Visit BigblueAgency
ສາລະວັນກຽມທິມແພດສຸກເສີນ ປະຈຳການ 24 ຊົ່ວໂມງເພື່ອຮັບມືກັບໂຄວິດ-19

ສາລະວັນກຽມທິມແພດສຸກເສີນ ປະຈຳການ 24 ຊົ່ວໂມງເພື່ອຮັບມືກັບໂຄວິດ-19

ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ-19 ແຂວງສາລະວັນ ກຽມຄວາມພ້ອມ ຫຼາຍ ດ້ານເພື່ອຮັບມືກັບການລະບາດຂອງ ພະຍາດໂຄວິດ-19 ຮອບໃໝ່ ໂດຍສະເພາະທີ່ອາດຈະມີການແຜ່ເຊື້ອຈາກແຮງງານລາວ ທີ່ກັບຈາກປະເທດເພື່ອນບ້ານ ເປັນຈຳນວນຫຼາຍໃນແຕ່ລະວັນ ໂດຍມີທິມແພດສຸກເສີນ ປະຈຳການຕະຫຼອດ 24 ຊົ່ວໂມງ. ຮອດວັນທີ 28 ກໍລະກົດ 2021 ແຂວງສາລະວັນກວດພົບຜູ້ຕິດເຊື້ອສະສົມຈາກພະຍາດດັ່ງກ່າວແລ້ວຫຼາຍກວ່າ 200 ຄົນ.
ທ່ານ ດຣ ວົງດາວ ສຸລິນທາ ຮອງຫົວໜ້າພະແນກສາທາລະນະສຸກແຂວງສາລະວັນໄດ້ລາຍງານການກຽມຄວາມພ້ອມໃນການປ້ອງກັນພະຍາດໂຄວິດ-19 ຈາກແຮງງານລາວກັບຄືນປະເທດເມື່ອມໍ່ໆມານີ້ວ່າ: : ພາຍຫຼັງແຂວງສາລະວັນ ໄດ້ຮັບເອົາແຮງງານລາວ ທີ່ກັບຈາກປະເທດໄທ ໂດຍຜ່ານດ່ານສາກົນວັງເຕົ່າ ເມືອງໂພນທອງ ແຂວງຈຳປາສັກ ແມ່ນໄດ້ກວດພົບຜູ້ຕິດເຊື້ອພະຍາດໂຄວິດ-19 ໃນແຕ່ລະວັນ ດັ່ງນັ້ນເພື່ອກຽມຮັບມືໃນການປ້ອງກັນພະຍາດໂຄວິດ-19 ຈາກເເຮງງານເຫຼົ່ານັ້ນ ຄະນະສະເພາະກິດຂັ້ນແຂວງໄດ້ກຽມບຸກຄະລາກອນ ແພດໝໍ-ພະຍາບານ, ອຸປະກອນການແພດ, ອຸປະກອນຮັບໃຊ້ທີ່ຈໍາເປັນ, ເຈົ້າໜ້າທີ່ສະເພາະ ແລະ ກຳລັງ ປກຊ-ປກສ ເພື່ອອຳນວຍຄວາມສະດວກ ແລະ ປະຕິບັດໜ້າທີ່ ຢ່າງເຂັ້ມງວດ, ໄດ້ກໍານົດເອົາໂຮງຮຽນຊົນເຜົ່າແຂວງສາລະວັນ ເປັນສູນລວມ ແລະ ທັງເປັນໂຮງໝໍພາກສະໜາມ ເພື່ອປີ່ນປົວຜູ້ຕິດເຊື້ອພະຍາດໂຄວິດ-19 ທີ່ຢູ່ໃນອາການເບົາບາງ ແລະ ເປັນສະຖານທີ່ຈຳກັດບໍລິເວນແຮງງານລາວ ຊຶ່ງສາມາດຮອງຮັບໄດ້ 300 ຕຽງ, ໃນນັ້ນຮອງຮັບການປີ່ນປົວຜູ້ຕິດເຊື້ອ 100 ຕຽງ. ນອກຈາກນັ້ນແລ້ວຍັງໄດ້ກະກຽມສະຖານທີ່ຕ່າງໆ ທີ່ຈະຮອງຮັບ ຕື່ມອີກ, ຖ້າຫາກມີແຮງງານລາວ ຍັງສືບຕໍ່ເດີນທາງກັບບ້ານ ເພື່ອຈຳກັດບໍລິເວນ ແລະ ລະບາຍຈັດສົ່ງໃຫ້ບັນດາເມືອງ ຫຼັງຈາກຈຳກັດບໍລິເວນຄົບ 14 ວັນ ໃຫ້ບັນດາເມືອງ ສືບຕໍ່ຈຳກັດບໍລິເວນຕື່ມອີກ.

ຂ່າວ-ພາບ: ວິໄລວອນ ສິດທິໄຊ

Related Articles

Leave a Reply