Vientiane Times Lao
ສື່ມວນ​ຊົນ ແລະ ​ການ​ພິມ​ຈຳ​ໜ່າຍ​ລາວໄດ້​ຮັບ​ການ​ພັດທະນາ ​ແລະ ​ເຕີບ​ໃຫຍ່​ຂະຫຍາຍຕົວ​ເປັນ​ກ້າວໆ​

ສື່ມວນ​ຊົນ ແລະ ​ການ​ພິມ​ຈຳ​ໜ່າຍ​ລາວໄດ້​ຮັບ​ການ​ພັດທະນາ ​ແລະ ​ເຕີບ​ໃຫຍ່​ຂະຫຍາຍຕົວ​ເປັນ​ກ້າວໆ​

70ປີ​ ແຫ່ງ​ການ​ເຕີບ​ໃຫຍ່​ຂະ​ຫຍາຍ​ຕົວ​ຂອງ​ສື່ມວນ​ຊົນ ແລະ ​ການ​ພິມ​ຈຳ​ໜ່າຍ​ລາວ ນັບແຕ່ 13 ສິງ​ຫາ 1950-13 ສິງ​ຫາ 2020 ພາຍໃຕ້ການນໍາພາຂອງພັກໄດ້ມີການພັດທະນາ ແລະ ເຕີບໃຫ່ຍຂະຫຍາຍຕົວທັງປະລິມານ ແລະ ຄຸນນະພາບ.

ສັງ​ລວມ​ແລ້ວ, ຕະຫຼອດ​ໄລຍະ 70 ປີ ຜ່ານມາ, ວຽກ​ງານ​ສື່​ມວນ​ຊົນໄດ້​ຮັບ​ການ​ພັດທະນາ ​ແລະ ​ເຕີບ​ໃຫຍ່​ຂະຫຍາຍຕົວ​ເປັນ​ກ້າວໆ​ມາ, ຊຶ່ງຮອດປັດຈຸບັນນີ້ມີ​ສື່​ສິ່ງ​ພິມ​ທັງ​ໝົດຫຼາຍກວ່າ 100 ສະບັບ, ​ໃນ​ນັ້ນ​ມີ​ໜັງສືພິມ 10 ກວ່າສະບັບ, ​ເປັນລາຍ​ວັນ 11 ສະບັບ (ມີ​ທັງ​ພາສາ​ລາວ, ອັງກິດ) ມີ​ວາລະສານ​ທັງ​ໝົດ 100 ສະບັບ ນັບ​ທັງ​ຂອງ​ລັດ ​ແລະ ​ເອກະ​ຊົນ​ຢູ່​ສູນ​ກາງ​ແລະ​ທ​ອ້ງ​ຖິ່ນ.

ວິທະຍຸ​ກະຈາຍສຽງ​ມີ​ທັງ​ໝົດ 63 ສະຖານີ, ​ ການ​ກະຈາຍສຽງ​ທາງ​ພາກ​ພື້ນ​ດິນ​ຂອງ​ລະບົບ​ເອ​ເອັມ ​ແລະ ​ເອັຟ​ເອັມ ກວມ 90% ຂອງ​ພື້ນ​ທີ່​ທົ່ວ​ປະ​ເທດ. ການ​ກະຈາຍ​ຜ່ານ​ດາວ​ທຽມ ​ແລະ ອິນ​ເຕີ​ເນັດ​ກວມ 100% ຂອງ​ພື້ນ​ທີ່​ທົ່ວ​ປະ​ເທດ ​ແລະ ຫຼາຍ​ປະ​ເທດ​ໃນ​ໂລກ. ວິທະຍຸກະຈາຍສຽງ​ແຫ່ງ​ຊາດ​, ນອກຈາກການ​ກະຈາຍ​ພາກ​ພາສາ​ລາວ​, ພາສາ​ຊົນ​ເຜົ່າ​ລາວ (ມົ້ງ ​ແລະ ກຶມ​ມຸ) ແລ້ວ, ຍັງ​ໄດ້​ກະຈາຍ​ເປັນ​ພາສາ​ຕ່າງປະ​ເທດ​ເຊັ່ນ: ຫວຽດນາມ, ອັງກິດ, ຝຣັ່ງ, ກຳປູ​ເຈຍ ​ແລະ ​ໄທ. ມີ​ສະຖານີ ​ເອັຟ​ເອັມ ສຳລັບ​ຖ່າຍ​ທອດ​ວິທະຍຸ​ສາກົນ​ແຫ່ງ​ປະ​ເທດ​ຈີນ, ວິທະຍຸ​ສາກົນ​ຝຣັ່ງ ​ແລະ ວິທະຍຸ​ອົສຕຣາລີ.

ໂທລະພາບ​ມີ​ທັງ​ໝົດ 37 ສະຖານີ ​ໂດຍມີທັງໂທລະພາບລັດ ແລະ ເອກະຊົນ, ສາມາດ​ແຜ່​ພາບ​ທາງ​ພາກ​ພື້ນ​ດິນ​ກວມ 80% ຂອງ​ພື້ນ​ທີ່​ທົ່ວ​ປະ​ເທດ. ນອກ​ນັ້ນ, ຍັງ​ມີ​ສະຖານີ​ຖ່າຍ​ທອດ​ໂທລະພາບ​ຫວຽດນາມ VTV4, ສະຖານີ​ຖ່າຍ​ທອດ​ໂທລະພາບ ສປ ຈີນ CCTV4, CCTV News. ຢູ່​ບັນດາ​ຕົວ​ເມືອງ​ໃຫຍ່​ໃນ​ຂອບ​ເຂດ​ທົ່ວ​ປະ​ເທດ​ໄດ້​ມີ​ການ​ບໍລິການ​ໂທລະພາບ​ລະບົບ​ໃຊ້​ສາຍ ​ແລະ ​ໂທລະພາບ​ດີ​ຈີ​ຕອນ ​ເຊິ່ງສາມາດຊົມ​ລາຍການ​ໂທລະພາບ​ຂອງ​ລາວ ​ແລະ ​ໂທລະພາບ​ຕ່າງປະ​ເທດ​ໄດ້​ເຖິງ 40 ກວ່າ​ຊ່ອງ. ນອກຈາກ​ນັ້ນ, ຍັງ​ມີ​ສື່​ໃໝ່ (New Media) ​ໂດຍ​ນຳ​ໃຊ້​ຄວາມ​ກ້າວໜ້າ​ທັນ​ສະ​ໄໝ​ຂອງ​ເຕັກ​ໂນ​ໂລ​ຊີ​ການ​ສື່ສານສ້າງ​ເວັບ​ໄຊ​ຂອງ​ຕົນ​ຂຶ້ນ​ຢູ່​ໃນ​ລະບົບ​ເຄືອ​ຂ່າຍ​ອິນ​ເຕີ​ເນັດ ອັນ​ໄດ້​ຊ່ວຍ​ໃຫ້ການ​ສົ່ງ​ຂໍ້​ມູນ-ຂ່າວສານ​ອອກ​ສູ່​ພາຍ​ໃນ ​ແລະ ຕ່າງປະ​ເທດ​ວ່ອງ​ໄວ, ທັນ​ການ ​ແລະ ກ້ວາງ​ຂວາງ​ກວ່າ​ເກົ່າ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ