Vientiane Times Lao
ສ.ປ ຈີນ, ຍີ່ປຸ່ນ ແລະ ສ.ເກົາຫຼີ ເຫັນດີ ສ້າງຕັ້ງກອງທຶນສຸກເສີນອາຊຽນ ເພື່ອຮັບມືກັບ ໂຄວິດ-19

ສ.ປ ຈີນ, ຍີ່ປຸ່ນ ແລະ ສ.ເກົາຫຼີ ເຫັນດີ ສ້າງຕັ້ງກອງທຶນສຸກເສີນອາຊຽນ ເພື່ອຮັບມືກັບ ໂຄວິດ-19

ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ທ່ານ ສະເຫຼີມໄຊ ກົມມະສິດ, ໄດ້ນຳພາຄະນະເຂົ້າຮ່ວມກອງປະຊຸມ ລັດຖະມົນ​​ຕີຕ່າງປະເທດ ອາຊຽນ-ຈີນ, ອາຊຽນ-ຍີ່ປຸ່ນ ແລະ ອາຊຽນ-ສ. ເກົາຫຼີ ( ແບບທາງໄກ) ຫວ່າງບໍ່ດົນຜ່ານມານີ້ ທີ່ ກະຊວງການຕ່າງປະເທດ, ນະຄອນຫຼວງວຽງຈັນ, ຊຶ່ງໃນກອງປະຊຸມ ສ.ປ ຈີນ, ຍີ່ປຸ່ນ ແລະ ສ. ເກົາຫຼີ ໄດ້ເຫັນດີ ສະໜັບສະໜູນ ຂໍ້ລິເລີ່ມ ຂອງອາຊຽນ ໃນການສ້າງຕັ້ງກອງທຶນສຸກເສີນອາຊຽນ ເພື່ອຮັບມືກັບການແຜ່ລະບາດພະຍາດ ໂຄວິດ-19 ແລະ ຄັງແຮສຸກເສີນຢາປົວພະຍາດ ແລະ ອຸປະກອນການແພດອາຊຽນ ແລະ ທັງ 3 ປະເທດ ກໍ່ໄດ້ປະກອບສ່ວນທຶນຮອນ ຈາກກອງທຶນຮ່ວມມື ອາຊຽນ-ຈີນ, ອາຊຽນ-ຍີ່ປຸ່ນ ແລະ ອາຊຽນ-ສ. ເກົາຫຼີ ເຂົ້າໃນກອງທຶນສຸກເສີນອາຊຽນໂຄວິດ-19 ແລ້ວ.
ພ້ອມນັ້ນ ກອງປະຊຸມ ຍັງໄດ້ຕີລາຄາສູງ ຕໍ່ຜົນການຈັດຕັ້ງປະຕິບັດ ການຮ່ວມມື ອາຊຽນ-ຈີນ, ອາຊຽນ-ຍີ່ປຸ່ນ ແລະ ອາຊຽນ-ສ. ເກົາຫຼີ ໃນໄລຍະ 1 ປີຜ່ານມາ, ໂດຍສະເພາະ ການຈັດຕັ້ງປະຕິບັດ ແຜນປະຕິບັດອາຊຽນ-ຈີນ, ອາຊຽນ-ຍີ່ປຸ່ນ ແລະ ອາຊຽນ-ສ. ເກົາຫຼີ ໃນໄລຍະ 2016-2020, ຊຶ່ງກວມເອົາ 3 ເສົາຄໍ້າ ຂອງການສ້າງປະຊາຄົມອາຊຽນ (ການເມືຶອງ-ຄວາມໝັ້ນຄົງ, ເສດຖະກິດ ແລະ ວັດທະນະທໍາ-ສັງຄົມ) ລວມທັງ ການປ້ອງກັນ, ຮັບມື ແລະ ແກ້ໄຂ ການລະບາດຂອງພະຍາດໂຄວິດ-19.
ກອງປະຊຸມຄັ້ງນີ້ ຍັງໄດ້ແລກ ປ່ຽນຄໍາຄິດຄໍາເຫັນນໍາກັນຕໍ່ບາງບັນຫາເດັ່ນ ຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເຊັ່ນ: ບັນຫາແຫຼມເກົາຫຼີ, ທະເລຈີນໃຕ້, ການຈັດຕັ້ງປະຕິບັດເອກະສານແນວຄວາມຄິດອິນໂດ-ປາຊີຟິກ ຂອງອາຊຽນ ແລະ ອື່ນໆ.
ສໍາລັບທິດທາງໃນຕໍ່ໜ້າ, ລັດຖະມົນຕີຕ່າງປະເທດອາຊຽນ-ຈີນ, ອາຊຽນ-ຍີ່ປຸ່ນ, ແລະ ອາຊຽນ-ສ.ເກົາຫຼີ ໄດ້ເຫັນດີຈະສືບຕໍ່ເພີ່ມທະວີການຮ່ວມືກັນ ໃນບາງຂົງເຂດບູລິມະສິດ ເຊັ່ນ: ຂົງເຂດສາທາລະນະສຸກ, ການສຶກສາ, ການຫັນເປັນເສດຖະກິດດິຈິຕອນ ແລະ ນະວັດຕະກໍາ, ການເຊື່ອມຈອດອາຊຽນ, ການຮັດແຄບຄວາມແຕກໂຕນດ້ານການພັດທະນາພາຍໃນອາຊຽນ, ການທ່ອງທ່ຽວ, ການພັດທະນາແບບຍືນຍົງ, ການຄໍ້າປະກັນສະບຽງອາຫານ ແລະ ການພັດທະນາເຄືອຂ່າຍຕົວເມືອງອັດສະລິຍະ ອາຊຽນ.

ຂ່າວ: ວຽງຈັນທາຍ

ຮູບ: ປະກອບ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ