ພາຍຫຼັງທີ່ໄດ້ຮັບການອະນຸມັດຈາກກະຊວງສຶກສາທິການ ແລະ ກິລາ ໃນການຮັບຮອງ ແລະ ອະນຸມັດນໍາໃຊ້ຫຼັກສູດປະລິນຍາຕີສາຂາຄູພາສາຈີນຢູ່ສະຖາບັນຂົງຈື (ສຂຈ) ທີ່ມະຫາວິທະຍາໄລແຫ່ງຊາດ ດັ່ງນັ້ນ,ສະຖາບັນຂົງຈືໄດ້ຈັດການສອບເສັງຫຼັກສູດປະລິນຍາຕີ ສຶກສາສາດ ສາຂາຄູພາສາຈີນ ທາງອອນລາຍເປັນຄັ້ງທໍາອິດ ເມື່ອມໍ່ໆມານີ້ໂດຍມີການສອບເສັງວິຊາ ຄະນິດສາດ, ພາສາ-ວັນນະຄະດີ, ພູມມິສາດ, ປະຫວັດສາດ, ພາສາຈີນ ແລະ ພາສາອັງກິດ ນອກນັ້ນຍັງມີພາກສໍາພາດໂດຍສໍາພາດເປັນພາສາຈີນໂດຍອາຈານຄົນຈີນເພື່ອຮັບປະກັນສາມາດຄັດເລືອກໄດ້ນັກສຶກສາທີ່ມີຄຸນນະພາບທີ່ຈະມາເປັນຄູພາສາຈີນ.
ການສອບເສັງຄັ້ງນີ້ມີນັກສຶກສາສະໝັກສອບເສັງທັງໝົດມີ 228 ຄົນ, ມີໜ້າສອບເສັງທັງໝົດ 192 ຄົນ ເຊິ່ງຈະຄັດເລືອກເອົາຕາມໂກຕ້າທີ່ກະຊວງສຶກສາທິການ ແລະ ກິລາ ກໍານົດແມ່ນ 90 ຄົນ ໂດຍຄາດວ່າຈະເປີດການຮຽນການສອນໃນກາງ ຫຼື ທ້າຍເດືອນ ພະຈິກນີ້ ເພື່ອເປັນການປະກອບສ່ວນໃນການສະເຫຼີມສະຫຼອງການສ້າງຕັ້ງມະຫາວິທະຍາໄລແຫ່ງຊາດຄົບຮອບ 25 ປີ ແລະ ການສ້າງຕັ້ງສະຖາບັນຂົງຈືທີ່ ມຊ ຄົບຮອບ 11 ປີ.
ຫຼັກສູດປະລິນຍາຕີ ສຶກສາສາດ ສາຂາຄູພາສາຈີນນີ້ແມ່ນການຮ່ວມມືກັນລະຫວ່າງ ສະຖາບັນຂົງຈື,ຄະນະສຶກສາສາດ ແລະ ອັກສອນສາດ ໂດຍສະຖາບັນຂົງຈືເປັນຜູ້ຈັດຕັ້ງປະຕິບັດບໍ່ວ່າຈະເປັນການຄັດເລືອກນັກສຶກສາ, ການພັດທະນາຫຼັກສູດ, ການຮຽນການສອນຕ່າງໆໂດຍໄດ້ຮັບການສະໜັບສະໜູນ ແລະ ຊ່ວຍເຫຼືອຈາກສູນແລກປ່ຽນຮ່ວມມືພາສາຈີນ-ພາສາຕ່າງປະເທດແຫ່ງຊາດຈີນ ແລະມະຫາວິທະຍາໄລຊົນເຜົ່າກວາງຊີ ສປ.ຈີນ.
ສະຖາບັນຂົງຈືທີ່ມະຫາວິທະຍາໄລແຫ່ງຊາດ ເປັນສະຖາບັນແຫ່ງທໍາອິດຂອງໂລກທີ່ເປີດຫຼັກສູດຄູພາສາຈີນໂດຍປະກາດຮັບ, ຈັດຕັ້ງການສອບເສັງ ແລະ ຈັດການຮຽນການສອນດ້ວຍຕົນເອງເຊິ່ງພາຍໃຕ້ການຊີ້ນໍານໍາພາຂອງມະຫາວິທະຍາໄລແຫ່ງຊາດ ແລະ ການຮ່ວມມືຊ່ວຍເຫຼືອຂອງຄະນະສຶກສາສາດ ແລະ ອັກສອນສາດ. ສະຖາບັນຂົງຈືໃນທົ່ວໂລກມີທັງໝົດ 500 ກວ່າແຫ່ງ ເຊິ່ງການເປີດຫຼັກສູດຄັ້ງນີ້ຖືໄດ້ວ່າເປັນບາດກ້າວໃໝ່ໃນປະຫວັດສາດສະຖາບັນຂົງຈື ແລະ ກໍຖືໄດ້ວ່າເປັນປະຫວັດສາດຂອງວົງການສຶກສາສາຍຄູພາສາຈີນຂອງລາວ.
