ພະແນກສະກັດກັ້ນ ແລະ ປາບປາມຢາເສບຕິດ ປກສ ແຂວງອັດຕະປື ໄດ້ຈັດພິທີຈູດທໍາລາຍຢາເສບຕິດປະເພດຕ່າງໆຈໍານວນຫຼາຍກວ່າ 54 ກິໂລ ປະກອບ ມີຢາບ້າ ຈຳນວນ 176. 133 ເມັດ ນ້ຳໜັກຫຼາຍກວ່າ 16 ກິໂລ, ຢາໄອ 38 ຖົງ ນ້ຳໜັກ 38 ກິໂລ, ກັນຊາແຫ້ງ 2 ແພັກ ແລະ ສານເສບຕິດ ອື່ນໆອີກ, ໃນວັນທີ 12 ຕຸລາ 2020 ນີ້ ຢູ່ເດີ່ນຫໍປະຊຸມໃຫ່ຍແຂວງ, ເພື່ອສະເຫຼີມ ສະຫຼອງວັນຕ້ານຢາເສບຕິດຄົບຮອບ 19 ປີ (12 ຕຸລາ 2001-12 ຕຸລາ 2020).
ຮອງຫົວໜ້າກອງບັນຊາການ ປກສ ແຂວງອັດຕະປື, ທ່ານ ພັນເອກ ບັນດິດ ສີວິໄລ ໄດ້ກ່າວໃນພິທີວ່າ ປະຈຸບັນ, ຢາເສບຕິດຍັງສືບຕໍ່ແຜ່ລະບາດຢ່າງຮ້າຍແຮງຢູ່ທຸກຂົງເຂດໃນທົ່ວໂລກ ນັບທັງພາກພື້ນ ອາຊີ-ອາຄະເນ, ໃນນັ້ນຢາບ້າກວມເອົາເປີເຊັນ ສູງກ່ວາໝູ່ ຂອງຢາເສບຕິດປະເພດຕ່າງໆໃນທົ່ວໂລກ, ສະເພາະຢູ່ ສປປ ລາວ ກໍຄືພາຍໃນແຂວງອັດຕະປື ສະພາບການເສບ ແລະ ການຄ້າຂາຍຢາເສບຕິດ ແມ່ນບັນຫາທີ່ພົ້ນເດັ່ນ ແລະ ມີລັກສະນະເພີ່ມຂຶ້ນ ແລະ ແຜ່ລາມໄປທຸກພື້ນທີ່ ນັບທັງຕົວເມືອງ ແລະ ຊົນນະບົດ, ຊຶ່ງໄດ້ສົ່ງຜົນກະທົບໂດຍກົງຕໍ່ຄວາມໝັ້ນຄົງຂອງຊາດ, ຄວາມສະຫົງບສຸກ- ຄວາມປອດໄພ ເປັນບັນຫາກົດໜ່ວງຖ່ວງດຶງ ການພັດທະນາເສດຖະກິດ-ສັງຄົມ.
ພິທີຈູດທໍາລາຍຢາເສບຕິດດັ່ງກ່າວ ໂດຍເຂົ້າຮ່ວມຂອງຮອງເຈົ້າແຂວງ ອັດຕະປື, ທ່ານ ອຸ່ນຫຼ້າ ໄຊຍະສິດ ພ້ອມດ້ວຍ ຫົວໜ້າກອງບັນຊາການ ປກສ ແຂວງອັດຕະປື, ທ່ານ ພັນເອກ ສີເວີນ ແກ້ວສີວົງສາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຂ່າວ ໄຊຍະບຸນຮາຍ
