ຄະນະສານອາຍາສານປະຊາຊົນຂັ້ນຕົ້ນ ແຂວງອຸດົມໄຊ ໄດ້ພິຈາລະນາຕັດສິນປະຫານຊີວິດ ທ້າວ ຈືຢີວ້າ ອາຍຸ 38 ປີ ປະຊາຊົນຢູ່ບ້ານກິວເຮັຍ ເມືອງໄຊ ແຂວງອຸດົມໄຊ ໃນຂໍ້ຫາຜະລິດ-ຂົນສົ່ງຢາບ້າ ແລະ ມີຢາບ້າໄວ້ໃນຄອບຄອງ ຈໍານວນ 72 ມັດ ມີ 144.000 ເມັດ ລວມນໍ້າໜັກ 14,4 ກິໂລກຣາມ, ໃນວັນທີ 8 ກັນຍາ 2023 ຜ່ານມານີ້.
ຕາງໜ້າອົງການໄອຍະການປະຊາຊົນ ແຂວງອຸດົມໄຊ ໄດ້ຖະແຫຼງໃຫ້ຮູ້ວ່າ: ໃນວັນທີ 29 ມັງກອນ 2022, ເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງອຸດົມໄຊ ໄດ້ຮັບລາຍງານຈາກແຫຼ່ງຂ່າວວ່າ: ມີກຸ່ມຄົນບໍ່ດີຈໍານວນໜຶ່ງ ມີແຜນເຄື່ອນຍ້າຍຢາເສບຕິດ ຢູ່ເຂດບ້ານພູສະຫວັນ ເມືອງໄຊ ແຂວງອຸດົມໄຊ ຈຶ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະ ອອກເຄື່ອນໄຫວຕິດຕາມຢູ່ຈຸດດັ່ງກ່າວ, ພໍຮອດເວລາ 2:00 ໂມງເຊົ້າ ຂອງວັນທີ 30 ມັງກອນ 2022 ເຈົ້າໜ້າທີ່ ສາມາດກັກຕົວເປົ້າໝາຍໄດ້ 1 ຄົນ ຊື່ ທ້າວ ຈືຢີວ້າ ພ້ອມຂອງກາງຢາບ້າ ຈໍານວນ 72 ມັດ ມີ 144.000 ເມັດ.
ຜ່ານການສືບສວນ-ສອບສວນ ຈໍາເລີຍໃຫ້ການຮັບສາລະພາບ ວ່າ: ຢາບ້າຈໍານວນດັ່ງກ່າວ ແມ່ນຂອງຕົນແທ້. ດັ່ງນັ້ນ, ຄະນະສານອາຍາ ສານປະຊາຊົນຂັ້ນຕົ້ນ ແຂວງອຸດົມໄຊ ຈຶ່ງໄດ້ພິຈາລະນາລົງໂທດປະຫານຊີວິດຈໍາເລີຍຕາມລະບຽບກົດໝາຍ ພ້ອມທັງຮິບລົດຈັກຍີ່ຫໍ້ HONDA WAVE ສີແດງ ບໍ່ມີປ້າຍທະບຽນຂອງຈຳເລີຍ ທີ່ມີສ່ວນກ່ຽວຂ້ອງກັບຄະດີ ມາເປັນຂອງລັດ ແລະ ຮິບຢາເສບຕິດທັງໝົດ ມາທຳລາຍຖິ້ມ.
ແຫຼ່ງຂ່າວ: ປກສ
