Vientiane Times Lao
<strong>ສະພາບອາກາດ ຍັງສືບຕໍ່ໜາວເຢັນ ທົ່ວທຸກພາກຂອງປະເທດລາວ</strong>

ສະພາບອາກາດ ຍັງສືບຕໍ່ໜາວເຢັນ ທົ່ວທຸກພາກຂອງປະເທດລາວ

ອີງຕາມແຫຼ່ງຂໍ້ມູນປະຈໍາວັນທີ 25​ ມັງກອນ 2023 ຂອງກົມອຸຕຸນິຍົມ ແລະ ອຸທົກກະສາດ ວ່າ: ມວນອາກາດໜາວເຢັນ ຍັງຈະສືບຕໍ່ແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງແຮງ ສົມທົບກັບລົມຕາເວັນອອກສ່ຽງເໜືອທີ່ມີກຳລັງແຮງພັດປົກຄຸມ, ຊຶ່ງຈະເຮັດໃຫ້ອາກາດຈະໜາວເຢັນຢູ່ໃນແຕ່ລະພາກ ພ້ອມມີລົມພັດແຮງຢູ່ທົ່ວໄປ ແລະ ອາກາດຈະໜາວເຢັນຫຼາຍຢູ່ແຂວງພາກເໜືອ, ແຂວງ ໄຊສົມບູນ ແລະ ເຂດພູພຽງບໍລະເວນ ພ້ອມມີໝອກໜາປົກຫຸ້ມຢູ່ທົ່ວໄປໃນຕອນເຊົ້າ​ ແລະ ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນ.​

ກົມອຸຕຸນິຍົມ ແລະ ອຸທົກກະສາດ ໄດ້ລະບຸອີກວ່າ: ພະຍາກອນອາກາດ ເວລາ 7:00 ໂມງ ຂອງວັນທີ 25 ມັງກອນ 2023 ເຖິງເວລາ 7:00 ໂມງ ຂອງວັນທີ 26 ມັງກອນ 2023 ທົ່ວທຸກພາກຂອງປະເທດລາວ ມີດັ່ງນີ້:

ພາກເໜືອດ້ານຕາເວັນອອກ: (ແຂວງ ຜົ້ງສາລີ, ຫົວພັນ ແລະ ຊຽງຂວາງ ) ອາກາດຈະໜາວເຢັນຫຼາຍ ພ້ອມຈະມີລົມພັດແຮງຢູ່ທົ່ວໄປ​ ແລະ ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນ ຫຼື ເນື້ອທີ່ການປົກຫຸ້ມຂອງຝົນເທົ່າກັບ 15% ຊຶ່ງອຸນຫະພູມໃນລະຫວ່າງ 7–21 ອົງສາ.​

ພາກເໜືອດ້ານຕາເວັນຕົກ (ແຂວງ ຫຼວງນ້ໍາທາ, ບໍ່ແກ້ວ, ອຸດົມໄຊ, ຫຼວງພະບາງ ແລະ ໄຊຍະບູລີ) ອາກາດໜາວເຢັນ ຫາ ໜາວເຢັນຫຼາຍ, ພ້ອມມີໝອກໜາປົກຫຸ້ມຢູ່ທົ່ວໄປໃນຕອນເຊົ້າ ແລະ ຈະມີລົມພັດແຮງຢູ່ທົ່ວໄປ ຊຶ່ງອຸນຫະພູມໃນລະຫວ່າງ 0–27 ອົງສາ.

ນະຄອນຫຼວງວຽງຈັນ ອາກາດຈະເຢັນ ຫາ ໜາວເຢັນ ພ້ອມມີໝອກບາງປົກຫຸ້ມຢູ່ທົ່ວໄປໃນຕອນເຊົ້າ ແລະ ຈະມີລົມພັດແຮງຢູ່ທົ່ວໄປ ຊຶ່ງອຸນຫະພູມໃນລະຫວ່າງ 15–28 ອົງສາ.

ພາກກາງ (ແຂວງ ວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ) ອາກາດຈະໜາວເຢັນ, ພ້ອມມີໝອກບາງປົກຫຸ້ມຢູ່ທົ່ວໄປໃນຕອນເຊົ້າ ແລະ ຈະມີລົມພັດແຮງຢູ່ທົ່ວໄປ ຊຶ່ງອຸນຫະພູມໃນລະຫວ່າງ 12 – 30 ອົງສາ.

ແຂວງໄຊສົມບູນ: ອາກາດໜາວເຢັນຫຼາຍ ພ້ອມມີໝອກໜາປົກຫຸ້ມໃນຕອນເຊົ້າ ແລະ ຈະມີລົມພັດແຮງຢູ່ທົ່ວໄປ ຊຶ່ງ ອຸນຫະພູມໃນລະຫວ່າງ 6–23 ອົງສາ.

ພາກໃຕ້(ແຂວງສາລະວັນ, ເຊກອງ, ຈຳປາສັກ ແລະ ອັດຕະປື): ອາກາດຈະເຢັນ ຫາ ໜາວເຢັນ ພ້ອມມີໝອກບາງປົກຫຸ້ມຢູ່ທົ່ວໄປໃນຕອນເຊົ້າ ແລະ ຈະມີລົມພັດແຮງຢູ່ທົ່ວໄປ ຊຶ່ງອຸນຫະພູມໃນລະຫວ່າງ 15–31 ອົງສາ.

ສຳລັບ ເຂດພູພຽງບໍລະເວນ  ອາກາດຈະໜາວເຢັນຫຼາຍ ພ້ອມມີລົມພັດແຮງຢູ່ທົ່ວໄປ ແລະ ຈະມີຝົນຕົກໃນລະດັບຄ່ອຍຢູ່ບາງບໍລິເວນ ຫຼື​ ເນື້ອທີການປົກຫຸ້ມຂອງຝົນເທົ່າກັບ 15% ຊຶ່ງອຸນຫະພູມໃນລະຫວ່າງ 7–24 ອົງສາ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ