Vientiane Times Lao
ສະຫາຍ ພົທ ວິໄລ ຫຼ້າຄຳຟອງ ເປັນເລຂາຄະນະບໍລິຫານງານພັກກະຊວງປ້ອງກັນຄວາມສະຫງົບອີກໜຶ່ງສະໄໝ

ສະຫາຍ ພົທ ວິໄລ ຫຼ້າຄຳຟອງ ເປັນເລຂາຄະນະບໍລິຫານງານພັກກະຊວງປ້ອງກັນຄວາມສະຫງົບອີກໜຶ່ງສະໄໝ

ຄະນະ​ບໍລິຫານ​ງານ​ພັກ​ກະຊວງ​ປ້ອງ​ກັນ​ຄວາມ​ສະຫງົບ​ຊຸດ​ໃໝ່ ຈຳນວນ 27 ສະຫາຍ ໃນ​ຈຳນວນ​ຜູ້​ລົງ​ສະໝັກ 31 ສະຫາຍ, ໄດ້ມີການເລືອກ​ຕັ້ງທີ່ກອງປະຊຸມໃຫ່ຍຜູ້ແທນ ຄັ້ງທີ V ຂອງອົງຄະນະພັກ ກະຊວງ​ປ້ອງ​ກັນ​ຄວາມສະ ຫງົບ (ປກ​ສ) ທີ່ໄດ້ຈັດຂຶ້ນເມື່ອບໍ່ດົນມານີ້ ໂດຍເປັນ​ປະທານ​ຂອງ ​ເລຂາ ທິການ​ສູນ​ກາງ​ພັກ, ເລຂາ​ຄະນະພັກ​ກະຊວງ, ລັດຖະມົນຕີ​ກະຊວງ ປກສ ສະຫາຍ ພົທ ວິໄລ ຫຼ້າ​ຄຳ​ຟອງ ແລະ ເປັນ​ກຽດ​ເຂົ້າ​ຮ່ວມ​ຂອງ​ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫ່ຍ ຄະນະ​ບໍລິຫານ​ງານ​ສູນ​ກາງ​ພັກ ປະທານ​ປະເທດ ແຫ່ງ ສປປ ລາວ, ຜົນການເລືອກຕັ້ງປະກົດວ່າສະຫາຍ ພົທ ວິໄລ ຫຼ້າ​ຄຳ​ຟອງ ໄດ້ເປັນ​ເລຂາ​ຄະນະ​ບໍລິຫານ​ງານ​ພັກ​ກະຊວງ​ປ້ອງ​ກັນ​ຄວາມ​ສະຫງົບອີກໜຶ່ງສະໄໝ.

ການໃຊ້​ສິດ ປະຊາທິປະໄຕ​ປ່ອນ​ບັດ​ເລືອກ​ຕັ້ງ​ເອົາ​ຄະນະ​ບໍລິຫານ ​ງານ​ພັກ​ກະຊວງ​ປ້ອງ​ກັນ​ຄວາມ​ສະຫງົບ​ຊຸດ​ໃໝ່ ໃນຄັ້ງນີ້ກໍ່ເພື່ອເປັນໃຈ​ກາງ​ແຫ່ງ​ການ​ເຕົ້າໂຮມ​ຄວາມ​ສາມັກຄີ​ເປັນ​ເອກະ​ພາບ​ພາຍ​ໃນ​ກຳລັງ​ປ້ອງ​ກັນ​ຄວາມ​ສະຫງົບ, ປັບປຸງ​ກໍ່ສ້າງ​ພັກ​ໃຫ້​ປອດ​ໃສ, ເຂັ້ມແຂງ, ໜັກ​ແໜ້ນ ແລະ ອື່ນໆ.

ຄະນະ​ບໍລິຫານ​ງານ​ພັກ​ກະຊວງ​ປ້ອງ​ກັນ​ຄວາມ​ສະຫງົບ​ຊຸດ​ໃໝ່ ຈຳນວນ 27 ສະຫາຍ ປະກອບມີ ສະຫາຍ ພົທ ວິໄລ ຫຼ້າ​ຄຳ​ຟອງ ເປັນ​ເລຂາ​ຄະນະ​ພັກ, ສະຫາຍ ພົຕ ກົງ​ທອງ ພົງ​ວິຈິດ ເປັນ​ຮອງ​ເລຂາ​ຄະນະ​ພັກ, ສະຫາຍ ພົຕ ວັນ​ທອງ ກອງ​ມະນີ ເປັນ​ຮອງ​ເລຂາ​ຄະນະ​ພັກ, ສະຫາຍ ພົຕ ປອ ທອງ​ເຫຼັກ ມັງ​ໜໍ່​ເມກ ເປັນ​ປະ ທານ​ກວດກາ, ສະຫາຍ ພັອ ຄຳ​ຜາ​ສິດ ບົງ​ມູນ​ທອງ ເປັນ​ຮອງ​ປະທານ​ກວດກາ​ພັກ, ສະຫາຍ ພັອ ພູທອນ ວົງ​ພະ​ໄຕ ເປັນ​ຮອງ​ປະທານ​ກວດກາ​ພັກ, ສະຫາຍ ບຸນ​ລຽນ ສີສະ​ອາດ ເປັນ​ຮອງ​ປະທານ​ກວດກາ​ພັກ ແລະ ຜູ້ອື່ນໆ.

​ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫ່ຍ ຄະນະ​ບໍລິຫານ​ງານ​ສູນ​ກາງ​ພັກ, ປະທານ​ປະເທດ ແຫ່ງ ສປປ ລາວໄດ້ໂອ້ລົມກັບ​ຄະນະ​ບໍລິຫານ​ງານ​ພັກ​ກະຊວງ ປກສ ລວມ​ທັງ​ຄະນະ​ພັກ​ແຕ່​ລະ​ຂັ້ນວ່າ: ຈົ່ງ​ເອົາໃຈໃສ່ເພີ່ມ​ທະວີ​ວຽກ​ງານ​ສຶກສາ​ອົບຮົມ​ແນວ​ຄິດ​ດ້ວຍ​ຫຼາຍ​ຮູບ​ຫຼາຍ​ສີ, ເຮັດ​ໃຫ້​ນາຍ ແລະ ພົນ​ຕຳຫຼວດ​ໃນ​ກຳລັງ​ປ້ອງ​ກັນ​ຄວາມ​ສະຫງົບ​ຢຶດໝັ້ນ​ອຸດົມ​ການ​ສັງຄົມ​ນິຍົມ, ມີ​ຫຼັກ​ໝັ້ນ​ຊົນ​ຊັ້ນ​ໜັກ​ແໜ້ນ, ມີ​ຄວາມ​ຈົ່ງ​ຮັກ​ພັກດີ​ຕໍ່​ພັກ, ຕໍ່​ການ​ປະຕິວັດ, ຕໍ່​ປະເທດ​ຊາດ ແລະ ຕໍ່​ປະຊາຊົນ​ຢ່າງ​ບໍ່​ມີ​ເງື່ອນໄຂ ຄຽງ​​ຄູ່​ກັນ​ນັ້ນ​ກໍ​ຕ້ອງ​ເພີ່ມ​ທະວີ​ຄວາມ​ສາມັກຄີ​​ພາຍ​ໃນ​ໃຫ້​ແໜ້ນ​ແຟ້ນ ປະຕິບັດ​ບັນດາ​ແຜນ ​ງານ ແລະ ໂຄງການ​ຕ່າງໆ ​ໃຫ້​ສຳເລັດ​ຕາມ​ລະດັບ​ຄາດ ໝາຍ​ທີ່​ວາງ​ໄວ້​ແຕ່​ລະ​ໄລ​ຍະ.

ຂ່າວ: ວຽງຈັນທາຍ

​ພາບ-ຂໍ້ມູນ: ປກສ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ