Vientiane Times Lao
ສຕລ ມີຫຼາຍກິດຈະກຳ ພັດທະນາບານເຕະປະຈຳປີ 2020

ສຕລ ມີຫຼາຍກິດຈະກຳ ພັດທະນາບານເຕະປະຈຳປີ 2020

ສະຫະພັນບານເຕະແຫ່ງຊາດລາວ (ສຕລ) ໄດ້ວາງແຜນ ກ່ຽວກັບກິດຈະກຳ ປະຈຳປີ 2020 ເຊິ່ງປະກອບມີ ວຽກງານການຈັດການແຂ່ງຂັນ ໃນປີ 2020,  ການຝຶກອົບຮົມຄູຝຶກ ແລະ ກໍາມະການຕັດສິນຂັ້ນພື້ນຖານ ແລະ ອື່ນໆ ເພື່ອ ພັດທະນາວົງການກິລາລາວ ໃນການກຽມຄວາມພ້ອມເຂົ້າຮ່ວມການແຂ່ງຂັນບານເຕະລະດັບນາໆຊາດປະຈຳປີ 2020.

ທ່ານ ນາງ ກັນຍາ ແກ້ວມະນີ ເລຂາທິການ ສຕລ ໄດ້ຂຶ້ນລາຍງານ ຫວ່າງບໍ່ດົນມານີ້ ທີ່ນະຄອນຫຼວງວຽງຈັນ ໃນກອງປະຊຸມສະຫລຸບຜົນງານຂອງ ສຕລ ປະຈາປີ 2019 ແລະ ແຜນກິດຈະກຳ ປະຈຳປີ 2020 ໃຫ້ຮູ້ວ່າ:  ສຕລ ມີຫຼາຍກິດຈະກໍາ ປະຈຳປີ 2020 ໂດຍສະເພາະ ຈະຈັດການແຂ່ງຂັນເຕະບານປະກອບທັງຫມົດ 10 ລາຍການດັ່ງນີ໊: PEPSI LAO LEAGUE 1 2020, COMMANDO LAO LEAGUE 2 2020, COMANDO LFF CUP 2020, LFF PROVINCIAL COMPETITIONS 2020, LFF WOMEN’S CUP 2020, LFF FUTSAL CHAMPIONSHIP 2020, LFF U-12 CHAMPIONSHIP 2020, LFF U-15 YOUTH LEAGUE 2020, LFF U-15 GIRLS’ CHAMPIONSHIP 2020 ແລະ LFF U-18 YOUTH LEAGUE 2020.

ທ່ານ ນາງ ກັນຍາ ແກ້ວມະນີ ໄດ້ລາຍງານຕື່ມອີກວ່າ:  ສຕລ ຍັງຈະໄດ້ຈັດການຝຶກອົບຮົມຄູຝຶກ ແລະກຳມະການຕັດສິນຂັ້ນພື້ນຖານ ໂຄງການລິເລີ່ມຢູ່ໃນ 5 ແຂວງດັ່ງຕໍ່ໄປນີ້: ແຂວງສະຫວັນນະເຂດ,ແຂວງຈໍາປາສັກ, ແຂວງຫຼວງພະບາງ, ແຂວງຄໍາມ່ວນ ແລະ ແຂວງວຽງຈັນ. ພ້ອມນັ້ນ ສຕລ ຈະໄດ້ຈັດກິດຈະກໍາຝຶກແອບບານເຕະຂັ້ນພື້ນຖານ, ຄູ່ມືການຝຶກແອບບານເຕະຂັ້ນພື້ນຖານ, ການຍົກລະດັບຄູຝຶກ, ການພັດທະນາບານເຍົາວະຊົນຊາຍ-ຍິງ ແລະ ຈັດກິດຈະກໍາ ອື່ນໆ ອີກ.

ຂ່າວ: ບົວຜັນ

ຮູບ: ວຽງຈັນທາຍ

Related Articles

Leave a Reply