ສປປ ລາວ ແລະ ສສ ຫວຽດນາມ ສຶບຕໍ່ເພີ່ມທະວີ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ກໍ່ຄື ປະຊາ ຊົນ ສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ.
ໃນຕອນເຊົ້າຂອງວັນທີ 10 ກັນຍາ 2024, ທ່ານ ທອງລຸນ ສີສຸລິດ, ເລຂາທິການໃຫຍ່ ພັກປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ໄດ້ເດີນທາງມາເຖິງສະ ໜາມບິນໂນ້ຍບາຍ ນະຄອນຫຼວງຮ່າໂນ້ຍ ສສ ຫວຽດນາມ, ໂດຍມີ ທ່ານ ເລືອງ ເກືອງ, ກໍາມະການກົມການເມືອງ, ຜູ້ປະຈໍາການຄະນະເລຂາທິການສູນກາງພັກ ພ້ອມດ້ວຍຄະນະຜູ້ແທນຂັ້ນສູງຂອງ ສສ ຫວຽດນາມ, ຄະນະສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສສ ຫວຽດນາມ, ບັນດາມວນຊົນຫວຽດນາມ ແລະ ນັກສຶກສາລາວທີ່ຮຽນຢູ່ ສສ ຫວຽດນາມ ໃຫ້ການຕ້ອນຮັບຢ່າງອົບອຸ່ນ ແລະ ສົມກຽດ.
ການຢ້ຽມຢາມ ສສ ຫວຽດນາມ ຄັ້ງນີ້ ແມ່ນຕອບສະໜອງຕາມຄຳເຊີນຂອງ ທ່ານ ໂຕ ເລິມ, ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ແຫ່ງ ສສ ຫວຽດນາມ, ຊຶ່ງ ທ່ານ ທອງລຸນ ສີສຸລິດ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ຈະດໍາເນີນການຢ້ຽມຢາມລັດຖະກິດ ທີ່ ສສ ຫວຽດນາມ ເປັນເວລາ 3 ວັນ ຄື: ແຕ່ວັນທີ 10-13 ກັນຍາ 2024.
ໃນໂອກາດເດີນທາງຢ້ຽມຢາມລັດຖະກິດ ທີ່ ສສ ຫວຽດນາມ ໃນຄັ້ງນີ້, ທ່ານ ທອງລຸນ ສີສຸລິດ ຈະພົບປະປຶກສາຫາລືກັບບັນດາການນໍາຂັ້ນສູງຂອງ ສສ.ຫວຽດນາມ ເປັນຕົ້ນແມ່ນ ທ່ານ ໂຕ ເລິມ, ເລຂາທິການໃຫຍ່, ປະທານປະເທດ; ທ່ານ ຟ້າມ ມິງ ຈິງ, ນາຍົກລັດຖະມົນຕີ; ທ່ານ ເຈິ່ນ ແທັງ ເມີ້ນ, ປະທານສະພາແຫ່ງຊາດ ແຫ່ງ ສສ. ຫວຽດນາມ; ຈະເຂົ້າຮ່ວມວາງພວງມາລາ ທີ່ ອະນຸສາວະລີນັກຮົບນິລະນາມ, ຢ້ຽມຊົມ ສຸສານ ປະທານ ໂຮ່ຈີມິນ; ຈະພົບປະກັບອະດີດການນໍາຫວຽດນາມ, ປະທານສູນກາງແນວໂຮມປະເທດຊາດຫວຽດນາມ ແລະ ຄະນະນໍາສະມາຄົມມິດຕະພາບ ຫວຽດນາມ-ລາວ ແລະ ພົບປະໂອ້ລົມກັບ ຕາງໜ້າອະດີດທະຫານອາສາສະໝັກ ແລະ ຊ່ຽວຊານຫວຽດນາມ, ອະດີດນັກສຶກສາຫວຽດນາມ ຢູ່ລາວ ແລະ ນັກສຶກສາລາວຮຽນ ຢູ່ຫວຽດນາມ.
ນອກຈາກນັ້ນ, ຄະນະກໍ່ໄປເຄື່ອນໄຫວຢ້ຽມຢາມນະຄອນຮາຍຟ໋ອງ (ຢ້ຽມຢາມ ໂຮງງານຜະລິດລົດ Vinfast ແລະ ທ່າເຮືອນໍ້າເລິກ ຮາຍຟ໋ອງ) ແລະ ຢ້ຽມຢາມນະຄອນໂຮ່ຈີມິນ (ຢ້ຽມຢາມທ່າເຮືອຫໍມັງກອນ ແລະ ບໍລິສັດຫຸ້ນສ່ວນປຸງແຕ່ງຊີ້ນ ແລະ ຜະລິດຕະພັນຊີ້ນໝູ).
ທີ່ມາ: ກົມການຂ່າວ ກະຊວງການຕ່າງປະເທດ
