ບໍລິສັດ IHC ລາວ ແລະ ບໍລິສັດ ໂກເດັນວິດສະດອມ ຮົງກົງ ຈໍາກັດ ໄດ້ຮ່ວມທຶນຈົດທະບຽນພາຍໃຕ້ຊື່ ບໍລິສັດ ໂກເດັນວິດສະດອມ ລາວ ຈໍາກັດ ເພື່ອສ້າງໂຮງງານ ຜະລິດຢາປົວພະຍາດປະເພດຕ່າງໆ ແລະ ອາຫານເສີມ ຢູ່ເຂດພັດທະນາກວມລວມໄຊເຊດຖາ ໂດຍມີມູນຄ່າການລົງທຶນເບື້ອງຕົ້ນປະມານ 100 ລ້ານກວ່າໂດລາສະຫະລັດ ໃນເນື້ອທີ່ເຊົ່າສໍາປະທານ 10 ເຮັກຕາ, ໂດຍໄດ້ແບ່ງການກໍ່ສ້າງອອກເປັນ 03 ໄລຍະ ຊຶ່ງໄດ້ເລີ່ມການກໍ່ສ້າງໂຮງງານມາແຕ່ ປີ 2019, ມາຮອດປະຈຸບັນໄດ້ສຸມໃສ່ການກໍ່ສ້າງອາຄານຕ່າງໆເປັນຕົ້ນແມ່ນ ໂຮງງານ, ສູນວິໄຈການພັດທະນາ, ຫໍພັກ ແລະ ພື້ນຖານໂຄງລ່າງຕ່າງໆ ກ່ອນຈະກ້າວໄປສູ່ການຕິດຕັ້ງເຄື່ອງຈັກ ແລະ ທົດລອງການຜະລິດ ຊຶ່ງຄາດວ່າການກໍ່ສ້າງຈະສໍາເລັດ ແລະ ເລີ່ມຜະລິດຢາ ແລະ ອາຫານເສີມໃນອີກ 2-3 ປີຂ້າງໜ້າ.
ບໍລິສັດຜະລິດຢາໂກເດັນວິດສະດອມ ຮົງກົງ ຈໍາກັດ ໄດ້ມີການຮ່ວມຮຸ້ນກັບຫຼາຍບໍລິສັດການ ຢາຂອງ ສປ ຈີນ, ຊຶ່ງມາເຖິງປະຈຸບັນ ມີຢາຈີນທີ່ໄດ້ຮັບການຮັບຮອງຫຼາຍກວ່າ 250 ລາຍການ ແລະ ຂຶ້ນທະບຽນແລ້ວຫຼາຍກວ່າ 100 ລາຍການ ເປັນຕົ້ນແມ່ນ ຢາເມັດ, ຢາເຄັບຊູນ, ຢາຝຸ່ນ, ຢາສັກ, ຜະລິດຕະພັນຊີວະພາບ, ອາຫານເສີມ, ອາຫານເພື່ອສຸຂະພາບ ແລະ ອື່ນໆ.
ຂ່າວ-ຂໍ້ມູນ: ເສດຖະກິດພິເສດ ນະຄອນຫລງວຽງຈັນ
