Vientiane Times Lao
ສະຫະພັນເປຕັງລາວຈະດຳເນີນການຕາມຂັ້ນຕອນຕໍ່ພຶດຕິກຳທີ່ບໍ່ ເໝາະສົມຂອງປະທານເປຕັງນານາຊາດ

ສະຫະພັນເປຕັງລາວຈະດຳເນີນການຕາມຂັ້ນຕອນຕໍ່ພຶດຕິກຳທີ່ບໍ່ ເໝາະສົມຂອງປະທານເປຕັງນານາຊາດ

ສະຫະພັນເປຕັງແຫ່ງຊາດລາວຈະປະກອບເອກະສານຕາມຂັ້ນຕອນໄປຍັງອົງການແລະ ພາກສ່ວນທີ່ກ່ຽວຂ້ອງ ໃນກໍລະນີທີ່ມີພຶດຕິກຳທີ່ບໍ່ເໝາະສົມຂອງ ປະທານສະຫະພັນເປຕັງນານາຊາດ Claude Azema ທີ່ໄດ້ວາງ ຂັນລາງວັນຂອງທີມຊາດລາວລົງພື້ນ ໃນເວລາມອບລາງວັນ ທີ່ປະເທດກຳປູເຈຍ.

ທ່ານ ຄຳຫຼ້າ ວິນໄລທອງ ປະທານ ສະຫະພັນເປຕັງແຫ່ງຊາດລາວໄດ້ໃຫ້ສຳພາດ ໃນມື້ນີ້ 27 ພະຈິກ 2019 ວ່າ ພາຍຫຼັງທີ່ພວກເຮົາກັບ ມາຈາກ ການແຂ່ງຂັນຊີເກມທີ່ປະເທດຟີລິບປິນແລ້ວ ພວກເຮົາຈະເຮັດ ໜັງສືສະເໜີໄປຍັງພາກສ່ວນທີ່ກ່ຽວຂ້ອງໂດຍສະເພາະ ກະຊວງສຶກສາ, ຫ້ອງການສຳນັກງານນາຍົກລັດຖະມົນຕີ, ກະຊວງການຕ່າງປະເທດ ແລະ ພາກສ່ວນອື່ນໆ ກ່ອນຈະເອົາເອກະສານໄປອົງການທີ່ກ່ຽວຂ້ອງ ເພື່ອໃຫ້ອະທິບາຍ ເຫດຜົນວ່າ ເປັນຫຍັງປະທານສະຫະພັນເປຕັງນານາຊາດຈຶ່ງສະແດງພຶດຕິກໍາ ແບບນັ້ນຕໍ່ນັກກິລາເປຕັງຍິງທີມຊາດຂອງພວກເຮົາ ແລະ ຈະຊອກຫາວິທີທາງບໍ່ ໃຫ້ເຫດການດັ່ງກ່າວໄດ້ເກີດຂຶ້ນອີກ.

ທ່ານ ຄຳຫຼ້າ ກ່າວຕື່ມອີກວ່າ ສາເຫດ ທີ່ເກີດເຫດການນີ້ ອາດຈະມາຈາກທີມເປ ຕັງຍິງ A ແລະ B ຂອງຝຣັ່ງ ເສຍໃຫ້ທີມເປຕັງຍິງຂອງລາວໃນຮອບຄັດເລືອກ, ສະນັ້ນນີ້ກໍ່ອາດເປັນໜຶ່ງເຫດຜົນທີ່ເຮັດໃຫ້ປະທານສະຫະພັນ ເປຕັງນານາຊາດ ໄດ້ເຮັດແບບນັ້ນ ເຊິ່ງທ່ານ Claude Azema ເປັນຄົນຝຣັ່ງ.

ພຶດຕິກຳທີ່ບໍ່ເໝາະສົມຂອງປະທານສະຫະພັນເປຕັງນານາຊາດ ທີ່ໄດ້ປະຕິບັດຕໍ່ກັບນັກກິລາທີມຊາດລາວ ແມ່ນ ໃນເວລາມອບລາງວັນໃຫ້ ຮອງແຊ້ມໂລກ ປະເພດທີມຊຸດຍິງ ໃນການແຂ່ງຂັນກິລາເປຕັງຊີງແຊ້ມ ໂລກຄັ້ງທີ 17 ທີ່ປະເທດ ກຳປູເຈຍ ໃນວັນທີ 23 ພະຈິກ 2019, ທີມຊາດລາວດັ່ງກ່າວ ມີທັງໝົດ 4 ຄົນ ແລະ ບັນດາຄູຝຶກ ໄດ້ຢືນລໍຖ້າການຮັບລາງວັນທີ່ ແທ່ນອັນດັບສອງ ພ້ອມກັບທີມຊາດໄທ ທີ່ໄດ້ແຊ້ມໂລກ ແລະ ທີມເຈົ້າພາບທີ່ໄດ້ອັນດັບສາມ ຂອງການແຂ່ງຂັນດັ່ງກ່າວ. ທ່ານປະທານເປຕັງນານາຊາດ Claude Azema ຊຶ່ງເປັນຄົນສັນຊາດຝຣັ່ງ ໄດ້ໃຫ້ກຽດຂຶ້ນມາມອບຫຼຽນເງິນໃຫ້ແລ້ວ, ຈາກນັ້ນ ເພິ່ນກໍ່ໄດ້ມອບຂັນ ສາມໜ່ວຍໃຫ້ກັບມືຂອງນັກກິລາຍິງຄົນອື່ນ ແຕ່ເມື່ອມາຮອດ ນາງ ໂບວິລັກ ເທບພະກັນ ນັກກິລາເປຕັງຍິງທີມຊາດລາວຜູ້ສຸດທ້າຍ ທ່ານ Azema ຊໍ້າພັດວາງຂັນຂອງ ໄວ້ຢູ່ເທິງພື້ນແທ່ນດັ່ງກ່າວ ເຮັດໃຫ້ມີຫາງສຽງວິພາກວິຈານຫຼາຍໃນສື່ສັງຄົມອອນລາຍ.

ນາງ ໂບວິລັກ ກ່າວໃນຕອນເຊົ້້າມື້ນີ້ວ່າ: ເຫດການດັ່ງກ່າວເຮັດໃຫ້ນ້ອງຊຶງໄປໜ້ອຍໜຶ່ງ ແລະ ກໍ່ແປກໃຈຫຼາຍວ່າ ເພິ່ນຄືເຮັດຈັ່ງຊັ້ນ. “ນ້ອງເອງກໍ່ເສຍໃຈທີ່ພົບເຫດການເຊັ່ນນັ້ນ, ແຕ່ນ້ອງກໍ່ບໍ່ໄດ້ໃສ່ໃຈຫຍັງກັບພຶດຕິກຳຂອງ ທ່ານປະທານເປຕັງນານາຊາດ ຄົນນີ້. ເວລາທີ່ເພິ່ນວາງລົງແທ່ນແລ້ວ ເພິ່ນກໍ່ເວົ້າໜ້ອຍໜຶ່ງແຕ່ນ້ອງບໍ່ເຂົ້າໃຈພາສາຂອງເພິ່ນວ່າເວົ້້າຢອກຫຼືເວົ້້າຫຍັງ.

ເຖິງແມ່ນວ່າ ນາງ ໂບວິລັກ ຈະບໍ່ໄດ້ໃສ່ໃຈກັບເຫດການທີ່ເກີດຂຶ້ນ, ແຕ່ເຊື່ອວ່າພາບວີດີໂອຄລິບທີ່ອອກມາຜ່ານສື່ສັງຄົມອອນລາຍນັ້ນ ເຮັດໃຫ້ມີສຽງວິພາກວິຈານຈາກຄົນລາວຫຼາຍຄົນ ເຖິງເລື່ອງສັກສີຂອງຊາດລາວ ບໍ່ແມ່ນຈະໃຫ້ຄົນອື່ນມາດູຖູກດູໝິ່ນປະໝາດໄດ້.

ຄະນະນັກກິລາເປຕັງທີມຊາດລາວໄດ້ເຂົ້າຮ່ວມການແຂ່ງຂັນກິລາເປຕັງຊີງແຊ້ມ ໂລກ ຄັ້ງທີ 17 ທີ່ປະເທດ ກຳປູເຈຍ ໃນວັນທີ 17-24 ພະຈິກ 2019 ແລະ ສ້າງຜົນງານໄດ້ເກີນຄາດໝາຍຄື ໄດ້ຮັບລາງວັນຮອງແຊ້ມໂລກ ອັນດັບ 2 ປະເພດ ທີມຊຸດຕີຍິງ, ຮອງແຊ້ມໂລກ ອັນດັບ 2 ປະເພດ ທີມຊຸດເຍົາວະຊົນ ແລະ ຮອງແຊ້ມ ໂລກ ອັນດັບ 2 ປະເພດທີມຊຸດຍິງ.

ຂ່າວ: ສຸກນີລັນດອນ

ພາບ: ສະຫະພັນເປຕັງແຫ່ງຊາດລາວ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ