Visit BigblueAgency
ສຕລ ຈະເປີດສູນຝຶກກິລາບານເຕະເຍົາວະຊົນ ຈຳປີ-ຈຳປາ ອີກ 2 ແຫ່ງ ຢູ່ແຂວງພາກເໜືອ

ສຕລ ຈະເປີດສູນຝຶກກິລາບານເຕະເຍົາວະຊົນ ຈຳປີ-ຈຳປາ ອີກ 2 ແຫ່ງ ຢູ່ແຂວງພາກເໜືອ

ສະຫະພັນບານເຕະແຫ່ງຊາດລາວ (ສຕລ) ຈະເປີດສູນຝຶກບານເຕະເຍົາວະຊົນ ຈຳປີ-ຈຳປາ ອີກ 2 ແຫ່ງ ຢູ່ແຂວງຊຽງຂວາງ ແລະ ແຂວງບໍ່ແກ້ວ ໃນໄວໆນີ້, ເພື່ອເປັນບ່ອນພັດທະນາພື້ນຖານກິລາບານເຕະ ໃຫ້ແກ່ລູກຫຼານເຍົາວະຊົນແຕ່ລະຮຸ່ນ ພາຍໃນແຂວງ, ເປີດໂອກາດໃຫ້ນັກກິລາເຍົາວະຊົນ ໄດ້ສະແດງຄວາມສາມາດທາງດ້ານພອນສະຫວັນກິລາບານເຕະ ເພື່ອສືບທອດເປັນນັກກິລາບານເຕະຂອງແຂວງ, ກ້າວສູ່ການເປັນນັກກິລາທີມຊາດ ແລະ ພັດທະນາກ້າວໄປສູ່ການເປັນນັກເຕະອາຊີບໃນອະນາຄົດ.

ເມື່ອບໍ່ດົນມານີ້, ສະຫະພັນບານເຕະແຫ່ງຊາດລາວ ໄດ້ສົ່ງພະນັກງານວິຊາການ, ພະເເນກເຕັກນິກ-ວິທະຍາ ເດີນທາງໄປສົມທົບກັບສະຫະພັນບານເຕະແຂວງ ແລະ ອຳນາດການປົກຄອງທັງສອງແຂວງ ເພື່ອຮວ່ມກັນສຳຫຼວດກວດກາຄືນຄວາມພ້ອມດ້ານຕ່າງໆ ລວມທັງ ສະຖານທີ່ບ່ອນສ້າງສູນຝຶກ ແລະ ປຶກສາຫາລືຄວາມເປັນໄປໄດ້ໃນການເປີດສູນຝຶກບານເຕະເຍົາວະຊົນ ຈຳປີ-ຈຳປາ.

ສູນຝຶກກິລາບານເຕະເຍົາວະຊົນ ຈໍາປີ-ຈຳປາ ແມ່ນຢູ່ພາຍໃຕ້ໂຄງການ ຂອງສະຫະພັນບານເຕະສາກົນ ຫຼື FIFA ( FIFA Talent Development Scheme) ຮ່ວມກັບ ສະຫະພັນບານເຕະແຫ່ງຊາດລາວ ເປັນໂຄງການເພື່ອພັດທະນາກິລາບານເຕະນ້ອງໆເຍົາວະຊົນລາວໃຫ້ຮັກມັກກິລາບານເຕະ ແລະ ພັດທະນາກິລາລາວໃນລະດັບຂັ້ນພື້ນຖານກ້າວສູ່ມືອາຊີບ, ຊຶ່ງປະຈຸບັນ ແມ່ນມີ 4 ສູນຝຶກຄື: ນະຄອນຫຼວງວຽງຈັນ, ແຂວງຫຼວງພະບາງ, ແຂວງຈຳປາສັກ ແລະ ແຂວງຫຼວງນໍ້າທາ.

ຂໍ້ມູນ: ສຕລ

Related Articles

Leave a Reply