ອຳນາດການປົກຄອງແຂວງຫຼວງພະບາງ ໄດ້ກະກຽມຫຼາຍກິດຈະກຳ ເພື່ອສະເຫຼີມສະຫຼອງບຸນປີໃໝ່ລາວ ແລະ ຍັງເປັນການສະເຫຼີມສະຫຼອງປີທ່ອງທ່ຽວລາວຂອງແຂວງ ເປັນໄລຍະເວລາ 10 ວັນ ເລີ່ມແຕ່ວັນທີ 10-20 ເມສາ.
ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ ໄດ້ຖະແຫຼງຂ່າວໃນອາທິດຜ່ານມາ ກ່ຽວກັບການຈັດງານບຸນປີໃໝ່ລາວ ພສ 2567 ຄສ 2024 ທີ່ນະຄອນຫຼວງພະບາງ. ທ່ານກ່າວວ່າ: ການຈັດງານບຸນປີໃໝ່ລາວ ທີ່ນະຄອນ ຫຼວງພະບາງ ແມ່ນຈະໄດ້ຈັດໃນລັກສະນະເຕັມຮູບແບບ ເຊິ່ງຕິດພັນກັບການສະເຫຼີມສະຫຼອງປີທ່ອງທ່ຽວລາວ 2024, ເຊີ່ງການນໍາຂອງແຂວງໄດ້ຕົກລົງໃຫ້ ນະຄອນ ຫຼວງພະບາງ ສົມທົບກັບ ພະແນກ ຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ ໃນການກະກຽມຈັດງານບຸນໂດຍໄດ້ອອກຂໍ້ຕົກລົງແຕ່ງຕັ້ງ ຄະນະຮັບຜິດຊອບແຕ່ລະວຽກງານ, ທັງໄດ້ກະກຽມວຽກງານແຕ່ລະດ້ານ.
ອີງຕາມການລາຍງານຂອງ ວິທະຍຸກະຈາຍສຽງແຫ່ງຊາດ, ການເຄື່ອນໄຫວບຸນປີໃໝ່ລາວ ໄດ້ກໍານົດເອົາແຕ່ວັນທີ 10 – 20 ເມສາ 2024 ໂດຍມີຫຼາກຫຼາຍກິດຈະກຳ. ກິດຈະກຳອັນພົ້ນເດັ່ນ ແມ່ນການປະກວດນາງສັງຂານ, ພິທີແຫ່ຊ້າງຮຽງເກີຍ, ງານໂລະລາດ, ພິທີຕົບພະທາດຊາຍໃຫຍ່, ງານແຫ່ຫວໍ່ ແລະ ສະເຫຼີມສະຫຼອງປີທ່ອງທ່ຽວລາວ 2024, ພິທີອາລາດຖະນາອົງພະບາງລົງຫົດສົງ ແລະ ອື່ນໆ.
ສະເພາະກິດຈະກຳປີທ່ອງທ່ຽວລາວຢຸ່ແຂວງຫຼວງພະບາງປະກອບມີ 41 ກິດຈະກຳ, ໃນນີ້, ມີ 7 ກິດຈະກໍາຫຼັກ ຄື: ພິທີສະເຫຼີມສະຫຼອງປີທ່ອງທ່ຽວລາວ 2024, ງານບຸນໄຫຼເຮືອໄຟ, ງານສັບປະດາ ວັດທະນະທໍາ ແລະ ທ່ອງທ່ຽວ ບັນດາແຂວງພາກຕາເວັນຕົກສ່ຽງເໜືອ ແລະ ນະຄອນ ໂຮ່ຈີມິນ ສສ ຫວຽດນາມ; ງານງາມແທ້ໂອ້ຫຼວງພະບາງ ຄັ້ງທີ 2 ທີ່ສະທ້ອນໃຫ້ເຫັນຄວາມເປັນຫຼວງພະບາງ-ງານເທດສະການອາຫານ ພື້ນເມືອງ-ງານວາງສະແດງສິນຄ້າ ຫັດຖະກຳ-ສາທິດກິດຈະກຳທີ່ຕິດພັນກັບວິຖີຊີວິດ ທີ່ເປັນເອກະລັກຂອງແຂວງ, ງານປະກວດດົນຕີພື້ນເມືອງ; ກິດຈະກຳຂີ່ລົດຖີບ ເພື່ອອະນຸຮັກວັດທະນະທໍາ ແລະ ງານບຸນຊ່ວງເຮືອ.
ໃນໄລຍະປີທ່ອງທ່ຽລາວ 2024 ອຳນາດການປົກຄອງແຂວງຫຼວງພະບາງຄາດວ່າຈະມີນັກທ່ອງທ່ຽວມາຢ້ຽມຢາມແຂວງຫຼວງພະບາງຫຼາຍກວ່າ 1,7 ລ້ານຄົນ ແລະ ຄາດວ່າຈະມີລາຍຈ່າຍຈາກນັກທ່ອງທ່ຽວບໍ່ຕ່ຳກວ່າ 900 ລ້ານໂດລາສະຫະລັດ.
ໃນການຖະແຫຼງຂ່າວດັ່ງກ່າວ ທ່ານເຈົ້ານະຄອນ ຫຼວງພະບາງ ຍັງໄດ້ໄດ້ຮຽກຮ້ອງໃຫ້ປະຊາຊົນບັນດາເຜົ່າ, ພະນັກງານ, ທະຫານ, ຕຳຫຼວດ, ຜູ້ປະກອບການທຸລະກິດ, ຜູ້ຈັດການ ຜູ້ບໍລິການດ້ານຕ່າງໆ ຈົ່ງພ້ອມກັນເປັນເຈົ້າການທີ່ດີເຮັດວຽກງານປ້ອງກັນຊາດ ປ້ອງກັນຄວາມສະຫງົບ, ເປັນເຈົ້າ ການໃນການປະກອບສ່ວນທາງດ້ານເຫື່ອແຮງ ແລະ ວັດຖຸປັດໄຈ ເຂົ້າໃນການຈັດງານບຸນປີໃໝ່ລາວໃນຄັ້ງນີ້ ໃຫ້ມີບັນຍາກາດເບີກ ບານມ່ວນຊື່ນ ແລະ ປະສົບຜົນສຳເລັດຢ່າງຈົບງາມ, ພ້ອມນີ້ ທ່ານໄດ້ເຊີນຊວນປະຊາຊົນບັນດາເຜົ່າ, ນັກທ່ອງທ່ຽວ ທັງພາຍໃນ ແລະ ຕ່າງປະເທດ ພ້ອມກັນເຂົ້າມາທ່ຽວຊົມຫຼວງພະບາງ ເມືອງມໍລະດົກໂລກ ຮັບຮອງວ່າທ່ານຈະໄດ້ສຳຜັດກັບວັດທະນະທໍາ- ຮີດຄອງປະເພນີອັນດີງາມ ທີ່ສືບທອດກັນມາແຕ່ບູຮານນະການ.
