ກົມອຸຕຸນິຍົມ ແລະ ອຸທົກກະສາດ ໄດ້ແຈ້ງເຕືອນໃຫ້ ເຝົ້າລະວັງສະພາບນໍ້າຖ້ວມ ໃນວັນທີ 23 ກັນຍາ 2024 ວ່າ: ສະພາບລະດັບນໍ້າ ແມ່ນໍ້າຂ້ອງ ແລະ ແມ່ນໍ້າສາຂາ ຢູ່ແຂວງພາກກາງ ແລະ ພາກໃຕ້ ຍັງສືບຕໍ່ເພີ່ມຂຶ້ນສູງ ເຊັ່ນ: ສະຖານີປາກເຊ, ສະຖານີຂົວເຊ ແລະ ສະຖານີແກ້ງກອກ, ເນື່ອງຈາກ ຝົນ ຍັງສຶບຕໍ່ຕົກ ໃນລະດັບຄ່ອຍ ຫາ ປານກາງ ຢູ່ເກືອບທົ່ວໄປ ແລະ ຈະຕົກໜັກຢູ່ບາງທ້ອງຖິ່ນ ໃນແຕ່ລະ ພາກ ພ້ອມມີລົມພັດແຮງເປັນບາງໂອກາດ ແລະ ຈາກຮ່ອງຄວາມກົດດັນອາກາດຕໍ່າ ຍັງຈະສືບຕໍ່ພາດຜ່ານຢູ່ພາກກາງ ແລະ ພາກໃຕ້ຂອງປະເທດລາວ ສົມທົບກັບກະແສລົມມໍລະສຸມຕາເວັນຕົກ ສ່ຽງໃຕ້ພັດປົກຄຸມ.
ສະພາບລະດັບນໍ້າ ຍັງສືບຕໍ່ເພີ່ມຂຶ້ນສູງ ນັ້ນ, ຂໍໃຫ້ປະຊາຊົນ ທີ່ອາໄສຢູ່ລຽບຕາມ ແຄມແມ່ນໍ້າ ແລະ ເຂດພື້ນທີ່ຕໍ່າ ຕາມລໍານໍ້າ ແມ່ນໍ້າຂອງ ແລະ ແມ່ນໍ້າສາຂາ ເຊັ່ນ: ເຊຈຳພອນ ແລະ ເຊບັ້ງໄຟ ຈົ່ງມີສະຕິລະມັດລະວັງ ຕໍ່ສະພາບຝົນຕົກຕໍ່ເນື່ອງ ທີ່ອາດຈະເຮັດໃຫ້ເກີດນໍ້າຖ້ວມ. ພ້ອມດຽວກັນນັ້ນ, ໃຫ້ມີສະຕິ ຕິດຕາມເຝົ້າລະວັງລະດັບນໍ້າແມ່ນໍ້າຂອງ ສະຖານີປາກເຊ, ນະຄອນປາກເຊ ແຂວງຈຳປາສັກ ອາດຈະເກີດ ມີນໍ້າຖ້ວມຍື່ງ ແລະ ນໍ້າຖ້ວມຂັງ.
