ຫໍພິພິທະພັນ ນະຄອນຫຼວງພະບາງ (ພະລາດສະວັງເກົ່າ) ແຂວງຫຼວງພະບາງໄດ້ເປີດບໍລິການໃຫ້ແກ່ນັກທ່ອງທ່ຽວ ແລ້ວນັບແຕ່ວັນທີ 1 ເມສາ 2022 ເປັນຕົ້ນມາ, ເປີດທຸກໆວັນນັບແຕ່ເວລາ 8:00 ໂມງ ຫາ 16:00 ໂມງ.
ທ່ານ ສົມໃຈ ຫົງພະຈັນ ຫົວໜ້າຫໍພິພິທະພັນ ແຂວງຫຼວງພະບາງ ໄດ້ແຈ້ງໃຫ້ຮູ້ວ່າ: ຫໍພິພິທະພັນຫຼວງພະບາງ ເປັນພະລາດຊະວັງເກົ່າ ສ້າງຕາມແບບສະຖາປັດຕະຍະກຳ ຝຣັ່ງ ໃນປີ 1904 ແລະ ຕໍ່ເຕີມຍອດ ຂອງຜາສາດແບບລາວ ໃນປີ 1930. ປັດຈຸບັນ ໃຊ້ເປັນເວທີການສະແດງສິລະປະ ແລະ ພຸດທະສາດສະໜາ, ເປັນທີ່ປະດິດສະຖານພຣະບາງ ແລະ ສະແດງກ່ຽວກັບປະຫວັດເຈົ້າຊີວິດ ແລະ ຄອບຄົວ, ມີການກໍ່ສ້າງອາຄານໃໝ່ທີ່ສວຍງາມເພື່ອເປັນບ່ອນປະດິດສະຖານຂອງພຣະບາງ.
ທ່ານ ສົມໃຈ ແຈ້ງໃຫ້ຮູ້ຕື່ມອີກວ່າ: ການເປີດຫໍພິພິທະພັນຫຼວງພະບາງ ທຸກໆວັນນີ້ກໍເພື່ອແນໃສ່ຕ້ອນຮັບນັກທ່ອງທ່ຽວທີ່ເຂົ້າມາທ່ຽວນະຄອນຫຼວງພະບາງ ໂດຍສະເພາະແມ່ນກຸ່ມນັກທ່ອງທ່ຽວທີ່ມາທ່ຽວໄດ້ແຕ່ ວັນເສົາ-ວັນທິດ, ພ້ອມທັງເປັນການກະຕຸ້ນໃຫ້ການທ່ອງທ່ຽວພາຍໃນໂດຍສະເພາະເນື່ອງໃນໂອກາດປີໃໝ່ລາວທີ່ຈະມາເຖິງນີ້ ເຊິ່ງຈະມີຜູ້ຄົນຫຼັ່ງໄຫຼກັນເຂົ້າມາທ່ຽວຊົມເມືອງ ມໍລະດົກໂລກຫຼວງພະບາງ.
ແຫຼ່ງຂ່າວ-ພາບຈາກຫຼວງພະບາງ
