຄໍາປາໄສ ດ້ວຍຮູບເເບບບັນທຶກວິດີໂອ ເພື່ອປະກອບສ່ວນເຂົ້າໃນວຽກງານໂຄສະນາ ໃນລະດັບສາກົນ ໃຫ້ແກ່ກອງປະຊຸມສຸດຍອດວ່າດ້ວຍອະນາຄົດ (Summit of the Future Global Call) ເພື່ອເປັນການສະແດງໃຫ້ເຫັນເຖິງຄວາມມຸ່ງຫວັງ ຕໍ່ຜົນກອງປະຊຸມສຸດຍອດວ່າດ້ວຍອະນາຄົດ (Summit of the Future) ທີ່ຈະຈັດຂຶ້ນໃນ ວັນທີ 22-23 ກັນຍາ 2024, ທີ່ ນິວຢອກ ສ ອາເມລິກາ ລວມທັງ ການກໍານົດແນວທາງການຮ່ວມມືສາກົນໃນຕໍ່ໜ້າ.
ວິດີໂອດັ່ງກ່າວ, ຈະສາຍຜ່ານທາງເວັບໄຊ UN Web TV ໃນວັນທີ 12 ກັນຍາ 2024 ນີ້ ໂດຍເລີ່ມຕົ້ນດ້ວຍວິດີໂອ ຂອງ ປະທານາທີບໍດີ ເເຫ່ງ ນາມີເບຍ ແລະ ນາຍົກລັດຖະມົນຕີ ແຫ່ງ ເຢຍລະມັນ ໃນຖານະປະເທດຜູ້ປະສານງານຮ່ວມ, ເລຂາທິການໃຫຍ່ ອົງການສະຫະປະຊາຊາດ ແລະ ຈະຕິດຕາມດ້ວຍຄໍາເຫັນຂອງປະມຸກລັດ ແລະ ຫົວໜ້າລັດຖະບານ ຂອງບັນດາປະເທດສະມາຊິກ ອົງການ ສປຊ.
ໃນວິດີໂອ, ທ່ານ ສອນໄຊ ສີພັນດອນ ໄດ້ຕີລາຄາສູງຕໍ່ກອງປະຊຸມສຸດຍອດວ່າດ້ວຍອະນາຄົດທີ່ຈະມາເຖິງນີ້ ເເລະ ໄດ້ໃຫ້ຄວາມສໍາຄັນຕໍ່ສະພາບການຂອງໂລກທີ່ກໍາລັງຜະເຊີນໜ້າກັບສິ່ງທ້າທາຍຕ່າງໆ ເຊິ່ງໄດ້ຮຽກຮ້ອງໃຫ້ທຸກພາກສ່ວນເພີ່ມທະວີ ຄວາມສາມັກຄີ, ສົ່ງເສີມ ແລະ ສະໜັບສະໜູນກົນໄກການຮ່ວມມືຫຼາຍຝ່າຍ ໃຫ້ມີຄວາມເຂັ້ມແຂງ, ຍຸຕິທໍາ, ກວມລວມ ແລະ ມີປະສິດທິຜົນຂຶ້ນກວ່າເກົ່າ ໂດຍມີອົງການສະຫະປະຊາຊາດ ເປັນແກນກາງ, ເພື່ອຮັບໃຊ້ສິດຜົນປະໂຫຍດຂອງທຸກປະເທດ ແລະ ທຸກຄົນໃນທົ່ວໂລກ.
ໃນນັ້ນ, ທ່ານ ສອນໄຊ ສີພັນດອນ ໄດ້ຢໍ້າວ່າ “ຂໍ້ຕົກລົງສາກົນເພື່ອອະນາຄົດ” ຈະຕ້ອງໄດ້ລະບຸບັນດາມາດຕະການລະອຽດ ແລະ ຊັດເຈນ ກໍຄື ທິດທາງໃນອະນາຄົດ ເພື່ອປົກປັກຮັກສາສັນຕິພາບ ແລະ ຄວາມໝັ້ນຄົງສາກົນ, ແກ້ໄຂສິ່ງທ້າທາຍອັນໃຫຍ່ຫຼວງ, ບົນພື້ນຖານກົນໄກການຮ່ວມມືຫຼາຍຝ່າຍ ທີ່ສາມາດປັບໂຕເຂົ້າກັບ ສະພາບການປ່ຽນເເປງທາງດ້ານການເມືອງ, ເສດຖະກິດ ແລະ ຄວາມກ້າວໜ້າທາງດ້ານເຕັກໂນໂລຊີ ກໍຄື ຮັກສາໄດ້ຄວາມຍືນຍົງດ້ານສະພາບແວດລ້ອມ ພ້ອມທັງຮັບປະກັນຊີວິດການເປັນຢູ່ທີ່ດີຂອງຄົນຮຸ່ນໃໝ່ໃນອະນາຄົດ ລວມທັງການເລັ່ງລັດການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ໃຫ້ບັນລຸເປົ້າໝາຍຕາມ ວາລະ 2030 ຂອງ ອົງການ ສປຊ.
ພ້ອມກັນນັ້ນ, ທ່ານ ສອນໄຊ ສີພັນດອນ ໄດ້ໃຫ້ຄວາມໝາຍໝັ້ນທີ່ຈະສະໜັບສະໜູນການຈັດຕັ້ງປະຕິບັດ ຂໍ້ຕົກລົງສາກົນເພື່ອອະນາຄົດ ຢ່າງມີປະສິດທິຜົນ.
ຂ່າວ: ກຕທ
