Vientiane Times Lao
ສະຫວັນນະເຂດສົ່ງເສີມການທ່ອງທ່ຽວ:ສໍາຜັດມໍລະດົກທ້ອງຖິ່ນຜ່ານ ຮູບແຕ້ມຕາມຝາຕຶກອາຄານແລະເຮືອນເກົ່າ

ສະຫວັນນະເຂດສົ່ງເສີມການທ່ອງທ່ຽວ:ສໍາຜັດມໍລະດົກທ້ອງຖິ່ນຜ່ານ ຮູບແຕ້ມຕາມຝາຕຶກອາຄານແລະເຮືອນເກົ່າ

ຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງ ສະຫວັນນະເຂດ, ທ່ານ ໂພສີສ້ອຍ ກຸທິລາດ ໄດ້ໃຫ້ສໍາພາດຕໍ່ນັກຂ່າວ CMG ປະຈໍາລາວໃນ ວັນທີ 24 ມັງກອນ 2023 ນີ້ວ່າ: ແຂວງສະຫວັນນະເຂດໄດ້ຟື້ນຟູ ແລະ ສົ່ງເສີມການທ່ອງທ່ຽວ ພາຍຫຼັງສປປ ລາວເປີດປະເທດ ເພື່ອໃຫ້ກັບຄືນມາຄຶກຄື້ນຄືເມື່ອກ່ອນ, ໜຶ່ງໃນກິດຈະກໍາເພື່ອດຶງດູດນັກທ່ອງທ່ຽວແມ່ນສໍາຜັດມໍລະດົກທ້ອງຖິ່ນຜ່ານຮູບແຕ້ມຕາມຝາຕຶກອາຄານແລະເຮືອນເກົ່າ ທີ່ໄດ້ແຕ້ມໃສ່ຂ້າງຝາຕຶກອາຄານເຂດຕົວເມືອງເກົ່າ ປະກອບມີຮູບພາບທັງໝົດ 12 ຮູບບົ່ງບອກເຖິງວິຖີການກໍ່ສ້າງທີ່ຢູ່ອາໄສ, ການດໍາລົງຊີວິດ, ພາບລຸງສອນຫຼານ, ການສານຕິບເຂົ້າແລະອື່ນໆ

ທ່ານ ໂພສີສ້ອຍ ກ່າວຕື່ມວ່າ: ພາບທີ່ໂດດເດັ່ນແມ່ນພາບທ່ານປະທານໄກສອນ ພົມວິຫານ ວິລະບູລຸດແຫ່ງຊາດລາວເປັນຜູ້ສອນຫຼານ ເພື່ອເຮັດໃຫ້ລູກຫຼານໄດ້ມີຄວາມກະຕັນຍູຮູ້ຄຸນ ໂດຍໄດ້ຖືກແຕ້ມຢູ່ທີ່ຝາໂຮງຮຽນປະຖົມໄຊຍະພູມ ເຊິ່ງເປັນຈຸດເລີ່ມຕົ້ນຂອງປະທານໄກສອນ ພົມວິຫານທີ່ເຄີຍຮຽນຢູ່ໂຮງຮຽນແຫ່ງນີ້. ການອອກແບບສິລະປະ ແລະ ແຕ້ມໃສ່ຝາພະໜັງຂອງອາຄານ ແລະ ເຮືອນເກົ່າ ພາບແຕ່ລະພາບແມ່ນໄດ້ສ່ອງແສງໃຫ້ເຫັນເຖິງ ພາບບັນຍາກາດທີ່ຫາເບິ່ງໄດ້ຍາກຂອງວິຖິຊີວິດຊາວເມືອງໃນເມືອກ່ອນ ເພື່ອໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ມີສ່ວນຮ່ວມໃນການຫຼິ້ນ ແລະ ຖ່າຍຮູບ ເກັບໄວ້ເປັນທີ່ລະນຶກໃນການມາຢ້ຽມຢາມແຂວງສະຫວັນນະເຂດ ກໍ່ຄືຕົວເມືອງເກົ່າ ເມື່ອກ່ອນເຄີຍເອີ້ນວ່າ ເມືອງຄັນທະບູລີ ໃຫ້ກັບມາມີຊີວິດຊີວາອີກຄັ້ງ.

ປະຈຸບັນ, ແຂວງສະຫວັນນະເຂດຂື້ນບັນຊີອາຄານເຮືອນເກົ່າໄດ້ຈໍານວນ 184 ຫຼັງ, ແຍກເປັນ 3 ປະເພດຄື: ປະເພດ 1: ຈໍານວນ 8 ຫຼັງ ປະເພດ 2 ມີ 12 ຫຼັງ ແລະ ປະເພດ 3 ມີ 163 ຫຼັງ ແລະ ໄດ້ຂື້ນທະບຽນຮັບຮອງເປັນມໍລະດົກລະດັບທ້ອງຖິ່ນໃນອາຄານປະເພດ 1 ຈໍານວນ 8 ຫຼັງ, ໄດ້ປັບປຸງ ແລະ ພັດທະນາອາຄານເກົ່າ ແລະ ເສັ້ນທາງຍ່າງຂອງນັກທ່ອງທ່ຽວ ແລະເຂດອື່ນ.

ຂ່າວ: CRI-MF93

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ