ຫໍໄຕປີດົກ ວັດສີມຸງຄຸນ (ວັດກາງ) ທີ່ຕັ້ງຢູ່ບ້ານວັດກາງ ເມືອງ ແລະ ແຂວງສາລະວັນສ້າງຂຶ້ນມາໄດ້ 238 ປີແລ້ວ (ສ້າງຂຶ້ນໃນປີ 1784) ຖືເປັນມໍລະດົກມິ່ງເມືອງທີ່ຊົງຄຸນຄ່າຂອງ ແຂວງສາລະວັນຈະໄດ້ຖືກຍົກໃຫ້ກາຍເປັນມໍລະດົກແຫ່ງຊາດລະດັບທ້ອງ ຖິ່ນໂດຍຈະມີພິທີປະກາດໃນລະຫວ່າງວັນທີ 5-9 ເມສາ 2022 ທີ່ຈະມາເຖິງນີ້.
ທ່ານ ສົມໃຈ ອຸ່ນຈິດ ຮອງເຈົ້າແຂວງ, ຜູ້ຊີ້ນໍາວຽກງານວັດທະນະທໍາ-ສັງຄົມ ແຂວງສາລະວັນໄດ້ກ່າວກຽ່ວກັບເລື່ອງນີ້ວ່າ: ຫໍໄຕປີດົກຂອງແຂວງສາລະວັນ ສ້າງຂຶ້ນມາໄດ້ 238 ປີແລ້ວ (ປີ 1784-2022) ຜ່ານມາໄດ້ຖືກຝູງບິນ T28 ຂອງຈັກກະພັດອາເມລິກາຍິງທໍາລາຍໃນຊຸມປີ 1970 ເຮັດໃຫ້ໄດ້ຮັບຄວາມເສຍຫາຍໜັກສົມຄວນ, ຈາກນັ້ນໃນປີ 2009 ອົງການປົກຄອງແຂວງໄດ້ປັບປຸງກໍ່ສ້າງ ແລະ ປະຕິສັງຂອນຫໍໄຕປີດົກຄືນໃໝ່ ເປັນຕົ້ນ: ການກໍ່ສ້າງກົມມະລຽນອ້ອມຂ້າງຫໍໄຕ, ກໍ່ສ້າງຫໍປະດິດສະຖານເສົາຫໍໄຕຫຼັງເກົ່າທີ່ຫຼົງເຫຼືອຈາກການທໍາລາຍຂອງເຮືອບິນເຊີ່ງຫໍໄຕຫຼັງເກົ່າທີ່ມີອາຍຸ 200 ກວ່າປີ ຍັງເຫຼືອ 29 ຕົ້ນ ແລະ ອື່ນໆ ເຊີ່ງມາຮອດປັດຈຸບັນໄດ້ສໍາເລັດຮຽບຮ້ອຍແລ້ວ, ດັ່ງນັ້ນອົງການປົກຄອງແຂວງ ແລະ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ຈະຈັດພິທີປະກາດຮັບຮອງເອົາຫໍໄຕປີດົກດັ່ງກ່າວນີ້ເປັນ ມໍລະດົກແຫ່ງຊາດທາງດ້ານວັດທະນະທໍາລະດັບທ້ອງຖິ່ນ ໂດຍຄາດວ່າຈະຈັດຂຶ້ນໃນເດືອນໜ້າ ໂດຍຈະມີຫຼາຍກິດ ຈະກໍາບໍ່ວ່າຈະເປັນພິທີທາງສາສະໜາ, ງານວາງສະແດງສິນຄ້າຂອງປະຊາຊົນພາຍໃນແຂວງ, ການປະກວດນັກຮຽນ-ໝໍລໍາ, ການແຫ່ພະໄຕປີດົກ-ໜັງສືຜູກໃບລານ, ແຫ່ຫໍຜາສາດເຜີ້ງ ແລະ ອື່ນໆ ເພື່ອດຶງດູດນັກທ່ອງທ່ຽວເຂົ້າ ມາໃນແຂວງໃຫ້ຫຼາຍ ຂຶ້ນກວ່າເກົ່າ ແລະ ເປັນການປະກອບສ່ວນສໍາຄັນເຮັດໃຫ້ຫໍໄຕແຫ່ງນີ້ກາຍເປັນຄັງຄວາມຮູ້ທາງດ້ານພຸດທະສາສະໜາ ແລະ ເປັນສະຖານສະສົມ ຫຼື ເກັບຮັກສາໄວ້ພະໄຕປີດົກ-ໜັງສືຜູກໃບລານຄົງຢູ່ຄູ່ກັບຊາວພຸດທະສາສະໜາຕະ ຫຼອດໄປ.
ຂ່າວ: ບຸນຕຽງ ຈັນທະວົງ
