Agoda ເວັບໄຊ ທ່ອງທ່ຽວຊື່ດັງຂອງໂລກ ເຜີຍຜົນສຳຫຼວດ ສປປ ລາວ, ຍີ່ປຸ່ນ ແລະ ໄຕ້ຫວັນ ເປັນສະຖານທີ່ ທີ່ນັກທ່ອງທ່ຽວໄທ ຢາກກັບມາທ່ຽວຫຼາຍເທື່ອທີ່ສຸດ ຈາກແຮງດຶງດູດທາງດ້ານສິລະປະວັດທະນະທຳທ້ອງຖິ່ນ ແລະ ການເດີນທາງທີ່ສະດວກສະບາຍ.
ໂດຍ ຜົນສຳຫຼວດຈາກ Agoda ເຜີຍວ່າ ນັກທ່ອງທ່ຽວ ໄທຫຼາຍກວ່າ 74% ເລືອກທີ່ຈະກັບໄປສະຖານທີ່ທ່ອງທ່ຽວທີ່ເຄີຍໄປມາແລ້ວ ຫຼາຍເທື່ອ ບໍ່ແມ່ນແຕ່ 1 ຄັ້ງ ຫາ 2 ຄັ້ງ ແຕ່ບາງຄົນກັບໄປອີກບໍ່ຕໍ່າກວ່າ 10 ຄັ້ງ ໃນຮອບບໍ່ເທົ່າໃດປີ.
ຕາມການລາຍງານຂອງ ເຟດບຸກ ຂອງ The Standard Wealth, ໂດຍການສຳຫຼວດພົບເຫດຜົນຂອງນັກທ່ອງທ່ຽວໄທກັບມາຫຼາຍຄັ້ງ ເຫັນວ່າ 53% ຂອງຜູ້ຕອບແບບສອບຖາມກ່າວວ່າ ຄວາມສະດວກໃນການເດີນທາງ’ ແມ່ນປັດໄຈສໍາຄັນໃນການຕັດສິນໃຈຂອງພວກເຂົາທີ່ຈະກັບໄປ, 49% ແມ່ນເຫດຜົນເລື່ອງອາຫານທ້ອງຖິ່ນ ທີ່ເຮັດໃຫ້ຫຼາຍຄົນຕິດໃຈຈົນຢາກກັບໄປຊີມອີກ. ນອກຈາກນັ້ນ, 42% ແມ່ນເລື່ອງຄວາມປອດໄພ ແລະ ຄວາມສະອາດ ທີ່ສ້າງຄວາມໝັ້ນໃຈໃຫ້ແກ່ນັກທ່ອງທ່ຽວ.
ເມື່ອຖາມເຖິງ ລາຍລະອຽດຂອງຈຸດປະສົງຂອງການເດີນທາງມາອີກຫຼາຍຄັ້ງຂອງພວກເຂົາ ແມ່ນ 32% ກໍາລັງຊອກຫາ ການຜະຈົນໄພ ໃໝ່ໆໃນສະຖານທີ່ທີ່ຄຸ້ນເຄີຍ, ໃນຂະນະທີ່ 23% ມີຄວາມກະຕືລືລົ້ນກ່ຽວກັບອາຫານທ້ອງຖິ່ນ ແລະ 20% ມີຄວາມກະຕືລືລົ້ນໃນສິລະປະ ແລະ ວັດທະນະທໍາຂອງປະເທດ.
ອີກໜຶ່ງທ່າແຮງຂອງ ສປປ ລາວ ໃນການດຶງດູດນັກທ່ອງທ່ຽວໄທ ເຂົ້າມາແມ່ນເລື່ອງຂອງວັດທະນະທຳ, ພາສາ, ອາຫານ ແມ່ນມີຄວາມໃກ້ຄຽງກັນ, ການຂົນສົ່ງທາງລົດໄຟທີ່ເຊື່ອມຈອດກັນ ເຮັດໃຫ້ມີຄວາມສະດວກສະບາຍໃນການທ່ອງທ່ຽວຫຼາຍຂຶ້ນກວ່າແຕ່ກ່ອນ.
ນອກຈາກນີ້ ນັກທ່ອງທ່ຽວໄທ ຍັງໄດ້ຮັບຄວາມສະດວກສະບາຍໃນເລື່ອງຂອງການຊຳລະຄ່າສິນຄ້າ ແລະ ບໍລິການ ໃນລາວ ໂດຍສາມາດນຳໃຊ້ບັນຊີທະນາຄານຂອງຕົນເອງ ຊໍາລະຄ່າສິນຄ້າ ແລະ ບໍລິການ ຢູ່ລາວ ໄດ້ເລີຍຜ່ານ Qr Code ແບບຂ້າມຊາດ ຜ່ານແອັບພລີເຄຊັ່ນ Mobile Banking ຂອງຕົນເອງ ໂດຍບໍ່ຈຳເປັນຕ້ອງແລກເງິນມາກ່ອນ.
ໃນ 4 ເດືອນຕົ້ນປີນີ້, ລາວໄດ້ຕ້ອນຮັບນັກທ່ອງທ່ຽວຕ່າງປະເທດ 1,5 ລ້ານເທື່ອຄົນ, ເພີ່ມຂຶ້ນປະມານ 35% ເມື່ອທຽບໃສ່ໄລຍະດຽວກັນຂອງປີກາຍ. ໂດຍມີນັກທ່ອງທ່ຽວຈາກໄທມາເປັນອັນດັບ 1 ຮອງລົງມາແມ່ນຫວຽດນາມ ແລະ ຈີນ ຕາມລໍາດັບ.
