ເມື່ອບໍ່ດົນມານີ້, ສູນວັດທະນະທຳຈີນປະຈໍາ ສປປ ລາວ ໄດ້ກັບມາເປີດໃຫ້ບໍລິການອີກຄັ້ງໃໝ່ແລ້ວ ຫຼັງຈາກທີ່ໄດ້ລໍຄອຍມາເປັນເວລາ 3 ປີ.
ສູນວັດທະນະທໍາຈີນປະຈໍາລາວ ໄດ້ເປີດໃຫ້ບໍລິການຢ່າງເຕັມຮູບແບບເປັນຄັ້ງທຳອິດ ເພື່ອໃຫ້ປະຊາຊົນໄດ້ເຂົ້າຢ້ຽມຊົມຢ່າງເປັນທາງການ ນັບແຕ່ໄດ້ຍ້າຍສູນມາຢູ່ສະຖານທີ່ແຫ່ງໃໝ່ເມື່ອ 2 ປີກ່ອນ ແລະ ໄດ້ຮັບການຕອບຮັບຢ່າງອົບອຸ່ນຈາກປະຊາຊົນລາວ ແລະ ຊາວຈີນຕ່າງດ້າວ ໂດຍມີຜູ້ເຂົ້າມາຢ້ຽມຢາມໃນມື້ເປີດສູນປະມານ 100 ຄົນ ຊຶ່ງມີຫ້ອງວາງສະແດງ, ຫ້ອງອະເນກປະສົງ, ຫ້ອງສະໝຸດ, ຫ້ອງສຳຜັດວັດທະນະທຳ ແລະ ຫ້ອງອື່ນໆ ພ້ອມນັ້ນໄດ້ເປີດຫ້ອງຝຶກອົບຮົມພາສາຈີນ HSK1 ຊຸດທີ 6 ຂຶ້ນໂດຍມີນັກຮຽນຈາກທຸກສາຂາອາຊີບເຂົ້າຮ່ວມທັງໝົດ 30 ຄົນ.
ພາຍໃນຫ້ອງວາງສະແດງ, ມີຮູບແຕ້ມບູຮານຈີນ 40 ຮູບ ທີ່ສະແດງໃຫ້ເຫັນທັດສະນີຍະພາບທີ່ສວຍສົດງົດງາມຂອງພູຜາ ແລະ ແມ່ນໍ້າຍຸກສະໄໝບູຮານຈີນ, ແນວຄວາມຄິດດ້ານສິລະປະໃນບົດກະວີ ແລະ ຮູບແຕ້ມ ໄດ້ສືບສານອະລິຍະທໍາຂອງປະຊາຊົນຈີນທີ່ຍາວນານກວ່າ 5.000 ປີ. ນອກຈາກນີ້ຢູ່ຫ້ອງອະເນກປະສົງ ຍັງມີການສາຍຮູບເງົາຈີນ ຊຶ່ງຈັດໃນຫົວຂໍ້ “ໂຮງໜັງວັນຢຸດສັບປະດາ” ຮູບເງົາ “ປະຕິບັດການທະເລແດງ” ເລື່ອງນີ້ໄດ້ເລົ່າເຖິງສະມາຊິກ ກອງບັນຊາການຈຽວຫຼົງຂອງກອງທັບເຮືອຈີນທີ່ໄດ້ຮັບຄຳສັ່ງໃຫ້ປະຕິບັດພະລາກິດອົບພະຍົບຄົນອອກຈາກເຮືອ, ພວກເຂົາໄດ້ແບ່ງການຊ່ວຍເຫຼືອອອກເປັນສອງທາງ, ແຕ່ໂຊກຮ້າຍຖຶກສຸ້ມໂຈມຕີເຮັດໃຫ້ບາດເຈັບ ແລະ ເສຍຊີວິດ. ການເອົາຊະນະໂຈນສະລັດຂອງທະຫານເຮືອແມ່ນຖືເປັນໄຊຊະນະທີ່ກ້າຫານ ແລະ ໜ້າຕື່ນເຕັ້ນ. ພາຍໃນຫ້ອງສະຫມຸດມີປື້ມຫຼາຍກວ່າ 4.000 ຫົວ ປະກອບມີປື້ມພາສາຈີນ, ພາສາລາວ ແລະ ພາສາອັງກິດ ສາມາດເຂົ້າອ່ານໄດ້ໂດຍບໍ່ເສຍຄ່າ ຊຶ່ງໄດ້ນຳເອົາໜັງສືກ່ຽວກັບວັດທະນະທຳເປັນຫຼັກ, ມີເຄື່ອງມືອ່ານເອເລັກໂຕຣນິກທີ່ທັນສະໄໝ, ມີບ່ອນອ່ານໜັງສືສຳລັບເດັກນ້ອຍໄວ້ໃຫ້ບໍລິການ ແລະ ຍັງມີບໍລິການການຢືມປື້ມນຳອີກ. ຫ້ອງສຳຜັດວັດທະນະທຳນີ້ ໄດ້ອອກແບບບູຮານ ມີອົງປະກອບວັດທະນະທຳອັນດັ້ງເດີມຂອງຈີນ ສາມາດສຳຜັດໄດ້ເຖິງສະເໜ່ທີ່ບໍ່ມີມື້ສິ້ນສຸດຂອງເຄື່ອງດົນຕີຈີນ ແລະ ໝາກລຸກຈີນ. ນອກນີ້ຍັງມີການສະແດງສິລະປະຊົງນໍ້າຊາ, ມີກາເຟ ແລະ ອາຫານຫວ່າງໄວ້ຄອຍບໍລິການ.
ສຳລັບຫໍສະໝຸດຂອງສູນວັດທະນະທຳຈີນ ໄດ້ເປີດໃຫ້ບໍລິການທຸກໆວັນພຸດຫາວັນສຸກຕອນເຊົ້າ ເວລາ 9:00-11:00 ແລະ ຕອນບ່າຍ ເວລາ 14:30-16:30; ຫ້ອງວາງສະແດງ, ໂຮງໜັງວັນຢຸດສັບປະດາ, ຫ້ອງສຳຜັດວັດທະນະທຳ ເປີດທຸກໆວັນເສົາ ເວລາ 9:00-16:00 ໂມງ; ຫ້ອງຮຽນພາສາຈີນ ເປີດສອນ ວັນເສົາ-ວັນອາທິດ ເວລາ 9:00-11:00 ໂມງ.
ແຫຼ່ງຂ່າວ: ສູນວັດທະນະທຳຈີນ
