ທ່ານ ພົງໄຊສັກ ອິນຖາລາດ ຮອງລັດຖະມົນຕີກະ ຊວງແຮງງານ ແລະ ສະຫວັດດີການ ສັງຄົມ ພ້ອມດ້ວຍຄະນະຜູ້ແທນ ສປປ ລາວ ໄດ້ເຂົ້າຮ່ວມກອງປະຊຸມລັດຖະມົນຕີແຮງງານອາຊຽນ ຄັ້ງທີ 28 ແລະ ກອງປະຊຸມກ່ຽວຂ້ອງ ລະຫວ່າງວັນທີ 28-31 ຕຸລາ 2024 ທີ່ປະເທດສິງກະໂປ ພາຍໃຕ້ຫົວຂໍ້: ການເພີ່ມທະວີຄວາມເຂັ້ມແຂງ ແລະ ການສົ່ງເສີມນະວັດຕະກໍາ.
ໃນໂອກາດເຂົ້າຮ່ວມກອງປະຊຸມ ຄັ້ງນີ້, ທ່ານ ພົງໄຊສັກ ອິນຖາລາດ ໄດ້ລາຍງານຜົນສໍາເລັດໃນການສ້າງຖະແຫຼງການວຽງຈັນ ວ່າດ້ວຍການເຄື່ອນຍ້າຍແຮງງານ, ການພັດທະນາ ແລະ ຮັບຮູ້ສີມືແຮງງານເຄື່ອນຍ້າຍ ແລະ ລາຍງານການກວດກາການຈັດຕັ້ງປະຕິບັດຖະແຫຼງການດັ່ງກ່າວ ທີ່ໄດ້ຮັບຮອງໃນກອງປະຊຸມສຸດຍອດຜູ້ນໍາອາຊຽນ ຄັ້ງທີ 44 ແລະ 45 ທີ່ ສປປ ລາວ ເປັນປະທານອາຊຽນ ໃນເດືອນຕຸລາ 2024 ທີ່ຜ່ານມາ, ພ້ອມທັງລາຍງານຄວາມຄືບໜ້າການຈັດຕັ້ງປະຕິບັດງານຄວາມເປັນເອກະສັນຂອງອາຊຽນ ວ່າດ້ວຍການປົກປ້ອງສົ່ງເສີມສິດທິແຮງງານເຄື່ອນຍ້າຍອາຊຽນ ແລະ ແລກປ່ຽນຄໍາຄິດເຫັນກ່ຽວກັບການຈັດຕັ້ງປະຕິບັດແຜນງານລຶບລ້າງການນໍາໃຊ້ແຮງງານເດັກ ໃນທຸກຮູບແບບທີ່ຮ້າຍແຮງ, ຊຶ່ງບັນດາປະເທດສະມາຊິກອາຊຽນ ກໍຄື ສປປ ລາວ ໄດ້ມີຄວາມພະຍາມໃນການຈັດຕັ້ງຜັນຂະຫຍາຍວຽກງານດັ່ງກ່າວເຂົ້າສູ່ແຜນງານລະດັບຊາດ ແນໃສ່ເພື່ອການປ້ອງກັນບັນຫາແຮງງານເດັກ, ການປົກປ້ອງແຮງງານໄວໜຸ່ມ ແລະ ສົ່ງເສີມວຽກທີ່ມີຄຸນຄ່າ ແລະ ເປັນທໍາ ສຳລັບໄວໜຸ່ມໃນຕໍ່ໜ້າໃຫ້ມີປະສິດທິຜົນ.
ສຳລັບ ກອງປະຊຸມລັດຖະມົນຕີແຮງງງານອາຊຽນ ຄັ້ງທີ 29 ແມ່ນຈະຈັດຂຶ້ນທີ່ປະເທດ ໄທໃນປີ 2026.
