ສະພາແຫ່ງຊາດລາວ ໄດ້ຈັດກອງປະຊຸມພົບປະສອງຝ່າຍ ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດ ອໍານາດປະຊາຊົນ ແຫ່ງ ສາທາລະລັດ ກູບາ ໃນມື້ວານນີ້ ທີ່ຫ້ອງປະຊຸມຄະນະປະຈໍາສະພາແຫ່ງຊາດໂດຍການເຂົ້າຮ່ວມຂອງ ທ່ານໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສະພາແຫ່ງຊາດ ແຫ່ງ ສປປ ລາວ ພ້ອມດ້ວຍຄະນະ, ແລະ ທ່ານເອສເຕບານລາໂຊ ເຮນານເດສ ກໍາມະການກົມການເມືອງສູນກາງພັກກອມມູນິດກູບາ ປະທານສະພາແຫ່ງຊາດ ອໍານາດປະຊາຊົນ ແຫ່ງ ສ ກູບາ ພ້ອມດ້ວຍຄະນະ ຊຶ່ງ ສອງຝ່າຍໄດ້ສົນທະນາ ແລະ ປຶກສາຫາລືກັນຫຼາຍດ້ານໂດຍສະເພາະວຽກງານສະພາ.
ທ່ານໄຊສົມພອນ ພົມວິຫານ ໄດ້ສະເໜີທິດທາງການພົວພັນຮ່ວມມື ລະຫວ່າງ ສອງອົງການນິຕິບັນຍັດ ໃນຕໍ່ໜ້າທທີ່ກອງປະຊຸມວ່າ: ຈະສືບຕໍ່ລົງນາມຮ່ວມກັນຈັດຕັ້ງບົດບັນທຶກ ວ່າດ້ວຍການຮ່ວມມື ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດ ອຳນາດປະຊາຊົນ ແຫ່ງ ສ ກູບາ ສະບັບໃໝ່ ເປັນຕົ້ນ ການແລກປ່ຽນຄະນະຜູ້ແທນ ໃນລະດັບປະທານສະພາ, ຮອງປະທານ, ກຳມາທິການ, ຄະນະເລຂາທິການ, ຄະນະມິດຕະພາບລັດຖະສະພາ ລາວ-ກູບາ ໄປພ້ອມກັບການແລກປ່ຽນຂໍ້ມູນ-ຂ່າວສານ, ບົດຮຽນກ່ຽວກັບການຈັດຕັ້ງປະຕິບັດພາລະບົດບາດດ້ານນິຕິບັນຍັດ ແລະ ຈັດສໍາມະນາໃນຫົວຂໍ້ຕ່າງໆ ທີ່ສອງຝ່າຍມີຄວາມສົນໃຈ ຕາມເງື່ອນໄຂທີ່ເໝາະສົມ, ຈະສືບຕໍ່ຊຸກຍູ້ໃຫ້ລັດຖະບານ ຂອງສອງປະເທດ ຈັດຕັ້ງປະຕິບັດບັນດາສັນຍາ, ສົນທິສັນຍາ, ຂໍ້ຕົກລົງ ແລະ ບົດບັນທຶກຄວາມເຂົ້າໃຈ ທີ່ໄດ້ຕົກລົງຮ່ວມກັນ ໃຫ້ເປັນຮູບປະທຳ ແລະ ມີປະສິດຜົນດີຂຶ້ນກວ່າເກົ່າ ເປັນຕົ້ນ ໃນຂົງເຂດການຄ້າ-ການລົງທຶນ, ສາທາລະນະສຸກ, ກະສິກໍາ, ສຶກສາ-ກິລາ, ທະນາຄານ ແລະ ຂົງເຂດຕຸລາການ ໃຫ້ແຕກດອກອອກຜົນຍິ່ງຂຶ້ນ ເພື່ອນໍາຜົນປະໂຫຍດມາສູ່ປະຊາຊົນສອງຊາດ ລາວ-ກູບາ, ຈະສືບຕໍ່ສະໜັບສະໜູນ ແລະ ຮ່ວມມືກັນ ໃນການເຄື່ອນໄຫວໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນ AIPA, IPU ແລະ ອື່ນໆ, ເພື່ອປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາແບບຍືນຍົງໃນພາກພື້ນ ແລະ ສາກົນ.
ໂອກາດດັ່ງກ່າວ, ສອງຝ່າຍ ໄດ້ຮ່ວມລົງນາມບົດບັນທຶກ ວ່າດ້ວຍການຮ່ວມມື ລະຫວ່າງ ປະທານສະພາແຫ່ງຊາດ ແຫ່ງ ສປປ ລາວ ແລະ ປະທານສະພາແຫ່ງຊາດ ອໍານາດປະຊາຊົນ ແຫ່ງ ສ ກູບາ.
ສປປ ລາວ ແລະ ສ ກູບາ ມີການຮ່ວມມືກັນໃນຂະແໜງການທີ່ສອງຝ່າຍມີທ່າແຮງເຊັ່ນ: ກະສິກໍາ, ສາທາລະນະສຸກ, ການສຶກສາ-ກິລາ, ວັດທະນະທໍາ, ຂ່າວສານ, ຂົງເຂດຕຸລາການ ແລະ ອື່ນໆ.
