Vientiane Times Lao
ສື່ມ​ວນ​ຊົນ ຍັງ​ພົບ​ຄວາມ​ຫຍຸ້ງ​ຍາກ​ໃນ​ການ ​ໂຄ​ສະ​ນາ​​ກ່ຽວ​ກັບບັນຫາ ​​ຢາ​ເສບ​ຕິດ

ສື່ມ​ວນ​ຊົນ ຍັງ​ພົບ​ຄວາມ​ຫຍຸ້ງ​ຍາກ​ໃນ​ການ ​ໂຄ​ສະ​ນາ​​ກ່ຽວ​ກັບບັນຫາ ​​ຢາ​ເສບ​ຕິດ

ຂະແໜງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ເອົາໃຈໃສ່ໂຄສະນາການຈັດຕັ້ງຜັນຂະຫຍາຍວາລະແຫ່ງຊາດ ຢ່າງພົ້ນເດັ່ນຫຼາຍດ້ານໃນໄລຍະຜ່ານມາ, ແຕ່ກໍຍັງມີຂໍ້ຈຳກັດ ເປັນຕົ້ນ ຄວາມຫຍຸ້ງຍາກໃນການເຂົ້າເຖິງແຫຼ່ງຂໍ້ມູນຂ່າວສານ ເນື່ອງຈາກພາກສ່ວນທີ່ກ່ຽວຂ້ອງ ຍັງບໍ່ສາມາດຕອບສະໜອງໄດ້ຕາມຄວາມຕ້ອງການຂອງສັງຄົມ ແລະ ບັນຫາອື່ນໆ, ເພື່ອແກ້ໄຂບັນຫາຢາເສບຕິດຜ່ານສື່ຕ່າງໆ ເພື່ອໃຫ້ປະຊາຊົນ ກໍຄື ສັງຄົມ ຮັບຮູ້ຢ່າງແຂງແຮງ ແລະ ເປັນຂະບວນກວ້າງຂວາງ.

ທ່ານ ນາງສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຊີ້ແຈງຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 21 ມິຖຸນາ 2022 ຜ່ານມາ ວ່າ:  ໂດຍສຸມໃສ່ປະຕິບັດຕາມທິດຊີ້ນໍາຂອງຂັ້ນເທິງຕໍ່ກັບການແກ້ໄຂບັນຫາດັ່ງກ່າວຢ່າງເປັນ ລະບົບເຊັ່ນ: ໄດ້ໂຄສະນາເຕືອນສະຕິ, ສຶກສາອົບຮົມໃຫ້ສັງ ຄົມ ກໍຄື ປະຊາຊົນ, ຊາວໜຸ່ມ ແລະ ເຍົາວະຊົນ ໄດ້ຮັບຮູ້ເຂົ້າໃຈເຖິງຜົນຮ້າຍຂອງຢາເສບຕິດ ໂດຍຜະລິດເປັນຂ່າວ, ບົດແນະນໍາ, ບົດສຶກສາອົບຮົມ, ບົດເລື່ອງ, ຄໍາຂວັນ ຜ່ານວິທະຍຸ-ໂທລະໂຄ່ງ, ໂທລະພາບ, ໜັງສືພິມ ແລະ ສື່ສັງຄົມອອນລາຍ. ພ້ອມທັງ ໄດ້ອອກຂ່າວຕາມເຫດການ ທີ່ເຈົ້າໜ້າທີ່ກ່ຽວຂ້ອງສາມາດຈັບກຸມຜູ້ຄ້າຂາຍ, ຂົ່ນສົ່ງ, ຜົນການສືບສວນ-ສອບສວນ, ການຖະແຫຼງຂ່າວຂອງເຈົ້າໜ້າທີ່ ແລະ ການດໍາເນີນຄະດີໃນແຕ່ລະຄັ້ງ.

 ທ່ານ ນາງ ສວນສະຫວັນ ວິຍະເກດ ໄດ້ກ່າວຕື່ມວ່າ, ວຽກງານໂຄສະນາຕ້ານຢາເສບຕິດ ຍັງພົບຂໍ້ຫຍຸ້ງຍາກຈໍານວນໜຶ່ງ ໂດຍສະເພາະແມ່ນສື່ມວນຊົນທີ່ເປັນທາງການ ຍັງພົບຄວາມຫຍຸ້ງຍາກໃນການເຂົ້າເຖິງແຫຼ່ງຂໍ້ມູນຂ່າວສານ ເນື່ອງຈາກພາກສ່ວນກ່ຽວຂ້ອງ ບໍ່ສາມາດຕອບສະໜອງໄດ້ຕາມຄວາມຕ້ອງການຂອງສັງຄົມ; ບັນຫາການຄວບຄຸມການໃຊ້ສື່ສັງຄົມອອນລາຍ ເຫັນວ່າຍັງມີຄວາມຫຍຸ້ງຍາກພໍສົມຄວນ, ເຊິ່ງໄລຍະຜ່ານມາ ເຈົ້າໜ້າທີ່ທາງການຍັງບໍ່ທັນໄດ້ຖະແຫຼງຂ່າວ, ແຕ່ບຸກຄົນ ຫຼື ຜູ້ໃຊ້ສື່ອອນລາຍສ່ວນຕົວ ໄດ້ກະຈາຍພາບ ແລະ ຂໍ້ມູນ ອອກສູ່ສື່ສັງຄົມອອນລາຍ ເປັນວົງກວ້າງ ເຮັດໃຫ້ສັງຄົມເກີດການວິພາກວິຈານໄປຫຼາຍແງ່ມຸມ; ພາຫະນະ ແລະ ອຸປະກອນຮັບໃຊ້ສື່ມວນຊົນ ຍັງບໍ່ທັນພຽງພໍຕາມຄວາມຕ້ອງການໃນວຽກງານຕົວຈິງ ເຮັດໃຫ້ການໂຄສະນາບາງຄັ້ງບໍ່ທັນຕາມສະພາບການ; ຄວາມຈໍາກັດທາງດ້ານບຸກຄະລາກອນສື່ມວນຊົນທີ່ມີວິຊາສະເພາະດ້ານສື່ ຫຼື ຂ່າວກ່ຽວກັບຢາເສບຕິດ ຕ້ອງໄດ້ລໍຖ້າຈາກຂະແໜງ ການກ່ຽວຂ້ອງກ່ອນ ຈຶ່ງເຮັດໃຫ້ການອອກຂ່າວບາງຄັ້ງ ບໍ່ສາມາດຕອບສະໜອງໄດ້ທັນເວລາ. ຕໍ່ກັບບັນຫາດັ່ງກ່າວ, ຂະແໜງການ ຖວທ ກໍໄດ້ກໍານົດບາງວິທີການ ເພື່ອການໂຄສະນາໃຫ້ແກ່ການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ໃຫ້ກວ້າງຂວາງຕໍ່ເນື່ອງ ຄື: ແຕ່ລະຂະແໜງການ ແລະ ເຈົ້າໜ້າທີ່ກ່ຽວຂ້ອງທີ່ໄດ້ຮັບຂໍ້ມູນຄວນໃຫ້ການຮ່ວມມືກັບສື່ມວນຊົນທາງການພວກເຮົາຫຼາຍຂຶ້ນຕື່ມ ກ່ຽວກັບການສະໜອງຂໍ້ມູນ ເພື່ອໃຫ້ສື່ມວນຊົນນໍາໄປໂຄສະນາຜ່ານສື່ມວນຊົນໃຫ້ທັນເວລາ; ການກະຈາຍຂໍ້ມູນສູ່ສື່ສັງຄົມອອນລາຍ ແຕ່ລະພາກສ່ວນຕ້ອງໄດ້ເປັນເຈົ້າການຮ່ວມກັນ ເພື່ອຮັບປະກັນການຮົ່ວໄຫຼຂໍ້ມູນທີ່ບໍ່ເປັນທາງການ ຫຼື ຂ່າວບິດເບືອນຄວາມຈິງ; ຜະລິດສາລະຄະດີ, ລະຄອນ ແລະ ໂຄສະນາອອກເປັນພາສາບັນດາເຜົ່າ ແລະ ລັດຕ້ອງລົງທຶນໃສ່ວຽກງານໂຄສະນາການແກ້ໄຂບັນຫາດັ່ງກ່າວເພີ່ມຂຶ້ນຕື່ມ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ