Vientiane Times Lao
ສະຖານີວິທະຍຸ-ໂທລະພາບ ແຂວງໄຊສົມບູນ ຈະເປີດຢ່າງເປັນທາງການໃນຕົ້ນປີ 2021

ສະຖານີວິທະຍຸ-ໂທລະພາບ ແຂວງໄຊສົມບູນ ຈະເປີດຢ່າງເປັນທາງການໃນຕົ້ນປີ 2021

ການກໍ່ສ້າງສະຖານີວິທະຍຸ-ໂທລະພາບແຂວງ ໄຊສົມບູນ ທີ່ຕັ້ງຢູ່ຈອມພູສູງຂະໜານກັບພູເບ້ຍ ທີ່ເມືອງອານຸວົງ ສຳເລັດແລ້ວຫຼາຍກວ່າ 80% ພາຍຫຼັງທີ່ເລີ່ມການກໍ່ສ້າງໃນເດືອນກຸມພາທີ່ຜ່ານມາ ໂດຍມີອາຄານຫ້ອງການ ແລະ ຫ້ອງອັດສຽງ-ພາບ, ຕັດຕໍ່, ອາຄານເຄື່ອງສົ່ງ, ເຮືອນຈັກໄຟຟ້າສຳຮອງ ແລະ ເຮືອນພັກພະນັກງານ, ຊຶ່ງຈະສໍາເລັດການກໍ່ສ້າງ ແລະ ເລີ່ມເປີດນໍາໃຊ້ໃນຕົ້ນປີ 2021 ທີ່ຈະມາເຖິງນີ້.

ສະຖານີດັ່ງກ່າວນີ້ໄດ້ຮັບການຊ່ວຍເຫຼືອລ້າຈາກລັດຖະບານ ສສ ຫວຽດນາມໃນມູນຄ່າທັງໝົດ118 ຕື້ດົງ ໃນນັ້ນມີທຶນສົມທົບຂອງລັດຖະບານລາວ 1,8 ຕືິິ້ກີບ ໂດຍຈະໄດ້ຕິດຕັ້ງເຄື່ອງສົ່ງວິທະຍຸ FM 10 ກິໂລວັດ ແລະ ເຄື່ອງສົ່ງໂທລະພາບ10 ກິໂລວັດ ແລະ ຈະສ້າງເສົາອາກາດ (Antena) ທີ່ມີຄວາມສູງເຖິງ75 ແມັດ ຊຶ່ງ ຈະສາມາດກະຈາຍສຽງ ແລະ ພາບກວມໄດ້ເນືິ້ອທີ່ທົ່ວແຂວງ ແລະ ອີກສ່ວນໜຶ່ງຂອງບັນດາແຂວງ ໃກ້ຄຽງ.

 ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ທ່ານ ສະຫວັນຄອນ ຣາຊມຸນຕີ ແລະ ຄະນະ ພ້ອມທັງ ຫົວໜ້າພະແນກ ຖວທ ແຂວງໄຊສົມບູນ ທ່ານຕົ່ງມົວ ຊົວໂກ້  ພ້ອມຄະນະໄດ້ລົງຕິດຕາມຄວາມຄືບໜ້າຂອງໂຄງການກໍ່ສ້າງສະຖານີດັ່ງກ່າວເມື່ອວັນທີ 25 ຕຸລາທີ່ຜ່ານມາ.

 ວິທະຍຸ-ໂທລະພາບແຂວງໄຊສົມບູນນີ້ ຈະເປັນສະຖານີທີ່ເຜີຍແຜ່ຂໍ້ມູນຂ່າວສານຕ່າງໆພາຍໃນແຂວງ ໂດຍສະເພາະແມ່ນວຽກງານຂອງຄະນະນຳແຂວງໃນການໂຄສະນາແນວທາງນະໂຍບາຍຂອງພັກ, ແຜນພັດທະນາເສດຖະກິດສັງຄົມແຫ່ງລັດ, ເປັນເວທີສະແດງຄວາມຄິດເຫັນທີ່ສຳຄັນຂອງປະຊາຊົນ, ໃຫ້ການສຶກສາອົບຮົມ, ໃຫ້ຄວາມຮູ້ດ້ານຕ່າງໆເປັນຕົ້ນແມ່ນນິຕິກຳກົດໝາຍ, ການປົກປັກຮັກສາ ສະພາບແວດລ້ອມ, ເຕັກນິກວິທະຍາສາດໃນການພັດທະນາຄຸນນະພາບ ຊີວິດ ຂອງປະຊາຊົນ ໂດຍສະເພາະແມ່ນການຊຸກຍູ້ການຜະລິດກະສິກຳເປັນສິນຄ້າ ແລະ ໃຫ້ການບັນເທິງທຸກຮູບແບບ ທີ່ສ່ອງແສງເຖິງການດຳລົງຊີວິດຂອງເຜົ່າຊົນຕ່າງໆພາຍໃນແຂວງ.

ຂ່າວ-ພາບ: ພະແນກ ຖວທ ໄຊສົມບູນ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ