Visit BigblueAgency
<strong>ສຄອຊ ຈະຈັດງານມະຫະກຳ ກຽມຄວາມພ້ອມສູ່ການເຮັດວຽກ ທ້າຍເດືອນນີ້</strong>

ສຄອຊ ຈະຈັດງານມະຫະກຳ ກຽມຄວາມພ້ອມສູ່ການເຮັດວຽກ ທ້າຍເດືອນນີ້

ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ) ຮ່ວມກັບ ກະຊວງແຮງງານ ແລະ ສະຫວັດດີການສັງຄົມ (ຮສສ), ກະຊວງສຶກສາທິການ ແລະ ກິລາ (ສສກ) ແລະ ສູນກາງສະຫະພັນກຳມະບານລາວ ຈະຈັດງານມະຫະກຳ ກຽມຄວາມພ້ອມສູ່ການເຮັດວຽກ “Ready 4 Work” festival 2023 ໃນລະຫວ່າງວັນທີ 27-29 ມີນາ ທີ່ຈະມາເຖິງນີ້ ທີ່ສູນການຄ້າວຽງຈັນເຊັນເຕີ.

ພາຍໃນງານຄັ້ງນີ້ ຈະມີຫຼາຍກິດຈະກໍາ ທີ່ເປັນເປົ້າໝາຍສໍາຄັນ ເປັນຕົ້ນ ເປັນງານເປີດກວ້າງ ໃຫ້ຜູ້ປະກອບການ ແລະ ແຮງງານໄດ້ມາພົບປະແລກປ່ຽນ. ເປັນເວທີແລກປ່ຽນປະສົບການ ແລະ ເຜີຍແຜ່ແນວທາງໃນການພັດທະນາສີມືແຮງງານຂອງຜູ້ອອກແຮງງານ ແລະ ຜູ້ໃຊ້ແຮງງານ. ເປັນເວທີໃຫ້ນັກສຶກສາໄດ້ມີການແລກປ່ຽນບົດຮຽນ ເພື່ອກຽມເຂົ້າສູ່ຕະຫຼາດແຮງງານໃນອະນາຄົດ ແລະ ຮັບຮູ້ຂໍ້ມູນຂ່າວສານຕະຫຼາດແຮງງານ ແລະ ນະໂຍບາຍທີ່ຕິດພັນການຈ້າງງານ;ສົ່ງເສີມການສ້າງວຽກເຮັດງານທໍາ ໃຫ້ກັບແຮງງານທີ່ວ່າງງານ ແລະ ອື່ນໆ ອີກ.

ນອກຈາກນັ້ນ ພາຍໃນງານ ຍັງຈະນໍາສະເໜີການຮຽນ-ການສອນໃນຮູບແບບ ອາຊີວະສຶກສາແບບຄວບຄູ່. ວາງສະແດງ ແລະ ສາທິດທັກສະດ້ານສີມືແຮງງານ ແລະ  ເວທີສ້າງຄວາມຮັບຮູ້ແກ່ສັງຄົມ. ການແຂ່ງຂັນສີມືແຮງງານ ແລະ ເຜີຍແຜ່ຜົນການສໍາຫຼວດໂຄງການສົ່ງເສີມສີມືແຮງງານຕ່າງໆ. ການພົບປະລະຫວ່າງອົງກອນ, ເຂດເສດຖະກິດ, ຫົວໜ່ວຍທຸລະກິດ ກັບຜູ້ວ່າງງານ, ແຮງງານທີ່ສົນໃຈ ແບບເປີດກວ້າງ ແລະ ການສະໜັບສະໜູນທຶນການສຶກສາ ເພື່ອສ້າງແຮງງານຄຸນນະພາບ.

ພິທີຖະແຫຼງຂ່າວງານ ຄັ້ງນີ້ ໄດ້ຈັດຂຶ້ນ ເມື່ອບໍ່ດົນມານີ້ ທີ່ນະຄອນຫຼວງວຽງຈັນ ໂດຍເຂົ້າຮ່ວມຂອງ ທ່ານ ໄຊບັນດິດ ຣາຊະພົນ ຮອງປະທານ ສຄອຊ, ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ກະຊວງ ສສກ, ທ່ານ ນາງ ຈັນເພັງ ມະນີແສງ ຫົວໜ້າກົມປົກປ້ອງແຮງງານ ສູນກາງສະຫະພັນກຳມະບານລາວ, ທ່ານ ບຸນຍົງ ແກ້ວບົວພັນ ຮອງຫົວໜ້າສະຖາບັນພັດທະນາສີມືແຮງງານ ກະຊວງ ຮສສ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

Related Articles

Leave a Reply