Vientiane Times Lao
ລົດໄຟລາວ-ຈີນ ຂະບວນ ‘‘ລ້ານຊ້າງ’’ ຈະມາຮອດນະຄອນຫຼວງວຽງຈັນໃນວັນສຸກນີ້

ລົດໄຟລາວ-ຈີນ ຂະບວນ ‘‘ລ້ານຊ້າງ’’ ຈະມາຮອດນະຄອນຫຼວງວຽງຈັນໃນວັນສຸກນີ້

ລົດໄຟລາວ-ຈີນ ຂະບວນ ‘‘ລ້ານຊ້າງ’’ (EMU) ຈະເລີ່ມເດີນທາງຈາກຊາຍແດນບໍ່ເຕນ ແຂວງຫຼວງນໍ້າທາໃນມື້ວັນທີ 14 ຕຸລາ 2021 ນີ້ ແລະ ຈະມາຈອດພັກຢູ່ແຂວງຫຼວງພະບາງ ກ່ອນທີ່ຈະເດີນທາງຕໍ່ມາຮອດນະຄອນຫຼວງວຽງຈັນໃນວັນສຸກວັນທີ 15 ຕຸລາ 2021 ນີ້, ຂະບວນດັ່ງກ່າວເປັນຂະບວນເພື່ອຮັບໃຊ້ການບໍລິການພາຍໃນປະເທດ ແລະ ສາກົນ ຊຶ່ງເປັນຂະບວນທໍາອິດຂອງບໍລິສັດທາງລົດໄຟລາວ-ຈີນ ຈໍາກັດ.

ຂະບວນລົດໄຟ EMU ປະກອບມີທັງໝົດ ມີ 7 ຕູ້, 2 ຊັ້ນ, ມີ 720 ບ່ອນນັ່ງ, ແຕ່ລະຕູ້ມີປະມານ 90 ບ່ອນນັ່ງ ຊຶ່ງບ່ອນນັ່ງຊັ້ນ 1 ລວມມີ 56 ບ່ອນນັ່ງ, ຊັ້ນ 2 ມີ 662 ບ່ອນນັ່ງ ແລະ ບ່ອນນັ່ງພິເສດສຳລັບຄົນພິການ 2​ ບ່ອນນັ່ງ.

ດ້ານການອອກແບບຄະນະຊ່ຽວຊານອອກແບບໄດ້ນຳໃຊ້ສັນຍາລັກຂອງທຸງຊາດລາວເປັນແຮງບັນດານໃຈໃນການອອກແບບ ຊຶ່ງທຸງຊາດລາວປະກອບມີ 3 ສີ ຄື: ສີແດງ, ສີຟ້າ ແລະ ສີຂາວ. ສີແດງໝາຍເຖິງເລືອດ ເນື້ອຂອງນັກຮົບປະຕິວັດລາວທີ່ເສຍສະຫຼະເພື່ອຊາດ, ສີຟ້າໝາຍເຖິງຄວາມອຸດົມຮັ່ງມີຂອງປະເທດລາວທາງດ້ານຊັບພະຍາກອນທຳມະຊາດ ແລະ ຍັງໝາຍເຖິງແມ່ນໍ້າຂອງ ແລະ ສາຂາ ແລະ ວົງກົມສີຂາວໝາຍເຖິງ ຄວາມສາມັກຄີອັນເປັນປຶກແຜ່ນແໜ້ນໜາຂອງປວງຊົນລາວ ແລະ ຍັງໝາຍເຖິງເດືອນເຕັມດວງທີ່ສ່ອງແສງເທິງແມ່ນໍ້າຂອງ.

ຂໍ້ມູນ-ພາບ: ບໍລິສັດທາງລົດໄຟລາວ-ຈີນ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ