ຄະນະບໍລິຫານ ພ້ອມດ້ວຍສະມາຊິກສະມາຄົມປ້າຍລາວ ໄດ້ເດີນທາງໄປຮ່ວມງານວາງສະແດງໂຄສະນາ ແລະ ປ້າຍ ໃນລະຫວ່າງວັນທີ 7-10 ພະຈິກ 2024 ທີ່ຜ່ານມານີ້ ຢູ່ເມືອງທອງທານີ ນະຄອນຫຼວງບາງກອກ ປະເທດໄທ ຕາມການເຊື້ອເຊີນຈາກຜູ້ຈັດງານວາງສະແດງດັ່ງກ່າວ.
ສະມາຄົມປ້າຍລາວໄປຮ່ວມງານໃນຄັ້ງນີ້ນຳພາໂດຍ ທ່ານສົມພົງ ໂພທິສານ ຮອງປະທານສະມາຄົມປ້າຍລາວ ແລະ ສະມາຊິກສະມາຄົມປ້າຍລາວ ທີ່ມາຈາກຫົວໜ່ວຍການຜະລິດປ້າຍທົ່ວປະເທດ ເກືອບ 40 ທ່ານເຂົ້າຮ່ວມ.
ພາຍຫຼັງທີ່ເປີດງານແລ້ວ, ເຈົ້າພາບຍັງໄດ້ໃຫ້ກຽດເຊື້ອເຊີນຕາງໜ້າຄະນະຜູ້ແທນສະມາຄົມປ້າຍລາວ ໂດຍທ່ານສົມພົງ ໂພທິສານກ່າວໂດຍມີເນື້ອໃນບາງຕອນທີ່ສໍາຄັນວ່າ: ຂໍສະແດງຄວາມຂອບໃຈ ແລະ ຮູ້ບຸນຄຸນ ທີ່ທາງເພື່ອນປ້າຍໄທ ໄດ້ຕ້ອນຮັບຢ່າງອົບອຸ່ນ ແລະ ຍັງຈະເຮັດກິດຈະກຳແບ່ງປັນຄວາມຮູ້ ຫຼາຍຢ່າງແກ່ທາງຄະນະປ້າຍລາວອີກດ້ວຍ.
ນອກນັ້ນ, ສະມາຊິກສະມາຄົມປ້າຍລາວ ຍັງຈະໄດ້ໄປຢ້ຽມຊົມງານວາງສະແດງ ແລະ ຢ້ຽມຊົມຖານການຜະລິດປ້າຍຈຳນວນໜຶ່ງອີກດ້ວຍ.
