Vientiane Times Lao
ສຕລ ເປີດຮັບສະໝັກການແຂ່ງຂັນ U-12 ຕັ້ງເປົ້າພັດທະນານັກເຕະເຍົາວະຊົນ

ສຕລ ເປີດຮັບສະໝັກການແຂ່ງຂັນ U-12 ຕັ້ງເປົ້າພັດທະນານັກເຕະເຍົາວະຊົນ

ສະຫະພັນບານເຕະແຫ່ງຊາດລາວ (ສຕລ) ເລີ່ມເປີດຮັບສະໝັກທີມເຂົ້າຮ່ວມຫຼາຍກິດຈະ ກໍາການແຂ່ງຂັນໃນປີນີ້ ຕັ້ງເປົ້າພັດທະນານັກກິລາເຍົາວະຊົນ ຕາມແຜນພັດທະນາກິລາບານເຕະຂອງ ສປປ ລາວ.

ໃນຕອນເຊົ້າຂອງມື້ນີ້ 14 ມັງກອນ 2020 ສະຫະພັນດັ່ງກ່າວໄດ້ແຈ້ງໃຫ້ບັນດາສະໂມສອນທີ່ໄດ້ເຂົ້າຮ່ວມການແຂ່ງຂັນບານເຕະ ຫຼາຍໆລາຍການຂອງ ສຕລ ໃນປີຜ່ານມາ ຄື: ເປບຊີ ລາວພຣີເມຍລີກ, ຄອມມານໂດ ສາຍ ກໍ, ເຍົາວະຊົນຮຸ່ນອາຍຸບໍ່ເກີນ 15 ປີ ແລະ 18 ປີ ຊີງຂັນ ສຕລ ນັ້ນໃຫ້ຊາບວ່າ ທາງ ສຕລ ໄດ້ເປີດຮັບ​ສະ​ຫມັກ ທີມ​ເຂົ້າ​ຮ່ວມການແຂ່ງຂັນບານເຕະເຍົາວະຊົນຮຸ່ນອາຍຸບໍ່ເກີນ 12 ປີ ຊີງຂັນ ສຕລ ປະຈໍາປີ 2020.
ກິດຈະກຳດັ່ງກ່າວ ແມ່ນເພື່ອເປັນການພັດທະນາກິລາບານເຕະ ໃຫ້ມີການເຄື່ອນໄຫວຢ່າງເປັນປົກກະຕິ ແລະ ຕໍ່ເນື່ອງພ້ອມທັງປະຕິບັດຕາມແຜນການຈັດແຂ່ງຂັນປະຈຳປີ 2020 ໃຫ້ບັນລຸເປົ້າໝາຍ. 

ການແຂ່ງຂັນບານເຕະເຍົາວະຊົນຮຸ່ນອາຍຸບໍ່ເກີນ 12 ປີ ຊີງຂັນ ສຕລ ຫລື LFF U-12 Championship ປະຈໍາປີ 2020 ຈະກໍານົດເອົາ 16 ສະໂມສອນເທົ່ານັ້ນເຂົ້າຮ່ວມການແຂ່ງຂັນ ແລະ ຈະໃຫ້ບຸລິມະສິດໃນການເຂົ້າຮ່ວມແຂ່ງຂັນຄັ້ງນີ້ສະເພາະສະໂມສອນທີ່ເປັນສະມາຊິກຂອງ ສຕລ ເທົ່ານັ້ນ.
ເລີ່ມເປີດຮັບສະໝັກນັບແຕ່ ມື້ນີ້ເປັນຕົ້ນໄປ ຈົນຮອດ ວັນທີ 20 ມັງກອນ 2020 ແລະ ຈະເປີດການແຂ່ງຂັນໃນວັນທີ 08 ກຸມພາ 2020.
ເກນອາຍຸຂອງນັກກິລາທຸກຄົນທີ່ເຂົ້າຮ່ວມແຂ່ງຂັນລາຍການນີ້ແມ່ນຕ້ອງເກີດໃນປີ 2008-2010 ເທົ່ານັ້ນ. ຮູບແບບການແຂ່ງຂັນແມ່ນຈະແຂ່ງຂັນແບບແບ່ງກຸ່ມ (Group Stage) ແລະ (Knock Out).

ຂ່າວ: ວຽງຈັນທາຍ

ພາບ: ສຕລ

Related Articles

Leave a Reply