Vientiane Times Lao
ລົດນັກກິລາລາວເກີດອຸປະຕິເຫດບາດເຈັບ 3

ລົດນັກກິລາລາວເກີດອຸປະຕິເຫດບາດເຈັບ 3

ຂະບວນລົດນັກກິລາລາວເກີດອຸປະຕິເຫດໃນຂະນະທີ່ເດີນທາງໄປເຂົ້າຮ່ວມພິທີເປີດ ການແຂ່ງຂັນຊີເກມຄັ້ງທີ່ 30 ຢ່າງເປັນທາງການຢູ່ປະເທດຟີລິບປີນ ໃນຕອນແລງຂອງມື້ວານນີ້ 30 ພະຈິກ 2019.

ຂະບວນດັ່ງກ່າວໄດ້ອອກຈາກບ້ານພັກຊີເກມ ທີ່ເມືອງ ຄຣາກ ພ້ອມກັນກັບ ຂະບວນນັກກິລາ ຂອງ ປະເທດ ຫວຽດນາມ, ໂຊກຮ້າຍໃນຄະນະທີ່ເດີນທາງໄປຮ່ວມພິທີເປີດ ການແຂ່ງຂັນກິລາຊີເກມນັ້ນ ລົດຂອງນັກກິລາລາວ ໄດ້ມີການເບກຢຸດລົດກະທັນຫັນຈຶ່ງເຮັດໃຫ້ຂະບວນທີ່ມານຳຫຼັງຕຳເອົາທ້າຍລົດ ມີນັກກິລາເປຕັງຂອງລາວບາດເຈັບ 1 ຄົນ ແລະ ຄະນະນັກກິລາອີກ 2 ຄົນ.

ຕາມການລາຍງານຂອງ ນັກຂ່າວ ສະຫະພັນບານເຕະແຫ່ງຊາດລາວ ແລະ ທີມງານລາວສູ້ສູ້ ໃຫ້ຮູ້ວ່າ ຫຼັງຈາກເກີດອຸປະຕິເຫດ ທ້າວ ຈັນທະວົງ ແກ້ວມະນີ ນັກກິລາຈາກແຂວງຄຳມວນ ເຊິ່ງເປັນນັກກິລາເປຕັງທີມຊາດ ປະເພດທີມຊຸດຊາຍ ໄດ້ຮັບອາການບາດເຈັບ ຄາງແຕກ ແລະ ໄດ້ຮັບການປະຖົມພະຍາບານຈາກແພດຜູ້ທີ່ກ່ຽວຂ້ອງ ປະຈຸບັນອາການດີ

ຂຶ້ນແລ້ວ. ສ່ວນຄະນະອີກສອງຄົນແມ່ນຄະນະສະໜັບສະໜູນ ຄື ທ່ານ ນາງ ອໍລະໄທ ສັນຕິຄົງຄາ ໄດ້ຮັບບາດເຈັບ ຢູ່ບໍເວນໃບໜ້າ ແລະ ທ່ານ ນາງ ສົມຈິດ ວົງສຳອາງ ໄດ້ຮັບບາດເຈັບທີ່ຄາງ. ນອກຈາກນີ້ ລົດຂອງນັກກິລາຫວຽດນາມກໍ່ມີຜູ້ບາດເຈັບ 2 ຄົນ.

ຂ່າວ: ສຸກນີລັນດອນ

ພາບ+ວີດີໂອ: ລາວສູ້ສູ້

Related Articles

Leave a Reply