ສປປ ລາວ ໄດ້ຖືກຄັດເລືອກໃຫ້ເປັນເຈົ້າພາບ ຈັດການແຂ່ງຂັນເຕະບານຍິງ ຊີງແຊ໋ມອາຊີ ຮຸ່ນອາຍຸບໍ່ເກີນ 20 ປີ ຮອບຄັດເລືອກ 2022 ຫຼື “AFC U20 Women’s Asian Cup Uzbekistan 2022 Qualifiers Round 1” ໂດຍການແຂ່ງຂັນລາຍການນີ້ ແມ່ນມີທັງໝົດ 31 ປະເທດ ເຂົ້າຮ່ວມການແຂ່ງຂັນ ໂດຍຈະແບ່ງອອກເປັນ 8 ກຸ່ມ.
ອີງຕາມຂໍ້ມູນຈາກສະຫະພັນບານເຕະແຫ່ງຊາດລາວ (ສຕລ) ໃຫ້ຮູ້ວ່າ: ການແຂ່ງຂັນຮອບຄັດເລືອກ ມີການກຳນົດການແຂ່ງຂັນລະຫວ່າງວັນທີ 14-22 ສິງຫາ 2021 ໂດຍຮູບແບບການແຂ່ງຂັນແບບພົບກັນໝົດ ຊຶ່ງເອົາທີມແຊ໋ມຈາກແຕ່ລະກຸ່ມ ເຂົ້າໄປຫຼິ້ນຮອບທີສອງ ໂດຍການແຂ່ງຂັນຈະຈັດຂຶ້ນລະຫວ່າງວັນທີ 03-07 ພະຈິກ 2021 ທີມທີ່ໄດ້ອັນດັບ 1-4 ແມ່ນຈະໄດ້ໄປຫຼິ້ນໃນຮອບສຸດທ້າຍ ຮ່ວມກັບທີມທີ່ໄດ້ອັນດັບ 1-3 ໃນປີ 2019 ຄື ຍີ່ປຸ່ນ, ສປປ ເກົາຫຼີ, ສ ເກົາຫຼີ ແລະ ປະເທດທີ່ເປັນເຈົ້າພາບ, ສ່ວນຮອບສຸດທ້າຍແມ່ນຈະຈັດຢູ່ທີ່ປະເທດອູສະເບກິສຖານ ໃນລະຫວ່າງວັນທີ 04-17 ເມສາ 2022.
ສໍາລັບການຈັບສະຫຼາກການແຂ່ງຂັນດັ່ງກ່າວ ແມ່ນຈະໄດ້ຈັດຂຶ້ນຢູ່ສຳນັກງານໃຫຍ່ ສະຫະພັນບານເຕະອາຊີ ທີ່ນະຄອນຫຼວງກົວລາລຳເປີ ປະເທດມາເລເຊຍ, ຜົນການຈັບສະຫຼາກຈະເປັນແນວໃດຈະລາຍງານຕື່ມຕາມພາຍຫຼັງ.
ຂ່າວຈາກ: ສຕລ
