Vientiane Times Lao
ສວນພຶກສາ ຈະເປີດໃຫ້ບໍລິການໃນເດືອນ ກຸມພາ 2022 ເປັນຕົ້ນໄປ

ສວນພຶກສາ ຈະເປີດໃຫ້ບໍລິການໃນເດືອນ ກຸມພາ 2022 ເປັນຕົ້ນໄປ

ສວນພຶກສາ ເປັນສວນໜຶ່ງ ທີ່ນອນຢູ່ໃນໂຄງການເຂດທ່ອງທ່ຽວລາວ ສີຂຽວ ເພື່ອການທ່ອງທ່ຽວທີ່ປອດໄພຈາກພະຍາດໂຄວິດ-19, ຊຶ່ງປະຈຸບັນ ທາງສວນພຶກສາ ກຽມຄວາມພ້ອມທຸກດ້ານເປີດໃຫ້ບໍລິການຕ້ອນຮັບນັກທ່ອງທ່ຽວໃນເດືອນກຸມພາ 2022 ເປັນຕົ້ນໄປ, ເປັນຕົ້ນ ດ້ານການບໍລິການ, ພະນັກງານໄດ້ຮັບການຝຶກອົບຮົມ ແລະ ໄດ້ຮັບການສັກວັກຊິນປ້ອງກັນພະຍາດໂຄວິດ-19 ຄົບ 3 ເຂັມ ແລະ ອື່ນໆ ອີກ.

ທ່ານ ພູວົງ ພະມີສິດ, ເຈົ້າຂອງສວນພຶກສາ ໄດ້ໃຫ້ສໍາພາດຕໍ່ສື່ມວນຊົນບໍ່ດົນມານີ້ວ່າ: ສວນພຶກສາເປັນສະຖານທີ່ທ່ອງທ່ຽວທາງທໍາມະຊາດທີ່ສວຍງາມ ອາກາດປອດໂປ່ງ ເໝາະແກ່ການທ່ອງທ່ຽວແບບເປັນກຸ່ມ ຫຼື ຄອບຄົວ, ໂດຍສະເພາະ ສວນພຶກສາ ແມ່ນໄດ້ປັບປຸງແຕ່ລະໂຊນຄືນໃໝ່ ໃຫ້ມີຄວາມສວຍງາມໂດດເດັ່ນ ເພື່ອດຶງດູດນັກທ່ອງທ່ຽວ ເປັນຕົ້ນ ປູກດອກໄມ້ນາໆຊະນິດຫຼາຍສີສັນ, ສ້າງສວນນໍ້າຕົກຕາດ, ສ້າງສວນພະຍານາກ, ມີຮ້ານກິນດື່ມ, ມີຕູບທີ່ຮອງຮັບແຂກ, ມີສະຖານທີ່ໃຫ້ລູກຄ້າສາມາດຈັດງານລ້ຽງ ແລະ ຝຶກອົບຮົມ ພ້ອມນັ້ນ ຍັງມີກິດຈະກໍາ ອື່ນໆອີກ ໄວ້ຄອຍບໍລິການທ່ານ ເປັນຕົ້ນ ມີຫໍຄອຍຊົມວີວ, ມີລົດໄຟຟ້ານໍາທ່ຽວ, ລົດຖີບໃຫ້ເຊົ່າ, ມີສະລິງ, ມີສະໄລເດີ້ນໍ້າ, ມີກິດຈະກຳຍ່າງປ່າ ແລະ ກິດຈະກຳ ອື່ນໆ ອີກ.

ທ່ານ ພູວົງ ພະມີສິດ ກ່າວຕື່ມອີກວ່າ: ພາຍໃນບໍລິເວນສວນພຶກສາ ນີ້ ຍັງມີສວນຢາພື້ນເມືອງໄດ້ປູກພືດທີ່ສາມາດປິ່ນປົວຫຼາຍພະຍາດ ອັນພົ້ນເດັ່ນແມ່ນລາຊາບີ, ຜັກຄາວທອງ ແລະ ກະຊາຍຂາວ ພ້ອມນັ້ນ ຍັງມີຫໍວາງສະແດງຊົນເຜົ່າຕ່າງໆ ໂດຍສະເພາະເຜົ່າມົ້ງ, ກຶມມຸ, ບຣູ ແລະ ເຜົ່າລາວ ເພື່ອຕ້ອນຮັບນັກທ່ອງທ່ຽວ ທີ່ຕ້ອງການຮຽນຮູ້ກ່ຽວກັບດ້ານປະເພນີ ວັດທະນະທໍາ ຂອງຊົນເຜົ່າດັ່ງກ່າວ.

ສໍາລັບ ສະຖານທີ່ສວນພຶກສາ ແມ່ນຕັ້ງຢູ່ບ້ານ ດ່ານຊີ ເມືອງ ນາຊາຍທອງ ນະຄອນຫຼວງວຽງຈັນ ຊຶ່ງສ່ວນດັ່ງກ່າວ ມີເນື້ອທີ່ທັງໝົດ 50 ກວ່າເຮັກຕາ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ